$فیلمی جۆکەر و مەرگی عیشق$
#ڕێبین ئەحمەد ڕەشید#
ئارثەر فلیک کە ناڕەزایەتی خۆی بەرانبەر جیهان دەردەبڕێت دەڵێت: لەم جیهانەدا ئیدی کەس کەسی خۆشناوێت. ئەم دەربڕینەی ئارثەر مەترسییدارترین و واقیعیترین ڕستەی فیلمەکەیە کە دواتر شەرعیەت دەداتە ئەوەی شارەکەی بەیەکجار وێران بکات. گەر سەدەی ڕابردوو لە ڕێگەی ڕۆمانەکانییەوە تۆڵستۆی پێی گوتبین عیشق لەکوێبێت خوداش لەوێیە، ئەوا ئارثەر فلیک بە فیلمێک پێی وتین کە عیشق نەما شەیتان حاکمی موتڵەقی عەرشەکەیە. گەر من ئەوفیلمەم بەرهەم بهێنایە ئەو ڕستەیەم بە گەورەیی لەژێر تایتڵی فیلمەکەوە دەنووسی.
ئەریک فرۆم باوەڕی وایە ئێمە لە دونیای نوێدا ناتوانین کەسێک یا شتێکمان خۆش بوێت تا خاڵێکی هاوبەشی نێوان خۆمان و ئەو کەسە یا ئەو شتە نەدۆزینەوە. بە واتایەکی دیکە من ناتوانم عاشقی شتێک یا کەسێک بم تا هەست نەکەم ئەو کەسە یا ئەو شتە لەخاڵێکدا پەیوەندی بە منەوە هەیە و وەک من وایە. هەر ئەمەیە وادەکات ئێمە بەردەوام بە چاوی نەیار و دژ لەوانە بڕوانین کە پێچەوانەی ئێمە لە دونیا دەڕوانن، بیردەکەنە و ژیاندەکەن. هەر ئەم بیرکردنەوەیە لە عیشق کەسێکی وەک ئارثەر فلیکی تەواو بێگانە کردبوو لە کۆمەڵگاکەدا. دایکی منداڵەکە نەیدەهێشت ئارثەر پەیوەندی لەگەڵ منداڵەکەیدا ببەستێت، چونکە هیچ خاڵکێی هاوبەشی لەنێوان خۆی ئارثەر و منداڵەکانیدا نەدەدۆزییەوە تا عاشقی بێت، بە پێچەوانەوە ئارثەری پاک دونیایەک خاڵی هاوبەشی لەنێوان خۆی و منداڵەکەدا دەدی. هەر ئەمە وایلێکرد هەوڵی پەیوەندیی بەستن لەگەڵ ئەو منداڵەدا بدات. کاتێک عیشق ڕێگای نۆرماڵی خۆی ناگرێت و پەروەردەیەکی درووست ناکرێت دەشێت ببێت بە ڕقێکی ئەوەندە بەهێز شارێک بە خۆیەوە بسوتێنێت و جیهانێک درووستبکات ئیدی کەس کەسی خۆشنەوێت.
هەر یەکێک لە ئێمە لەم دونیایەدا بە جۆرێک عاشقین، عیشقی باش و بەرگەگر ئەو عیشقەیە کە مەعشوقەکەی باشە، عیشقی خراپیش عیشقێکە کە مەشوقەکەی خراپە. گەر قسەکەی ئەریک فرۆم وەک دەستکەلایەک وەرگرین بۆ خوێندنەوەی دۆخی جۆکەر ئەوا ئێمە ناتوانین مەعشوقی باش بدۆزینەوە تا خۆمان باش نەکەین، چونکە دواجار مەعشوقی ئاوێنەی ویست و ئیرادەتەکەی نێو ناخی خۆمانە. عیشق هونەرە، وەک هەر هونەرێکی دیکە ڕاهێنانی باش و ئیرادەی بەهێزی دەوێت دەنا کۆمەڵگایەکی هەیەجانیی و وا درووستدەکات کە تێیدا کەس کەسی خۆشنەوێت.
ئەگەر عیشق بریتیی بێت لە بەخشینی ڕۆژ و شەوەکانت بە شتێک، سیستمێک یاخود کەسێک ئەوا هەر یەکێک لە ئێمە بە جۆرێک عاشقی کەسێک، شتێک یا جۆرە سیستمێکی دیاریکراوین. گرنگە ئەو کەسە یا ئەو سیستمە بەقەولی مەحوی لە پاداشتی ئاهی گەرمتدا قسەی ساردت نەداتەوە، کە بەرقت تێگرد بەردت تێنەگرێت. بە پێچەوانەوە گەر جۆکەریش بیت، لەبری ئەوەی قاقا بە خەڵک لێدەی بە شێوەیەک دەیانگرێنیت یەکەمین گریانی پاش لەدایکبوونیان وەبیر بهێنیتەوە.
لە ڕۆژێکدا هەریەکێک لە ئێمە بە جۆرێک ژیانی خۆمان بەدەستی خۆمان دەبەخشێنە شتێک، ئەو شتە چییە وا دەکا تەمەنی خۆمی وەک مۆم بۆ بتوێنمەوە؟ کارەساتەکە ئەوەیە ئێمە خۆمان خەرجی شتێک دەکەین زۆر جار نازانین ئەو شتە چییە. ئارثەر نەیدەزانی لەپێناو چی و بۆچی دەبێ بسوتێت. هەموو یەکێک لە ئێمە لەم دونیایە عاشقین، تا ئێرە کێشە نییە ئەوەی دەبێتە کێشە ئەوەیە ئایا مەعشوقەکانمان گەورە و جوانن یا بچوک و بودەڵە. چیرۆکی ئارثەر چیرۆکی عاشقێکی وێڵ وسەرگەردان بوو بە شوێن مەعشوقێکی نادیاردا. دایک کە نموونەی عیشقی باڵا بوو بۆ ئارثەر لە بەجێهێنانی ئەرکێک زیاتر نەبوو بۆی، نەیدەتوانی عیشقی پێبدات.
سیستم، پارە ، سەرۆک، کورسی، ناوبانگ، لەجۆری ئەو مەعشوقە خراپانەن وەک مۆرانە بەردەبنە گیانی مرۆڤ و دواتریش پێنەزانانە بەبێ ئەوەی سوودێکیان هەبێ بۆی پشتی تێدەکەن. کاتێک هێز و قودرەت تێکەڵ بە عیشق دەبن جگە لە ئەژدیهایەکی مەترسیدار نابێ چاوەڕێی هیچ بکەین.
مرۆڤ تاکە بوونەوەرە لەسەر ئەم ئەستێرەیە کە خاوەنی عەقڵە، ئەو بوونەوەرێکی بە ئاگایە لەخۆی و غەیری خۆی لە هاوچەشنەکانی، بە ئاگایە لە ڕابردووی و لە ئەگەرەکانی داهاتووی. ئەم ئاگاییە وەک شتێکی دەرەکییە بۆ بوونەکەی. ئاگاهی لە تەمەنە کورتەکەی، لەوەی بێ مەیل و ویستی خۆی هاتووە و بێ ویستی خۆشی دەڕوات، دەرکی ئەوە دەکات کە دەبێت پێش عەزیزانی بڕوات، یا عەزیزانی بە بەرچاوی ئەمەوە بڕۆن. وەک ئارثەری جۆکەر بەدەرکە بەرانبەر تەنیاییە قووڵەکانی، بەرانبەر دەرگیر بوونەکانی لەگەڵ کۆمەڵگا و سرووشتەکەی دەوری، ئەم هەموو بوونە لێکترازاوە یەکێتیی وجوودەکەی ئەم پەرت و هەپرون بە هەپرون دەکەن، بوونەکەی ئەم بۆ زیندانێکی تەحەمولنەکراو دەگۆڕن. گەر بێتو خۆی لەم زیندانانە ڕەها نەکات و خۆی لەگەڵ دونیا و مرۆڤەکانی دەرەوەیدا کۆک و یەک نەخات دەبێ چاوەڕوانی شێتیی خۆی بە شێوەیەکی حەتمیی بکات. بۆ ڕزگاربوون لە تەنیاییە قووڵەکانی جۆکەر زۆر هەوڵیدا تەلی سازەکەی خۆی لەگەڵ دونیاکەی دەرەوەی کۆک بکات بەڵام کۆمەڵگاکەی دەرەوە بەردەوام ڕەتی دەکردەوە و دەیکردەوە دەرەوەی خۆی، تا ناچار ئیدی پەنجەرەی زیندانە تەحەمولنەکراوەکەی شکاند و شێتیی و کەیئۆس و شڵەژانە نێوخۆییەکەی گواستەوە بۆ دەرەوەی خۆی. کاتێک کۆمەڵگا نەیویست ئەو وەک خۆی قەبوڵبکات، ئەم کۆمەڵگای بە ناخە شڵەژاوەکەی خۆی ڕەنگڕێژ کرد.
جۆکەر بەشوێن یەکەین تەجرەبە عاشقانەکانی خۆیدا دەگەڕا بەڵام دەستی نەدەکەت، هەموو دەرگاکانی بەڕوودا دادەخرا. تەنانەت عیشق دەربڕینی بۆ منداڵێکی پێ ڕەوان نەدەبینرا تا ناار ڕستە مەرسیدارەکەی وت:لەم جیهانەدا ئیدی کەس کەسی خۆشناوێت. جۆکەر ئاگاداری قۆناخی دوای عاشقبوون نەبوو. یەکەمین تەجرەبەی عاشقبوون زۆر جیاوازە لە بە عاشقی مانەوە دوو کەس کە یەکتر ناناسن بەڵام بڕیار دەدەن دیوارە کۆنکرێتییەکانی نێوانیان تێکبشکێنن و نزیکبوونەوەیان دەگاتە تێکەڵابوونی هۆرمۆنیی. وردەوردە جیاوازییەکانیان، خەشم و توڕەبوونەکانیان، ماندبوونی کار و پیشەکانیان ئەو دڵگەرمییەی یەکەم بینین تێکدەشکێنێت. ئەوان ئەو شەیدابوون و ئاشیفتەبوونەی یەکەمجار بۆ یەکتر بە سەنگی مەحەکی پەیوەندییەکە دەبینن، لە کاتێکدا ئەم شێتبوونە بۆ یەکتر لەوانەیە هەیەجانێکی کاتیی یا ڕاکردن بووبێت لەو تەنیایی و پەراوێزخستنەی کە تێیکەوتبوون یەکەمجار. کۆتایی ئەم پەیوەندییە هەیەجانییە بە تێکشکان و دابڕان دەگاتە ئەنجام. هۆکاری سەرەکی ئەم وردوو خاش بوونە بە قەولی ئەریک فرۆم بە ئاسان زانینی عیشقە لەکاتێکدا عیشق هونەرە وەک ژیان دەبێ چۆن دارتاشی و پزیشکی و مۆسیقا فێری دەبیت بەهمان کلۆج فێری هونەری عیشق ببیت. جۆکەر لەوەدا بەهەڵەداچووبوو کە پێی وابوو بە ئاسانی دەشێت عیشق ببەخشێت و عیشقییش وەرگرێتەوە. [1]