داستانۊ حەیدەری و سنۊبەرۍ
بەشۍ حەفتا و یەکەمە
وەختێ حەیدەر بەگ سنۊبەرەش ئۆ خزمەتو شاعەباسی ئاردە، شا پۊرەشەرە دېیا واتش:
شا وات: سنۊبەر، بانووی بانوان
وەش ئامای بەخێر، نە موڵکی ئێران
چوون ئامای بە زەید، ئەی ماهی تابان
پایەندازت بۊ، موڵکی ئەسفەهان
سنۊبەر وات: ئەی شای جەهاندار
بە تەوفېقی هەقق، بینای کردگار
تا دەورەی مەهدی ساحېب زەمانی
وە تەخت بمانی، بە کامەرانی
چوونکە مەکەری غەریب نەوازیی
شاهەنشای شاهان، چەنەت بۊ ڕازی
یاگە نیشان دا، شاهی بوڵند ئەختەر
فەرما بنیشە، خورشیدی خاوەر
سنۊبەر بە ناز، بۊسە دا زەمین
نیشت نە وەرانوەر، شای دارا نگین
فەرماش ئېعلام کەر نە شاری کشمیر
حەیدەر چېش کەردی، بە زەربی شمشېر
تەمام سەرگوزەشت، ئەی ماهی تابان
جە کرداری وېت، وەنەم کەر عەیان
سنۊبەر تەمام ئەحواڵی کشمیر
ئەرزکەرد بە خزمەت، شای واڵا سەریر
شا، وات، مەزانوو، حەیدەر دلېرەن
ئەسڵ و نەسەب خاس، هەم نەڕەشېرەن
بەڵام ئەی نازار، کشمیر و کابل
هەراسە دیڎەت، هارووت و بابل
ئاشوفتەی زوڵفت، ئاشوفتەی خاڵەن
خاڵت نافەی موشک، چینی غەزاڵەن
لەعلی لەبانت، سەرچەشمەی حەیات
سەڎ، چوون ئەسکەندەر، پەرێش بېیەن مات
بەو دیڎەی سیای، بۍ بادە مەستت
بەو تیری غەمزەی، کەس جۍ نە ڕەستت
بەو گونای گوڵفام، بەدری مونیرت
بەو شوعلەی شەوقی، ڕووی عالەم گیرت
بەو چای زەنەخدان، بەو زنجی زەردت
بەو گەردەنی ساف، مینای بېگەردت
بەو زوڵفی ئەفشان، مېقرازی کەردەت
بەو ئەگریجەی خاس، بە ناز پەروەردەت
بەو سینەی بېخەوش، لیموانی زەرد
مەدان، وە شەونم، قەترەی (مائەلوەرد)
بەو بەرزی باڵای سیوەیل ڕەسیدەت
بەو شۊخی شەنگی هەقق ئافەریدەت
یە گشت قەسەم بان، بە جققەی عەباس
هەرچی مەواچوو، پەنەم واچە ڕاس
وە دڵخوازیی وېت، ئەی حوری لەقا
ڕازیت، بە حەیدەر، یام بە پادشا
[1]