قیبلەم بیناییم...
میرزا ئۆلقاڎر، ئڼە دووری و هیجرانوو ئازیزیش دیەن، غەرغەرەو مەرگی لاشۆ پېسەنە جەژنۍ، ئاڎ گلەیۍ جە وېش کەرۊن کە چەنی بەبۍ ئازیزیش ژیوان، چەنی تەرکو لەزاییزیش نەکەردەن، مەعلووم جەسەی من هەر جە سەنگ بېیەن، جە بېوەفایی ڕەفېقم نېیەن، من وەفام کامەن، وەفا وەفای تۊن، بویەر جە من گەر سەڎ خەتێم کەردېبا، من وېم نەزرەو باڵاو یارۍ کەردەن، گەر تۊ نەزرەت کەردېنە، با گەردەنتەنە نەمەنۊ، ئانە من حازرەنا، بە شمشېرو بروات شەقم کەران، مووچە مووچەم کەران، هەر پلێم بڎان بە ڕاویەرێ، ئانەیچە گرد بە خاترەو دڵدایۆ ئازیزیش.
قیبلەم بیناییم قیبلەم بیناییم
بۍ تۊ لېڵاوەن نووری بیناییم
جە بۍ شەرتی شەرت جە بۍ وەفاییم
هەر لایەق وە دەرد دووری و جیاییم
سا من وە بۍ تۊ ژیام نەمەردم
تەرک لەزایز دنیا نەکەردم
چۊن واچوون داروون وەفای تۊ نە دڵ
وەفام چەنی مەیل بڕېزۊ نە گڵ
مەعلووم نەزان‌حاڵ یا هەرزە مەشقم
مەعلووم نابەکار ڕای شاری عەشقم
مەعلووم سزاوار بەڵا و کۊسەنان
دۊزخی دۊزەخ دووری دۊسەنان
مەعلووم بېبەینەت بۍ تان و بۍ پۊم
ڕوو زەرد کەعبەی ئاسانەکەی تۊم
مەعلووم جەستەی من هەر جە سەنگ بیەن
جە بېوەفایی ڕەفېقم نېیەن
وەرنە جەی هیجران نەهانی سەربەس
مەشیا سەر تا پام بویا وە قەقنەس
یا وېنەی مەجنوون لونگ و عاسایە
بپۊشام وە تەن، بشیام وە جایە
بکەفتام پەی وېم چەنی بار خەم
ڕۊشنی دنیام هەر نەڎیام وە چەم
قەیس‌ئاسا مەدهۊش سەرمەست نە ڕووی خاک
نە مایېل بە جوع نە مەیل بە خۊراک
نەکەردام ڕەنگێ دەنگێ چەنی کەس
سەفای سەودای تۊم هەنی وەسەن وەس
ئیسە گا خۊراک گا سەیر ئاوەن
گا بەزم ئارای شەو ڕاحەتی خاوەن
ئەر سەد جەستەکەم گشت زەدەی زامەن
هەی خاکم وەسەر وەفای من کامەن
وە بەینەت قەسەم شای بەینەت‌داران
یەند بۍ بەینەتیم جە حەد ۋیاران
یادم خەجاڵەت یاد تۊ بېیەن
جە یانەی یادت ڕووی یادم نېیەن
دوورەن جە گەوهەر خەزانەی لاڵت
مەحرووم جە ڕاِزان ناز خەیاڵت
بەدبەختەن حەفوی نەفس ئەمارە
لاعارەن دڵەی سیای سەد پارە
کۊر بۊ چەمەی چەم ئەسرین پەروەردەم
لېڵاو بۊ دیڎەی خه و گوزەر کەردەم
وەفای من چېشەن شەرت و بەینم کۊن
فدای وەفات بام وەفا وە فای تۊن
تۊ بویەر جە من ئەرسەد خەتام بۊ
سا من وېم کامم تا وەفام کام بۊ
جە زەڕەی کەمتەر بېقەرارەنان
نەزەری نەزر باڵای یارەنان
ئەڵبەت نەزرێوەت جاری هەر کەردەن
حەیفەن تۊ نەزرت مانۊ نە گەردەن
قبووڵ بۊ نەزرت نۊنەمام نۊ
ڕوح من خاسەن پەرێ نەزری تۊ
فەرمان دەر نەزرێ باوەران پەرېت
شەقم کەن وە سەیف ئەبرۊی تاق وېت
مووچە مووچەم کەن یەکسەر وە جارێ
هەرپلێم بدەن وە ڕاویارێ
من خۊ کوشتە نیم سەرئەنجام کار
زووتەر خاستەرەن مەنزڵگەی مەز‍ار
با من سەرئەفراز تۊیچ وە سڵامەت
نەبی وە قەرزار قەرز قیامەت
یاری ئازیزم جەمین جام جەم
وە نوور تەلعەت شېوەی تۊ قەسەم
جەی سەودای عەشقت کارێ پېم ئامان
تانە مەڎان لېم ئەهل کەم فامان
ئەر تۊ بۋینی چە تەور ئامان پېم
زەحمەت بشناسی بزانی من کېم
مەر حەق ئاگا بۊ جە ئەحواڵ من
گەور کۊ نەبۊ جە ئەحواڵ من
باز وەی جەستەوە لاحەول مەوانوون
وېم وە کەم وەفا و بېشەرت مەزانوون
ئەوەند سەفرای دەرد سەودای تۊم وەردەن
چوون جەژنەن جەلام غەرغەرەی مەردەن
ئەو هەر کۊ مەڎیۊ شېوە شېوەی تۊن
دنیا توڕەی زوڵف لوول لېوەی تۊن
ئەر باغەن ئەر چەم ئەر دەشتەن ئەر کۊن
هەر نەقشی قامەت زەڕستوون تۊن
ئەر سوبحەن ئەر شام ئەر شەوەن ئەر ڕۊن
خەیاڵ هەر خەیاڵ وەفا و مەیل تۊن
بازاڕ هەر بازاڕ پارچەی مەشق تۊن
قماش هەر قماش کاڵای عەشق تۊن
هەنی بەتاڵەن مامەڵەی یاران
سەر مەڎان وە سەنگ باقی نازاران
قەستم ئیرادەم ئیخلاسم تۊنی
خەیاڵم خۊراکم تۊنی
قیبلەم قیبلەگای بەرهەقم تۊنی
ڕۊحم ڕەوانم بەرهەقم تۊنی
شیوەنم شادیم شعوورم تۊنی
شەوق تەجەلای کۊی توورم تۊنی
ڕاحەتی جەستەی ناچارم تۊنی
شفای ئېش دەرد ئازارم تۊنی
گوڵم گوڵ ئەندام گوڵ باغم تۊنی
سەرمایەی شاڎیی دەماغم تۊنی
نەرگس بۊی نەوخېز نسارم تۊنی
وەنەوشەی وەش‌بۊی وەهارم تۊنی
تاعەتم زکرم ئەورادم تۊنی
سەروی ساپەروەر ئازادم تۊنی
دنیام دینەکەم ئیمانم تۊنی
زندەگی ئافاق جیهانم تۊنی
قووتم زوخ زام قنیاتم دەردەن
فەردەکەی مەعدووم سەرمەشق فەردەن
تەنیای حەقیقەت نەردێ بشانۊ
من و تۊ جە دەس من و تۊ سانۊ
ئەروا و دیڎە و دڵ گرد بیان بەیۊ
نەک چوون من و تۊ من من بام تۊ تۊ
تۊ بی تۊ مەیلت منش مەنزوور بۊ
من بی من ڕۆحم پا نە حزور بۊ
دەخیل ئامین کەر حاڵ‌زان حاڵم
باخەبەر جە دەرد سفتەی زوخاڵم
فەڵەک تاریکەن ئەوقات تاڵم
شه و چرای دیدەش باوەر وە ماڵم.[1]