باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و هەژدەهەمە
خەولە، گېڵاوە پەی لاو حەزرەتی، هەواڵەکېش یاوانا پەنە، حەزرەت جاری دووەم خەولەش کیاستۆ، فەرماواش: عەرزو ئەبوبەکری بکەرە: هەتا عائیشە نەیاوۊ تەمەنو بلووغی، وەسڵ نمەبۊ.
خەولە هەم دەرسات سفارشات بەرد
مەتلووبات یەکیەک عەرزی حەزرەت کەرد
فەرما هەم بشۊ ئیتمینان کەر لېش
واچە ئەبوبکر هیچ نەبۊش ئەندېش
نەک خۊ برای شیر یەک ڕایا وەرین
جە دینی ئیسلام گرد برادەرین
جایزەن نیکاح عەقدی ئەو دوختەر
جوبرەئیل حوکمش ئاوەردەن جە سەر
وەگەر هەم ماچۊ مناڵەن هاڵا
لازمەن عومرش بشۊ وە باڵا
خوداوەند جە سەر وېش دان ڕوخسەتش
مەوقووفەن ویساڵ تا بلووغەتش
خەولە فەرمایېش پاکی پېغەممەر
یاونا بە سەمع سیدیقی ئەکبەر
وات: بشۊ عەرز کەر بە مەحرەمانە
تەشریف باوەر و بە بەندەخانە
شای شەفاعەت خواه سالاری مەحشەر
تەشریف بەرد بە لای سیدیقی ئەکبەر
عەقدی عائیشە سیدین مەکەردەن
پەی موبارەکی شیرینی وەردەن
عەرووسی ئەو شای شېوەی شیرینە
جە دمای سێ ساڵ کۊچی مەدینە
بادا مەوقووف بەو ئەمر ئەو جاری
تاکە ڕوو بکەین هەم وە لای کاری.[1]