میرزا ئۆلقاڎر، ئی جارە هانا بەرۊن پەی پیرێ کامڵی، پیرێ کە مەولەوی بە (مورشیدی میراو سەرجۊی بادەی لەیل) وەسفش کەرۊن، پیرێ زانا، دانا، عارف، زاهید، سەرمەشق، حەزرەتو شېخ عومەرو بېیارۍ.
میرزا، شا عومەری بە غەواسو گەنجو دەریاو شەریعەتی مزانۊ، بە میرای عەدلو سەرجۊ هەقیقەتی، دنیا چوون کەشتی، ئاڎیی بە لەنگەر مزانۊ.
یا پیر کامڵ
یا پیر کامڵ، یا پیر کامڵ
یا پیر پیران، یا پیر کامڵ
یا دەوای شافی ئېش و نېشی دڵ
یا گوشایەندەی عوقدەی هەر موشکڵ
یا دەسگیر دەس دەسەپاچان گشت
یا پەنا و ئەمداد فرقەی پەست و زشت
یا قەندیل نوور جە پا تا وە فەرق
یا شوعلەی شەریف شەوق شەمس شەرق
یا کەلام خاس خاسان سەروەر
هانا هەر وە تۊن هانا یا عومەر
یا سەرحەڵقەی فەڕ سەر خەتمان پاک
یا ئاگا جە حاڵ مەحبووسان خاک
یا سەردار پاک گرۊی بۍ‌عەیبان
یا ڕەفیق ڕای ڕجالولغەیبان
یا بارەگای بەرز شای زیائەدین
یا ڕۊشنی بەخش سەما و سەرزەمین
یا قوتبلمەدار جەرگەی ئەتقیا
یا قوتب ئیرشاد سەدرە ئەولیا
یا سەربەرز ڕۊی دیوان مەحشەر
هانا هەر وە تۊن هانا یا عومەر
یا حکومەت بەخش وە زومرەی شاهان
یا مەعزول نمای گرۊی جەم جاهان
یا حەکیم د ەرد جەستەی بیماران
یا شەفای ئازار دڵ پەڕ جە خاران
یا غەواس گەنج دەریای شەریعەت
یا مەلاح مەوج بەحر تەریقەت
یا میراو عەدڵ سەرجۊی حەقیقەت
یا سەیاح پۊرت موڵک شەریعەت
یا ساحیو ئیحسان مەدرەسە و مەنبەر
هانا هەر وە تۊن هانا یا عومەر
یا خەیرخای عالەم حاڵ زان حاڵان
یا دانەندەی تۊی پەردەی خەیاڵان
یا عالی هیمەت عەتا نمایان
یا قاپی بوڵەند کەرەم بۍ پایان
یا نەزدیک زات پادشای وەهاب
یا ڕەب قیبلەی دۊعا موستەجاب
یا سەرمایەی زەوق هەر بوود و نەبوود
یاغەنای وەحدەت (واجبەلوجود)
یا ستوون ساف دین پېغەمبەر
هانا هەر وە تۊن هانا یا عومەر
یا قیبلەی یەقیین شەرت و شۊن داران
یا ئەرباب دین تاعەت گوزاران
یا موتەسەڕف شار گشت دڵان
یا مەشغەڵ یاد جەرگەی غافڵان
یا ساحیب کەمەند سەرکەشان وە کېش
یا ئاهەن ڕووبای شا و گەدا ودەروېش
یا فەرمان فەرمای بزورگەواران
یا سپاسالار سوپای دینداران
یا کیمیاگەر خاک وە یەک نەزەر
هانا هەر وە تۊن هانا یا عومەر
یا جای غەریبان تورک و هیند و چین
یا سەلاحەت خوڎای بەین موسلمین
یا مەئزوون خاس جە کارخانەی حەق
یا ڕەد ئافەت قەزای موعەلەق
یا سامع جە سەوت زکر ئەشجاران
یا وەحشی پەروەر نە پای موغاران
یا بۍ مەرتەبان وە ڕوتبە یاوان
یا جەرگەی ناپاک حاسدان تاوان
یا دەست قودرەت پادشای ئەکبەر
هانا هەر وە تۊن هانا یا عومەر
تەیر تەیارەی کەیوان هەفتەم
فریشتەی شەریف پای عەرش ئەعزەم
شارەزای ئەوزاع مەکان لاهووت
ئاشنای ئەحباب جەرگەی مەلەکووت
شاباز شش‌دانگ ڕووی ئەوج هەوا
میهمان مەنزڵ سەدرەلمونتەها
تەماشای ئەسرار خەت لۊح کەردە
ڕا وە پای ئەعلا علین بەردە
باخەبەر جە ڕەمز گرد قەزا و قەدەر
هانا هەر وە تۊن هانا یا عومەر
سا کەسێ چوون تۊ خوڎا یارش بۊ
موحەممەد دایېم نگەدارش بۊ
سدیق ئەکبەر ڕاهنمای ڕاش بۊ
جەناب عوسمان پەشت و پەناش بۊ
ئەتباعش تەمام گرد هەرولی بۊ
سەرکەردەی ئەفواج سوپاش عەلی بۊ
نەعالەم جوویای قەتع نەزەر بۊ
بەخوڎا کەس نېیەن مەر شاعومەر بۊ
سەڎ شاهد جە خاک سەر مارۊ وە بەر
هانا هەر وە تۊن هانا یا عومەر
ئەمیر نزام شیراز تا وە شام
(شیخلمەشایخ) دایەرەی ئیسلام
شاسوار غەیب دایېم ۋېنەی بەرق
گا جە دەشت غەرب، گا جە قولەی شەرق
(عالم‌العلوم) جە مەه تا ماهی
(مجمع البحرین) فەیز ئیلاهی
هەوای نەفس چنی نەفس ئەمارە
دوژمن فەنا کەر وە یەک ئیشارە
دنیا چوون کەشتی تۊ وېت چوون لەنگەر
هانا هەر وە تۊن هانا یا عومەر
ئاخر هەر عومەر فەرمان دا وە نیل
عومەر بی ئیبلیس به و تەور کەرد زەلیل
عومەر بۊ جەهلش هەوا دا بە قار
شار داراش کەرد تەمام بەختەسار
عومەر بی (زەیدەش) وە ئەسیر ئاوەرد
ئەبووسوفیانش شکستە باڵ کەرد
عومەر مەدینەش وە زۊر کەرد ئاوا
ئاوازەی عەدڵش وە گەردوون یاوا
عومەر موحکەم گرت پەشت پېغەمبەر
هانا هەر وە تۊن هانا یا عومەر
عومری بۍعومەر بەتاڵەن یاران
ئه و عومرەن جە لای عومەرو یاران
بۍ عومەر عومرت بو وە باد مەدەر
فایدەش نېیەن عومر بۍعومەر
بۍ عومەر عومرت فانی بزانە
عومر بۍعومەر عومرش مەوانە
شووە لای عومەر وە پەشت پەردە
تازە کەر هەم عومر عەبەس ۋیەردە
بەڵکم بنوازۊت وە یەک نیم نەزەر
هانا هەر وە تۊن هانا یا عومەر
فدات بام یا شېخ نادرەی نامی
فازڵ تەر جە شېخ قوتب بەستامی
موددەی عومر وېت هەر چیت فەرماوان
فەرموودەت یەک‌یەک وە ئەنجام یاوان
نووری خوڎایی وە باڵات وەشتەن
چەنی سەحابان ماوات بەهەشتەن
ئوستاد ناصیح قوتب زەمانە
پیر بۍ نەزیر ئەسڵ کارخانە
موخبیر جە ئەفلاک نه و تاق ئەخزەر
هانا هەر وە تۊن هانا یا عومەر
خۊ خاس مەزانان سۊفیان ساف
یا شرەی جەزبەت یاوان وه کۊی قاف
سالکان یەکسەر شاهدان سەف سەف
دەس کېشای پەی شار جامعەی نەجەف
خان عەسکەریت کەرد، خەبەردار جە خەو
زەربەی سەنگیت دا وە پشت پای ئەو
سەراسیمەوار وە دڵ زەبوونی
خەیلێ تەواسا نەزاناش تۊنی
چن خەیاڵاتش نە دەروون ئاوەرد
تا فەریزەی فەرز سۊفی ئەداکەرد
جه و دما تۊ وېت وە ئه و دای خەبەر
هانا هەر وە تۊن هانا یا عومەر
تېغ جەوهەرت ۋستەن وە کەساس
مەعریفەت کەردەن وە دانەی ئەڵماس
سەنگت کەرد وە لاڵ، لاڵت کەرد وە خاک
ئاهەن وە گەوهەر خاک وە تەڵای پاک
عولەمای فازڵ وە بۍ مودارا
کەردت وە عەوام چوپان سارا
کەردت بۍ زوان کەم فام خۊش بەخت
ساتێ مەکەریش وە ئەولیای وەخت
عالەمت ۋستەن گرد نە دەردیسەر
هانا هەر وە تۊن هانا یا عومەر
ئەگەر مەیلت بۊ سەحرا و دەشت و دەر
وە یەک نیم نەزەر مەبۊ تەڵا و زەڕ
هەر بۍ زوانێ وە زوبان وېش
مەکەری تەقریر گفت و گۊ چەنیش
وەختی ئېوارە گرد جمعە جاری
مەیان زیارەت کوڵ ئه و بېیاری
دیڎار پاکت بۋینان وە چەم
تاکە نەوینان جەفای جەهەنەم
وەحشیانت گرد کەردەن منەوەر
هانا هەر وە تۊن هانا یا عومەر
مەعلووم هەر کەسێ وە قاپیت یاوان
یانەی دەروونش وە فەزڵت ئاوان
فوزەلات کەردەن وە عەوداڵ بەڕ
دایېم بار وە لېو، چەم جە ئەسرین تەڕ
چوون جە بۊی فەیزت زەڕەی یاوان پېش
حەیرانەن دایېم وېش جە حاڵ وېش
سا بەشارەت بۊ پەی گرد عاقڵان
نەشئەی فەیز تۊن جە لای فازڵان
بۊی فەیزت مەڎۊ سارا و دەشت و دەر
هانا هەر وە تۊن هانا یا عومەر
چوون بېمەعرفەت تەمام ناخاسم
چەی وەرتەر نەبی زەڕەی ئیخلاسم
من تا ئیرادەت سەڎ فەرسەخ دوور بیم
تا واچی مونکیر هەم بېشعوور بیم
شوکر شوکرڵڵا میرزای خۊش تەحریر
تۊش کەرد وە سەیاڎ من پېکا وە تیر
ئەوەنە موناقیب فەزڵ تۊ وانا
خاستەر جە ئەوساف باروڵی دانا
بۊ وە بوزورگیت دەردم دەوا کەر
هانا هەر وە تۊن هانا یا عومەر
چوون دەلیل خەیر ڕەهنموونیم کەرد
تا ناماقووڵی وەرینم ۋیەرد
وېش خۊ جە خەفەت هەر سەرگەردانەن
دایېم چوون مەجنوون وېڵ هەردانەن
ئیسە فدات بام شای تەکیەداران
ئەولیای ئەیام مەعروف شاران
خەستەی سی بەڵام یەک جە یەک بەتەر
هانا هەر وە تۊن هانا یا عومەر
نەفس ئەممارە و دەین و ڕەزاڵەت
چېش کەروون سازات هەرسێ دەلالەت
جە زووخ زامان گڵ گوونەن بەرگم
چوون تووڵی بیدەن مەلەرزۊ جەرگم
دەینم پەرۍ دین زۊرش ئاوەردەن
دین جە زوڵم دەین فەرامۊش کەردەن
دینم بی وە کا، دەین وە بەرزی کۊ
دین نە چەنگ دەین چکۊ بەرمەشۊ
مەر هەر تەسرەف پیر پاک‌نەزەر
هانا هەر وە تۊن هانا یا عومەر
نەفس ئەممارە بەڎبەخت سەرکېش
هەر هانە خەیاڵ بەزم بادەی وېش
بېشک چوون فیرعەون دەورەی زەمانەن
شەیتان مەلعوون جە لاش ئامانەن
خۊ بۍ دەوڵەتیم با هەر بمانۊ
یەقین شېخ جە من خاستەر مەزانۊ
یە نەفس کافر گومڕای بەڎخەیاڵ
یە دەین تەنزیل یە ئەوزاع ماڵ
بنمانە لوتفێ چوون شای ئەسکەندەر
هانا هەر وە تۊن هانا یا عومەر
چوون ڕەعدی پەڕجۊش هەورە ڕەحمەتێ
جە ڕووی مەرحەمەت یا شېخ هیمەتێ
بەشق شابەها و غەوس گەیلانی
باجەتی بارگەی عوسمان سانی
پیر بۍ تاقەت بۍ زۊر و زاتم
بۊ جەی سی بەڵا بدەر نەجاتم
(قادر) تا زیندەن هەنی بەندەی تۊن
عەبد حەڵقەگۊش وە زەڕ سەندەی تۊن
جە بۊی فەیز وېت مەحروومم مەکەر
هانا هەر وە تۊن هانا یا عومەر.[1]