دەسەڵاتو خالید سانی کوڕو بارام سانی دوەمی جە هۆرامانەنە.

وەختێ سەلیم پاشا، خالیدسانش کەرد بە فەرمانڕەواو هۆرامانی، چن کەسێش چەنی بېنۍ پېسە پیاکاش و هامڕێکاش، پەوکەی هەواڵەکە بە زوویی یاوا بە بەگزادەکا گەناوی، کە نزیکەو هەزار کەسا بېنۍ، دمای ئەژنیەی هەواڵەکەی دە پیێ ماقوڵۍ، چەنی سەڎ تفەنگچیاشا کیاستۍ پەی لای سەری دوڵەو کەڵومی تا سەرەڕا جە خالیدسانی گېران، خالیدسان بە خەبەرەکەیش زانا، ئاڎییچ نزیکەو حۆت نەفەرا پېسە هاجیار وجامی و چن کەسێ تەرېش وستۍ وەڵۍ وېش، قەڵاو کەڵومینە تفەنگچیەکۍ گیریێنە یوترینی و جەنگ قۊمیا، حۆت نەفەرەکۍ خالیدسانی زاڵۍ بیۍ ملوو سەڎ نەفەرەکەیرەو ڕاوەشا نیێ، بە قەدەرو خوڎای پیێکۍ نەزەرعەلی سانی هاجیار و جامیشا کوشتۍ و کوڕەکەو هاجیاری نەما تفەنگەکەو تاتەیشو وېش یاونا لاو خالیدسانی، چەنیەی کوشیاو تاتەیش پەی خالیدسانی باسکەرد، بە ئەژنەویەی هەواڵەکەی، خالیدسان تەمیارە، سوپێوەش کیاستە پەی سەرو بەگزاڎەکا (ڕوار) ی و چاگە هۊرشکەندۍ و یاوێ قەڵاو حەسەن ئاوای.
خالیدسان لەشکرێ دوەهەزار تفەنگچی و سەڎ نەفەر سواری ڕوەو کوردستان (سنە) ی کۆتېڕا، پەی ماوەو یەک مانگی عەباس قولی خانی ئەردەڵانیش جە شارو سنەی توقە دا، وېش دەسەڵاتو شارو سنەی بەرېڕاوە، داواش جە عەباس قولی خانی کەرد: کە (میهر عەلی سان و خەسرەو بەگ) ش تەسلیم کەرۊ، تا جیاتی ۋنەو بارام سانی تاتەیشەنە هەقە چاڎییشا پسانۊ، خالیدسان جە گرد فەرمانڕەوا و سانەکا هۆرامانی بەهېزتەر بېیەن، سەرەمڕە هەزار و پەنجسەڎ تفەنگچیېش ئاماڎۍ بیېنۍ، سەڎ سوارۍ بە کامڵ تفاقۆ، چڼەها ئەسپۍ عەرەبیۍ، کە گردشان ئاماڎۍ جەنگی بیېنۍ.
حەیدەر بەگی بەڵخەی پیاو خالیدسانی، واڵێوەش ژەنەو موسابەگو ئەردەڵانی بیېنە، خالیدسان موسا بەگش کەردەبۍ بە جاگیرو وېش جە (نۆسوڎ) ە، جاروبار موسابەگ بە سەردای ئۍ پەی لاو خالیدسانی، وەختێ خەڵکو شارەزووری بە سەردای ئېنۍ پەی لاو خالیدسانی، خەڵاتو دیاریۍ ئارېنۍ پەیش، موسابەگ بەخېڵیش پەنەبەرۍ، داخیېنە بە سڵېمان پاشاو بابانیش واتەبۍ کە خالیدسان خەریکو شەراب واردەی و هەتیم بازین، فرە تومەتۍ ناڕەوێش وستەبۍ پاڵ، قەسەمش پەی واردەبۍ، پۆکەی ئاڎییچ قەرارش دابۍ کە مەشۊ خالیدسانی دلېنەبریۊ و کوشیۊ، ئەحمەد بەگ و مەحمود بەگی براش ڕاسپارێ پەی ئا کارەیە، کیاستېش پەی شارەزووری، وەختێ یاوێ خورماڵ، دەسشاکەرد بە ڕاوکەردەی، پیێشا کیاستۍ شونەو خالیدسانی، ئاڎییچ چەنی یەرۍ کەسا ئاما، پەی ماوەو یەرۍ ڕوا خەریکۍ ڕاوۍ بېنۍ، ڕۊی دمایین، پیێکۍ خالیدسانیشا تۆزېعو یانەکا کەردۍ، خالیدسان وېش تاق مەنۆ، سەرو نانو وېرەگایۆ قوڵبەس کریا.
چونکم هیچ گوناحێ شکەنەبەرۍ وېشەنە، خەفەتباربی، هیچ تەقەلێوەش نەڎا پەی وۍ ڕزگارکەردەیش، دمای یەرۍ شەوا بە قوڵبەسیایی داشا دەسو حەیدەر بەگو بەڵخەیۆ، ئاردش پەی ملەگاو چناری جە بېیارۍ، بېسفەتانە جە تاریخو (1756ز) نیشانېش گېرت و کوشتش، وېش بی بە فەرمانڕەواو هۆرامانی.[1]