باخچێوە بېگەرد
نویستەی: میرزا ئۆلقاڎرو پاوەی
بەشۍ: هەشتا و چوارەمە
حەلیمۍ (ئەڎای شۊتیە)و محەمەدی، دمای وەرگېرتەی نام و نیشانی. لوا پەی یانەو عەبدولموتەللیبی، ئاڎیچ خوڵکەش کەردەو ماچۊ:
واتش: تیفلێ هەن، چوون دانەی گەوهەر
بەڵام، یەتیمەن، نە دارۊ پدەر
وە قەبیلەی سەعد گرد ئیزهار کەردەم
هەر ئېڎ چوون نامش، وە یەتیم بەردەم
واتشان: یەتیم عوقوبەت، دارۊ
فائېڎەش نېیەن، پەی ئېمە ئارۊ
ئومېڎم ئېدەن، تۊ بەریش وەلای وېت
یەقین، نەفعی خاس، جەو مەیاوۊ پېت
حەلیمەی سەعدیە دمای قسەکا عەبدولموتەللیبی ماچۊ: من ئاماڎېنا ئی تفڵەیە گېرو وۍ، بەڵام مەشۊم مەشوورەت کەروون بە شوەکەیم، دمای یاونای هەواڵەکەی بە مېردەکەیش، ئاڎییچ ماچۊ من لاریم نېیەن، پیایانە و مەردانە ڕازی بی.
حەلیمە واتش: لېت نەبۊ، زەحمەت
بشۊم بە شووهەر، کەردم مشوورەت
حەلیمە لوا، تا وە لای شووهەر
واتش: تیفلێ هەن، نەدارۊ پدەر
نمەز چېش کەردم، هەنی جە لای کەس
جەی شارە، تیفڵێ، نەیاوام بە دەس
شووهەر وات: حەلیم چوون نېیەن دەلیل
بشۊ ئەو یەتیم، باوەر، وەتەعجیل
مەبادا، یۊتەر، ببەرۊش، پەی وېش
جەودما، پەی تۊ، ببۊ بە ئەندېش
حەلیمەی سەعید، جە گشت ئەقارب
تا شیی وە یانەی، عەبدولموتەلیب
واتش: شووهەرم ڕوخسەت، دان وە پېم
ئامام، محەمەد، بەرۊم، وە لای وېم
عەبدولموتەلیب، حەمدی حەقق کەردش
حەلیم، وە یانەی، ئامینە بەردش
یاوا، وە لای ئەو خاڵدانەی فلفل
ئامینە، چوون دیش، خەندان بی چوون گول
چەنی حەلیمە، موبەت، نمانا
موبارەک باڎیی، ڕای سەفەر، وانا.[1]