ناو: جەوهەر
نازناو: جەوهەر غەمگین
ساڵی لەدایکبوون: 1934
شوێنی لەدایکبوون: #هەولێر#
$ژیاننامە$
ناوی تەواوی (جەوهەر ئەبابەکر) ە، ساڵی 1934 لە شاری هەولێر لە دایک بووە، تەمەنی (8 بۆ 9) ساڵان بووە هاتونەتە هەولێر و لە گەڕەکی (گۆمە پیس) نزیک تەکییەی شێخ عەبدولکەریم نیشتەجێ بوونە، ئەو کاتە لە هەولێر (3) قوتابخانەی سەرەتایی هەبوە (ئولا - ثانية - ثاليثا) و چوارەمیشیان تا پۆلی چواری هەبووە (ئیبن مستەوفی) ، ساڵی 1943 چووەتە قوتابخانە و بۆ ساڵی دووەم ماڵیان دەچێتە تەیراوە و گواستراوەتەوە قوتابخانەی (ئیبن مستەوفی) و پۆلی چوارەمی تەواوکردووە و پۆلی پێنج و شەش لە قوتابخانەی (ئولا) تەواو دەکات، دواتر کە دەچێتە ناوەندی لە ماڵەوەیان ڕۆژانە دە فلوسی پێدەدەن ئەوەیش بە هەفتانە ئەمیش کۆی کردووەتەوە و مانگانە (ڕیوایات هیلال) هەبووە بە سەد فلس لە پەرتووکخانەی (سەربەستی) کە خاوەنەکەی (مەلا ڕەئوف) بووە لەو پەرتووکخانەیە دەیکڕێ، ساڵی 1954 دەستی بە نووسین کردووە، ساڵی 1957 دامەزراوە، ساڵی 1982 تا 1993 پارێزەری کردووە، ساڵی 1993 بووەتە بەڕێوەبەری گشتی دیوانی وەزارەتی کشتوکاڵ و دوای ساڵێک کراوە بە ڕاوێژکار تا خانەنشین بووە، نازناوی غەمگین لەوەوە هاتووە کە گەورەترین غەمی کورد و کوردستان و دابەشکردنی وڵاتەکەی بووە، باوکی هۆی سەرەکی بووە بۆ ئەوەی ببێ بە نووسەر و شاعیر، هەر چەندە باوکی نەخوێندەوار بووە بەڵام زۆر ئاگاداری مێژووی بنەماڵەکانی کورد بووە وەکوو بنەماڵەی بەدرخانییەکان و ماڵی شێ عوبێدوڵڵا و ماڵی سمکۆی شکاک و شێخ مەحمودی نەمر و بنەماڵەی بارزان، واتە ئەو بنەماڵانەی ڕێبازێکی کوردایەتیان هەبووە هەوڵیان دبووبوو نەگەیشتبوونە هیچ بۆی گێڕاوەتەوە لە هەمان کاتدا باوکی زۆر بە زەوق بووە هەموو ئەو بەیت و لاوک و شتانەی لە کوردەواری هەبووە هەمووی لەبەر بووە، باوکی دەنگی خۆش نەبووە بەڵام بە نزمی حەقایەتی بەسەرهاتەکانی بۆ گوتوە لە شەوانی زستان ئینجا غەمگین هەڵساوە دەستی کردووە بە تەجروبەی نووسین، ئەو شتانەی تا ساڵی 1955 نووسیویەتی گیراوە و هەموویان دەستیان بەسەردا گیرا و بردویانە چیرۆکێکی هەبووە شیعری زۆریشی هەبووە بەڵام لەو شیعرانە کە لە ساڵی 1954 و پێشی ئەو ساڵەش کە لەسەر (مەلیک فەیسەڵ) ی نووسیبوو (9) مانگ حوکم دراوە، شیعرەکەش کە ئەوەندەی لەبیر مابووە کە دەڵێت:
گوێ بگرە فەیسەڵ ئەی دوژمنی گەل
ڕاوچی بێ ئایین خوێن مژی مەل
مامۆستا کەسێکی شەرمنە و شیعرێکی لە ساڵی 1960 نووسیوە و دەڵێت:
چەندە لاواز و لەڕم
هێندەش کوشتومی شەرم
بەم لاواز و لەڕیەش
دڵ وەک کونەی ئاو تەڕم
ساڵی 1957 بەشداری شانۆگەری (شەهرەزاد) ی کردووە بە مەبەستی کۆمەک بۆ لافاوەکەی شاری سلێمانی ئەوەبوو (200) دیناریان کۆکردەوە و هاوکاریان کردن، غەمگین لە هەولێر یەکەم کەس بووە لە ساڵی 1960 هۆنراوەی بۆ نەورۆز نووسیوە و لە (ژین) بڵاوی کردووەتەوە کە لە هۆنراوەکە دەڵێت:
بەهارە وەرزی گوڵان
جەژنی دار و درەختان
بەهەشتی سەر زەمینە خاکی جوانی کوردستان
غەمگین لە قۆناغی ناوەندی بووە حەزی لە بۆینباخێک بووە لای دوکاندارێک چاوی پێکەوتووە بەڵام پارەی نەبووە بیکڕێ بۆینباخەکە بە چوار درهەم بووە واتە (200) فلس، بۆ ئەوە بە وەستایەکی قوڕکاری سواقدان گوتوە بیبات بۆ ئیش لە ڕۆژی هەینی وەستاکەش بردویەتی، بۆ ئێوارە چوار درهەم ڕۆژانەکەی وەرگرتوو بۆ ڕۆژی دواتر بۆینباخەکەی کڕی،
بەداخەوە شاعیر و نووسەر جەوهەر غەمگین لە 24-02-2012 بە ڕووداوی ئۆتۆمبێل کۆچی دوایی کردووە،
پەرتووکە چاپکراوەکانی: (شێرۆش کوژرا؛ کۆمەڵە چیرۆک و وتار) (خاک و ڕۆژ و خۆشەویستی...کۆی شعرەکانی) (فتاۃ المشرب... ڕۆمان عربی) (ذات الجمال الدافئ....کۆمەڵە چیرۆک و شعر عربی)
چەندین شعر و کۆمەڵە چیرۆکی ماوە بە چاپی نەگەیاندووە،
نموونەی شیعری:
چاوەکانت دەریان ئەنجامی خۆلێدانیان بێگومان خنکانە
هەمیشە من خۆزگە ئەخوازم کە خۆمیان لەناو بخنکێنم
گەلێ جار هێدمە دەمگری و دەڵێم خوایە دەست بە باڵمەوە بگرە
تاکوو بتوانم دوو وشەی خۆشەویستی بە گوێدا بچرپێنم
دەبا گەردەلوولی ئاخی خۆم وەها بمهێنێ و بمبا خوایە
هەتا خۆم لە گەردنی یارم وەکوو لاو لاو بئاڵێنم بئاڵێنم. [1]