باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و پەنجا و یەکەمە
هوزو خەزرەجی بەردەوام ئایینو ئیسلامی وەڵاکەرېنێ، ئا کارەشا بی بە مایەو تووڕەیی سەرخېڵو ئەنسارەکا کە نامېش سەعد بن مەعاز بۍ، ئاڎ سەروکاری و پېوەڼییش چەنی کافرەکا فرە وەش بۍ، تەڵەبش کەرد کە مەشۊم ئەسعەد ئیبنی زەرارە جە شارو مەدینەی بزیۊوە، چونکم خەڵکش بە دینی تازەی ئاشنا کەردەن.
خەبەر وە لای سەعد بن مەعاز یاوا
ناڵا جە غەرەز هەرتاکە تاوا
پەی چېش، ئەو ڕەئیس قەومی ئەنساربۍ
دایېم هەواخوای ئەهلی کوففار بۍ
شېری مێڎان گیر، مەردی ئازما بۍ
بەیداغی مەردیش دایېم وە پا بۍ
ڕەنگش جە غەرەز سیا بیی چوون قیر
تەڵەب کەرد ئەمیر شیری بن خوزەیر
فەرما کە ئەسعەد ئیبنی زەرارە
مەبۊ جەی مەکان ببۊ ئاوارە
مەردی غەریبیش بەو تەور ئاوەردەن
زەعیفانی قەوم گرد جە ڕاە بەردەن
ئەر سیلەی ڕەحم نمەبۍ مانیع
ئەرواش جە بەڎەن مەکەردم قاتیع
ئەلعان شۊ وە لای ئەو بکەر گوزەر
جەی کۊنە ئەفعال زەجر مەنعش کەر
ئەمیر حەربەی وېش گرت بە دەستەوە
جە حەرارەی مەرگ هەوای مەستەوە
ڕەوان بیی نە ڕاە چوون ئاتەشپارە
تا یاوا بە لای ئیبنی زەرارە
ئەمیر جە غەزەب خوڕا وە مەسعەب
واتش: ئەی غەریب هورزە بۍ ئەدەب
پەی چېش ئامانی وەی ماواو مەنزڵ
دینی قەدیمت گرد کەردەن باتڵ
عاقڵانی قەوم گرد خەفی کەردیی
ئەهلی ولایەت وە تەنگ ئاوەردیی
مەسعەب وات: ئەسیر حاڵزانی ماڵی
تۊ شەخسی مەعقول ساحیب کەماڵی
ساتێ بۊ بنیش گوشدەر وە عەرزم
وە سەدای نەغمەی داودیی تەرزم
ئەر عەرزی بەندەت قبووڵ کەرد بە دڵ
خار جە لات یەک یەک گرد مەبۊ وە گوڵ
وە ئەگەر مەکرووﮪ وە تەبعی تۊ بی
حەرفم بۍ قانوون ناپەسەند جۊ بی
چونکە ڕافیعم فەرمان دریان پېم
وە هەر تەور ئامام مەشوم نە ڕای وېم.[1]