کوشتەی محەمەد یوسف سانی، به دەسو مەنوچەرسانی

وەختێ عەلی مەدان سان کوڕو حسێن سانی کۊچی دمایېنش کەرد، کوڕەکېش (مەنوچەرسان و خانەبەگ و عومەر بەگ) دەسشان کەردەوە بە جەنگ و ئاژاوۍ. ئڼە ئازێو چەمنەتەرسۍ بېنۍ، کەس نەتاوۍ وەراوەرشا مدرۊ، پەوکەی زیاتەر یاخیۍ بیۍ.
شەوەو ویس و نۊهەمو مانەگەو ڕەمەزانی موبارەکینە، ساڵەو (1798ز) ، هېزێ فرەشان گلېرکەردۆو، جە دەگاو نۆسوڎېوە ڕوەو دەرەویان و چاگەیچۆ ڕوەو کەشو (ڕاستەبان) ی کۆتۍ ڕا، وەڵتەریچ هەواڵو لێرەسەختی و یاخی بېیەی ئاڎییشا، یاوابۍ بە محەمەد یوسف سانی، پەوکەی شەو و ڕۊ ناغافڵۍ نەبېنۍ جە چواردەورو وېشا، زیاتەریچ پاڵو پردەو (کەڕاوا) ی. پا تەرزە گرڎ شەوێ، گرڎ ڕوێ جە بېدارینە بېنۍ، بەڵام بە ئامای جەژنۍ جیای وەشی، یانەوېرانی بی بە مېمانشا. شەوەو جەژنۍ پاسەبانەکۍ واتشا سەوای جەژنەنەو زەحمەتەن پۍ جەژنۍ هېرش کەران، پەوکەی گرڎ لوێوە یانەو وېشا، قەرەۋڵگا و پایەگاکېشا چۊڵۍ کەردۍ، بەڵام نیمەشەوەنە کتوپڕ لەشکر سەرو پردەکېرە ئاماو دەگاشا تۆقەدا، لوێ وەربەرەو یانەو ئەسکەڼەرسانی.
دەگاو (کەڕاوا) ی یەرۍ گەڕەکۍ بۍ، گەڕەکەی سەرینە و وارینە و دلېڕاسینە، یانەو ئەسکەڼەرسانی گەڕەکەی وارینەنە بۍ، بە ناچاری ڕەما، چن کەسێ کۆتۍ شۊنیش کە یۊشا نامېش (شیلاقە) بۍ، وەختێ یاوا پاڵو ڕوخانەو سیروانی ئەسکەڼەرسان و شیلاقە یۊشا ئەشناساوە، چا وەختەنە شیلاقە بە ئەسکەڼەرسانی ماچۊ: شیلاقە نە ئیلاقە، یانی (من شیلاقەنا کارم بە تۊوە نېیەن) ، تەوەنێش هۊرگېرتەو شۊنیشەرە وستەش دلۍ ئاوەو سیروانی. هامڕێکېش دەنگو شڵپەو تەوەنەکېشا ئەژنی، شیلاقە لاشکەردۆو بە هامڕاکاش ماچۊ: هەرکەسێ بۍ، تەرسەو ئېمەنە وېش وست دلۍ ئاوەکۍ و خنیکیا، پا قسۍ خەڵەتنێش.
هاوار و ناڵە بەرزبیۆ، محەمەد یوسف سان یانەنە زیارەو چەنی حەسەن داباشی کۆتۍ دلۍ کەمینەو دژمەنی، بە خەنجەرۍ پەلامارەشا دێ، محەمەد یوسف سان کۊشیا، هەژدە یاگېوە زامڎارکریابۍ، شاڼزە یاگە خەنجەرۍ و دوۍ یاگە گرۊڵیۍ، یانەو حاڵشا تاڵانۍ کەردۍ. ئا قۊمیا ساڵەو (1798ز) ڕوەشدێنە.
دمای تاڵانی کەردەی کەڕاوای، لەشکرەکە گېڵاوە و یاوا (بارام ئاوا) ، حەسەن بەگ کوڕو بارام سانی (دوەم) شا جە کۊشتەی محەمەد یوسف سانی هاگاڎار کەرد.
حەسەن بەگی لۊمە کەردۍ و ماچۊ کارێ ناڕەواتان کەردەن، ئەشیێ پا تەرزە نەکوشتێتا، هەرچن ئاڎ خراپەش چەنی شمە کەردەبۍ، شایەنو ئا سزێ نەبۍ. تاڵانکەردەیش وەسېبۍ، گەر ئەسکەڼەرسان زیڼەبۊ، ژیوایتا تاڵ کەرۊ و دلېتانه بەرۊ.[1]