#سەیدی هۆرامی#
وەختێ بادی عەترئامېز مەیاوۊنە لاو صەیدی، عەترو زوڵفان و گوڵشەن و یارەکېش مەلۊنە دەماخش، ئیتر صەیدی وېنێوە ناسک و جوان مەکەرۊن پەی بادی عەترئامېزۍ، کە بە (عەتار ) نامېش بەرۊن.(دیارەن عەتار بە کەسێ واچیان کە باروو عەتری و بۊی وەشش پەنەبیەن و ورەتەنش).
بادی عەترئامېز لاو صەیدیۆ بەڼڎ نمەبۊ، بە تەعجیل مەویەرۊ و مەشۊنە ڕوو بە دەشت و کۊو سارا.
وەختێ بادی عەترئامېز عەترو زوڵفان و یارەکېش مجۊ ملوو دەشت و کەش و سارایرە، ئیتر گوڵان خېزیان پەی عەزمی داوا
سا کە بۊی عەترت بە گوڵان یاوا
گوڵان خېزیان پەی عەزمی داوا.
بادی عەترئامېز و صەیدی، بە یاوایش بە دەشت و دەرو گوڵزاری، گردش پەشېونێ و کۆتۍ ماتەم گېرتەی و ئارەق و شەرمەزاریشان متەرە، چونکم هیچکامشان بۊی عەترو زوڵفانیشان نیەن.
تەنیا داواشان هامشانی زوڵفان و یارەکۍ صەیدیەن.
سەرەنجام بەشەشان ماتەمی و شەرم و پەشېوی بی.
بادی عەتر ئامېز، بادی عەتر ئامېز
بادی گوڵشەن گەرد، بادی عەتر ئامېز
پەيک بەری عاشق، نيمه شەوان خېز
بۊی نافەی تەتار، نه ڕووی سارا ڕېز
چوون عەتار به چين زوڵفی يارەوه
ئاما به بۊی عەتر عەنبەر بارەوه
پەرسام ئەی عەتار، يه چېش بارتەن؟
وات: «بۊی عەتری زوڵف گېسووی يارتەن»
به تەعجيل ويەرد نەکەرد مودارا
شی نه ڕووی دەشتو کەشو کۊو سارا
ساکه بۊی عەترت به گوڵان ياوا
گوڵان خېزيان پەی عەزمی داوا
«سونبوڵ» چەنی تيپ «وەنەوشه»ی باخان
«چنوور» نەپای هەرد «شەوبۊ»ی سەرشاخان
قيبلەم تاسەحەر گوفتوگۊشان بۍ
داوای هامشانی زوڵفی تۊشان بۍ
ئاخر داواشان «تانو پۊش» نەبۍ
هيچکام بۊی عەتری زوڵفی تۊش نەبۍ
«سونبوڵ» ماتەم بی بەزاری و خەمناک
«وەنەوشه» جه شەرم، سوجدەش بەردەن خاک
«چنوور» پەشېو بی، دڵ به دەردەوه
«شەوبۊ» شەيدا بی، شەو وه هەردەوه
فيدای زوڵفت بام ڕەندی جەمين لاڵ
زوڵفی تۊ بازاڕ گوڵان کەرد بەتاڵ
نەک سەودای زوڵفت خاسەی گوڵانەن
سەرمايەی داوای دەردی دڵانەن
ئانه کام دڵەن وېش به دڵ زانۊ
جه سەودای زوڵفت پەشېو مەمانۊ؟
ئەر «شېخ» ئەر «مەڵڵا»، ئەگەر «دەروېش»ەن
سەودای زوڵفی تۊ، گرد عالەم پېشەن
«صەيدی» چوون جه داخ تای زوڵفت وېڵەن
سادارو سەرسام بيابان گېڵەن
ساکه دېوانەن، ئېدەن تەگبيرش
تای زوڵفی سيات بۊ به زەنجيرش.[1]