فیدای سنعت بام
بەشۍ دوەمە
دمای ئانەی حەزرەت تەریقەو نەقشیش بە سەوقاتی جە لاو خالقیشۆ پەی ئاما، ئاڎییچ بەخشاش بە یاوەرەکاش، دەس بە دەس یاوا لاو ئیمامی عەلی، خەڵاتەکەش وەرگېرت، ئا خەڵاتە، خەڵاتو زیکرو پاکبېیەیۆ دەروونی، ساف کەردەی دڵەکا. ئاڎییچ وەزناشەرە پەی کوڕەکاش (حەسەن و حسێن) ، هەر پا تەرزە ڕابازو تەریقەتی نەقشی یاوا بە سینەو (حەسەنی بەسری) .
سینە بە سینە وەستەرە، تا یاوا بە (مەعروفی کەرخی) ، چاڎیچیۆ پەی (جونەیدی بەغدادی) .
هەی فیدای حەسەن بادەنۊشش بام
فیدای شای حسەین جگەرگۊشش بام
فیدای ماباقی ئیمامانش بام
جە ڕوژی مەحشەر دەس دامانش بام
یاڕەسول الله سەییدی سادات
شای قاب قەوسەین حەییی کائینات
هەرچی خوداوەند کەردەنش ئیجاد
شەجەر تا حەجەر خاک و ئاو و باد
سەڎ هەزار واچوون پەڕ بۊ ئەفلاکت
سەڵەوات وە دین دیڎار پاکت
هەم وە ئەهل و بەیت شازاڎەی وەڵین
ئەولاد و ئەسحاب یەک یەک ئەجمەعین
کوڵ جە سایەی تۊ بەهەشتەن جاشان
ببەخشەم وە تۊز خاشاک پاشان
جه و دەم شېخ حەسەن شای بەسری مەقام
جەلای شای مەردان هەر سوب تا وەشام
سلووکش کەردەن بە دیڎە و بە دڵ
تا کەشفش تەمام پەرېش بی حاسڵ
جە فەیز حەزرەت شای دڵدڵ‌سوار
کەشف شېخ حەسەن تەمام بی ئیزهار
فەرما ئەی فەرزەند (عزیزالوجوود)
مەستی بادەی حەق پادشای مەعبوود
ئەی جورعەی میوەی وەش تام، وەش‌بۊ
وە ئیزنی حەزرەت ها بەخشام وە تۊ
مازوون بی بە بەش خوڎا یارتەن
پیری تەریقەت نیگادارتەن
حەسەن سەر وەخاک پای حەیدەر ساوا
وە یەک چەم زەدەن وە بەسرە یاوا
دەس کەرد وە تەبلیغ ئیرشاد یاران
ئیسم بوزورگیش ۋیەرد جە شاران
جەودما وە حوکم تاک تەنیای فەرد
ئەویچ وە حەبیب عەجەمی سپەرد
حەبیب جە دنیا لابەرد سیایی
بەخشاش وە سەیید ئەولاد تایی
دیسان ئه و سەروەر شېخ بوڵەند حاڵ
بەخشا وە مەعروف کەرخی کەرخی ماڵ
ئاخر شېخ عەزیز موستەفا یانە
دڵی وېش پەی تیر کەرد وە نیشانە
تا مەلای جونەید بەغدادی ماوا
جەرگەی عاسیان تەمام شکاوا
جه و هەم گوزەرکەرد چوون شەوبۊی وەهار
تا جەلای شېخی شبلی گرت قەرار
شیخ (عبدالواحد) جەلای ئه و بەردش
ئامېتەی خەیاڵ سالیکان کەردش
شېخ (ابوالفرج) جە دمای چن ساڵ
تا بەردش تەمام کەردش سەنگ لاڵ
جە لای شېخ یوسف تەمام بی قەسدش
ئەسڵ ئه و مەتڵەب یاوا بە دەستش
ئېڎ هەم بە تەوفیق پادشای باری
بەخشاش وە عەلی شېخ حەکاری
شېخ ئەبوسەعید یولغاردا پەرېش
وە قووەی باتن بەردش پەرێ وېش
باز هەم ئەو سەروەر وە میهرەبانی
سپەردش وە دەس غەوس گەیلانی
بەنا کەرد بە مەشق عەشقی ئیلاهیی
نشت وە بان تەخت جەلال شاهیی
وە ئیزن مەعبوود دەهەندەی داوەر
سەنگ مەکەرد وە ئاو، ئاو مەکەرد وە بەڕ
وېش پەنهان مەڎا جە شېخان دەور
گا جە بېخ ئاو، گا جە پەنای هەور
ئایېر دا دەروون بۍ ڕەحمی شاهان
لەرزە ۋست نە جەرگ زومرەی گومڕاهان
ۋشک مەکەرد شەتاو سەرچەشمەی تافان
بەتاڵ کەرد بازار کەشف کەشافان
غەوغا ۋست نە عام چوون (یوم‌المحشر)
تازە کەردەوە دین پېغەمبەر
جە هیند تا وە چین عەرەب تا عەجەم
ژنیا کووس نام شای (غوثالاعظم)
هەرکەس بېئەدەب ئەر بەردا نامش
دەرسات مەکنیا سەر جە ئەندامش
نەدەریای بېپەی وە پەنجەی ئەنوەر
ماهی بوریانش بەر ماوەرد وە بەر
دمای تەناول پیشە و پەڵاکەش
وە نفووس هەم ڕوح مەکەرد نە لاشەش
جا مەواتش (قُم) ماهی باز مەوەرد
مەشی وە دەریا بازی وېش مەکەرد
گا چەنی فیرقەی وەحشیان کۊ
گفت و گۊ مەکەرد وېنەی من و تۊ.[1]