د. نەسرەدین ئیبراهیم گولی
کوردێن #خۆراسان#ێ ژ بەرەبابێن ڕەسەنێن کوردانن و کەڤناتیا وان بۆ هزاران سالێن بەرى نوکە دزڤڕیت و ژێدەرێن دیرۆکى ب هندەک نەوێرەکى و خەمساری ڤە گەلەک ژ دویندەهێن کوردان یێن کو دەستهەلات بدەستێ وان بوویە د سەردەمێن جودا جودایێن دیرۆکى دا بۆ وان دزڤڕینن. هەتا کو دهێتە گۆتن ئمبراتۆریا ساسانى، یا کو نێزیکى چارسەد سالان دەستهەلاتا وەلاتێن ئارییان و دەڤەرێ دگێڕا ب ڕەچەلەک کوردێن خۆراسانێ نە و ژ ناڤدارێن دی ژى ئەبو موسلمێ خۆراسانی یە، کو ب ژناڤبرنا خەلافەتا ئەمەوییان دەرگەه بۆ خەلافەتا ئالێ عەباس و عەباسییان ڤەکر، لێ عەباسییان پشتى وێ قەنجیا مەزن وەکى گەلەک کەس و جارێن دی نمەک حەرامى کر و مەنسۆر خەلیفێ وى سەردەمى ئه و ب شێوەیەکێ دڕندانە و ژ پشتڤە و ب خەنجەران پارچە پارچە کر. هەرچەندە کورد ل وێرێ کەڤنن، لێ د سەردەمێن جودایێن دیرۆکى دا. پشتى هینگێ گەلەک کورد یێن ژلایەنێ دەستهەلاتا پاشایەتى بۆ وان جهان هاتینە ڤەگۆهاستن و دبیت ئێک ژ وان گەڕان کوردێن دەڤەرا بەهدینان و بۆتان بن کو ل سەردەمێ سەفەوییان هاتینە ڕاگوهاستن بۆ خۆراسان. دبیت مەبەستا سەرەکى ژ وێ چەندێ خوە قورتالکرن ژ شۆڕەش و ڕاپەڕینێن وان بن، چونکى هۆزێن شەڕکەر و مێرخاس بووینە و زۆلم ژ کەسێ قەبیل نەکریە و ژ لایەکێ دی ڤە ئه و وەکى مەتالان بۆ بەرسینگێ تۆرانیێن بەردەوام هێڕشى وەلاتێ ئیرانێ دکر و ب باشترین پێگهۆڕ هاتینە زانین.
ل (3/11/2016) ل کەنالێ ئەسمانیێ ڕووداو و ل دەمژمێر (6)ى ئێڤارى د ناڤ نووچەیێن کوردستانا ڕۆژهەلات دا ئاماژە ب کەسەکى ب ناڤێ (کەریم الله توکلى) هاتەدان، کو وەک کوردەکێ ڕەسەن و خەمخۆر ب سەدان چالاکى و بەرهەمێن کوردەوارى کەلتۆرێ زەنگین و جوانێ کوردیێ ل دەڤەرێ یێ پاراستى.
ناڤبرى چەندەها پرتووک دەربارەى کوردان و دیرۆکا وان ل سەر خەرجییا خوە چاپ و بەلاڤ کرینە. ئەوى ب دەهان سالان ژیانا خوە بۆ ڤێ چەندێ و مەبەستێ تەرخان کریە. د تەلەڤزیۆنێ دا من ب چاڤێن خوە هەمى (باغێ کوردان) بەرهەمێ نالبەندێ هۆزانڤانێ دەڤەرا مە د تاقچکا وى دا دیتن. وى ئاماژە ب هندێ دایە کو ب چەندین سالان د ناڤ گوند و کوونێن دەڤەرێ دا و ل ناڤ خەلکى و پیرەژن و پیرەمێرێن کو نە زمانێ تورکمانى و نە یێ فارسى نزانن و تنێ ب کوردیا کرمانجى دئاخڤن گەڕیایە، دا بشێت فەرهەنگەکا زمانێ کوردێن خۆراسان بنڤێسیت.
هەروەسا دگۆت ئەڤ مرۆڤە باشترین ژێدەرن بۆ دەینانا ڤێ فەرهەنگا چەند بەرگى ب شێوەکێ زەلال و دروست. دیارە ئەڤە هەمان ئه و هزرە ئەوا خودێ ژێ ڕازى مەلا مەحموودێ دێرشەوى د پرتووکا خوە دا ” مشتاخا چیا ژ گۆتنێن پێشیا” و ژ میرێ بۆتان “جەلادەتێ بەدرخان بەگى” ڤەدگێڕیت. دیارە ل وێ پارچا کوردستانێ ژى کەسەک یێ هەى دڤێت هیڤیا ڤان نەمران و گەلەک دوستێن کوردان و کرمانجان و باب و باپیرێن مە بجه بینیت، لێ وەکى وى ب خوە دگۆت ژبەر نەبوونا شیانێن پارەى ئەڤ کارە یێ مایە نیڤەرۆ، هەر چەندە وى ئەوێن پێشکشى کوردستانیان و پێشمەرگەى کرین. چەوا کەسەک یان حکوومەتا کوردستانێ ڤێ خەونا مەزن بجه نائینیت و خوە ل وى ناکەتە خودان و ب ئینانا قەچاغى یا بەرهەمێن وى وان ژ ناڤچۆنێ ناپارێزیت، نەخاسمە حکوومەتا ئیرانێ ڤێ گاڤێ وەکى مارگەستیەکى و ژ کەربێن سەرکەفتنێن کوردان دبیت نەشێت دەستێ خوە بگەهینیتە کوردستانێ، بەلێ دشێت تۆلا خوە ل کەریمۆلاى و بەرهەمێن وى ڤەکەت. بۆچى ل کوردستانێ هندەک خوە ب خەمخۆرێن کوردستانێ و زمانێ کرمانجى و هۆزان و ئەدەبیاتا کوردى دزانن و دوهى نان نەبوو بخۆت، نوکە دێ شێت بۆ کۆڕێ خوە یێ ساڤا ترۆمبێلەکا فوول مۆدێل بکڕیت، بەلێ نەشێت چەند پرتووکا بۆ خزمەتا وى زمانى چاپ و بەلاڤ بکەت؟ پا ئەڤە چ کوردپەروەریە؟ پارێ ڤى وەلاتى بۆ خزمەتا ڤى نەتەوەیە نەکو بۆ زارۆکەکى ب تنێ. پا کەنگى ئەڤ توخمە مرۆڤە دێ ڤێ دیاریا بۆ کوردستانیان و پێشمەرگەى هاتیە پێشکشکرن گەهینیتە وان؟ هەکە بەڕێز تەوەحودى مر و دوژمنان دەستنڤیسێن وى دزین و ڤەشارتن و سۆتن؟؟!! تو خودێ نەمخابنى پارێ وان وەکى یێ سەدامێ گۆڕ بگۆڕ و ژ کیستێ خەلکى کۆم ببیت و پاشى وەکى یێ وى ل بن ئاخێ و ل جهێن ڤەشارتى و ل بەنکێن ئورۆپى بمینن و بەرزە ببن و یان سوبەهى بچووکێن وان نەدلسۆز و نەکوردپەروەرێن درەوین ب ڤى پارەى بسەر دا بچن و ببنە فەلیتە و یاریا ب کوردستانیان و کۆڕێن شەهیدان بکەن، ئەوا هوین ئەڤرۆ ب بابێن وان دکەن، و سامانێ کەلتۆرى و فەرهەنگا مە هۆسا ل بەر پێیان بچیت و زانایێن مە ژ بەر پارەى نەشێن چاپ و بەلاڤ بکەن و خزمەتا کوردستانێ بکەن؟ بخودێ شەرمە و هەتک بەریە و زۆرداریە و ژ زۆرداریا بەعسێ کێمتر نینە!
* بسپۆرێ زانستێن پێداگۆگى و پەروەردەیى/فاکۆلتییا پەروەردە/ زانینگەها زاخۆ.[1]