نامە شېعریێ میرزا ئۆلقاڎری پەی (خەستە) ی شاعېری.
دیارەن نامەکۍ میرزای پەی خەستەی، جوابەن بە نامێوە خەستەی کە وەڵتەر کیاستېنەش پەی میرزای (نامەکەت یاوا جە تۊی پەردەوە) ، میزا پاسە تاریفۍ خەستەی مڎۊن کە ئەولادو پېخامئاوەرین، یانی سەییدەنو جە نەوەو موبارەکو حەزرەتین، میرزا تەکلیفش وەنەکەرۊن کە جە قاپی خوڎای دۊعاش پەی کەرۊن، بەشکووم بە لەیلۍ شاڎ بۊن، چونکم ئاڎ پیا خاسەن و باباش محەمەدەن (د.خ) .
سەییدی بەرحەق نەتیجەی پاکان
سەرقەتارەی جەم جەرگەی حەکاکان
شېویای شنۊی شەوق شېوەی لەیل
تاویای نەتاو توای تاوە مەیل
ئەولاد ئەشرەف خاتەم پېغەمبەر
سەربەرز دیوان زەمزەمەی مەحشەر
دانای دوڕشناس خەواس لاڵان
(واسیف الوجود) ڕەعنا غەزاڵان
نامەکەت یاوا جە تۊی پەردەوە
دڵ نە هیجرانان خەلاس کەردەوە
ئافەرین ئوستاد دەوای ئېش دەرد
وجوودم کامەن بوانوت هام فەرد
هەی هەی جە نامەی شۊخ مەرغوبت
ماشەالله جە فەرد شیرین مەتڵوبت
فەرمابېت جە ڕووی بزورگەواری
هەڵای نەدیەنت مەیل دڵداری
پەی فەسڵ پاییز غافڵەی خاوان
فەرد تۊ ڕاسەن خاست فەرماوان
بەڵام ئه و ڕۊ من ئامام بە وجوود
دەروون داخ بېیەن چەنی ئاخ و دوود
پۊس ڕووی ڕوخسار زەوقم مەردەبۍ
چمان سەڎساڵ مەشق عەشقم کەردەبۍ
من هەر جە توفڵی ڕەزمم ئاوردەن
گیان توفەیل بەرای ئازیزم کەردەن
هەر ئه و سازانام حاڵ دڵداران
بەین دڵداران چەنی دڵداران
ئیستە تۊ واڎەی ئېشی دەردتەن
سەروەختی گېڵای هەرده و هەردتەن
جە ڕووی لوتفەوە کەمتەرین وېت
جای هانات زانان سەرم بۊ فدېت
چوون نەمەندەن پېت تاو و تەوانا
لاڵ بام ئەومنت ئاوردەن هانا
من خۊ یەند ئېشم نە دەروون بەردەن
دڵ سەنگ‌ئاسا بەڵ خەمان ئاوردەن
یەند ئاڵشت دەرد وە باڵام وەشتەن
یەند جورعەی ژاراو بۍمەیلیم چەشتەن
یەند خەواڵوی خاڵ خاویر لەیلم
پەی داد و تەدبیر هیچ نېیەن مەیلم
هەر ئېدەن تەدبیر سوجدە بەر نەخاک
ڕوو کەر نە قاپی حەی تەنیای تاک
واچە یا مەعبوود بینای بۍزەواڵ
شادم کەی وە دین لەیل سۆسەن خاڵ
چوون تۊ نەتیجەی حەق‌شناسانی
ئەولاد بۍ عەیب گردین خاسانی
جەددت ئەحمەدەن دۊعات مومتازەن
(ابن‌الکریمی) کەریم کارسازەن
بەڵ بەزەییشان بەیۊ وە حاڵت
مەرهەم دان نە ڕووی زام سەدساڵت
وەرنە چون (قاڎر) وېڵ زاخانی
تا قام قیام داخ داخانی.[1]