باخچێوە بېگەرد
نویستەی: میرزا ئۆلقاڎرو پاوەی
بەشۍ سەڎ و دوەمە
دمای دوعاو نزاو واران وارای، خەڵک دەسوەشیشان جە باباو محەمەد(عەبدولموتەلیب)ی کەرد، ئاڎیچ جوابش دێوەو ماچۊ
جواب داوە، ئەلحەمدولیلا
موتەلیب واتش: پەناه بە ئەڵڵا
خوڎاوەند عالەم لوتفش تا سەر بۊ
ئینشاڵڵا، مەبۊ، بەندە پەروەر بۊ
جە کەعبەی شەریف، موراجەعەت کەرد
دیسان حەزرەتش، چەنی وېش ئاوەرد
خوڎاحافیز کەرد، جە لای قەومو خوېش
تا، یاوا، بە لای، حەرەم، سەرای وېش
عەبدولموتەلیب وېش پەشتی حەزرەت
فیشتەر، جە فەرزەند، مەکەرۊ، مەکرەمەت
دە نەفەر فەرزەند، بەر گوزیدە داشت
جەوانانی، خاس، پەسەندیدە داشت
هەر دە برادەر، بە شاڎیی و تەرەب
حارث، عەبدوڵڵا، هەم ئەبولەهەب
مەقسووم، زرار، زوبێر، غالیب
عەبباس، حەمزە، هەم ئەبوتالیب
خسووس، عەبباس، مەردی مەیدان گیر
شېری بۍ ئەندېش، دڕندەی دلېر
بېغەیر، جە حەمزە، عەبدوڵڵا و عەبباس
شەهیدانی پاک، زاتی حەقق شوناس
باقی بە حەزرەت، ئیمان ناوەردەن
گرد بە کافریی، جە دنیا مەردەن
بەڵام، ئەو سەردار، قەبیلەی قوڕەیش
عەبدولموتەلیب، بوزورگی خۊش عەیش
دایېم، پەی حەزرەت، وە بۍ مدارا
وېنەی دیڎەی وېش، نیگاش مەدارا
مەنزورش، مەداشت، بە دیڎە و بە دڵ
ساتێ حەزرەتش، نمەکەرد، غافڵ
نە جامەی خاودا، ئەو شای پەڕ وېقار
کەس یاراش نەبی، بکەردش بېدار
هەر حەزرەت مەشیی، وە دەوانی دەو
مەکەردش، بېدار، ئەو جە شیرین خەو
ئەر جە حەرەم بۍ، ئەر جە خەڵوەت بۍ
هەر حەزرەت، جە لاش دایېم مەحرەم بۍ
دایېم، هەر سوجدەی محەمەد، مەوەرد
هەر موشاهەدەی، ئەعجازش مەکەرد
مۊبەتی ڕەحمش، نەک وېنەی فەرزەند
هەردوو دیڎەی ئەو، مەوەردش سەوگەند
پەرێ تەفاخور، دەوری زەمانە
موتتەسیل جە لای، خوېش و بېگانە
دایېم، هەر سەنای حەزرەتش مەکەرد
بە موعجیزەی ئەو، سەوگەندش مەوەرد
مەوات: محەمەد دین و دنیامەن
دمای من هەر ئەو، جاداری جامەن.[1]