واتەو گۊشگېرتەی مېیاو ئاسمانی و زەمینی
بەشۊ دوەمۍ
زەمین دمای گۊشگېرتەی جە گوفتارە ناشیرینەکا ئاسمانی، ئیتر زاناش توشو تەکەبوری بییەن، سەرەتا وەرگیریش جە ۋېش کەرد، ماچۊ من خاکەنا، ئاڎەم (ع.س) جە منەن، من یاگەی پېخامئاوەرا و پیاخاسانا، شاهان گردشان مەنزڵەی کۊتاییشان دلۍ منەن، من تەماموو میوەهاتەکا و خوراکەکا پەی بنیاڎەمی بەرهەم ماوەروون، چا میوە خاسا (هەنجیر و زەیتوونەن) ، کە خوڎای تەعالا سەوگەندش پەنە ۋاردېنۍ، ئینجا مەگنۊ مۊچیاریکەردەی ئاسمانی، نموونەو ئیبلیسیش پەی مارۊۋە کە چەنی توشوو تەکەبوری بی، خوڎای گۆرە تۊقەو غەزەبیش ۋست نە گەردەن.
زەمین ئېڎ شنەفت وە چن جەهر و جەخت
لەرزا و ستېزا چوون زەلزەلەی سەخت
واتش هەرزەگۊ چەرخ کەم هونەر
چەبگەرد کەچباز بەڎخۊی بەڎئەختەر
تەعنە مەڎەی لېم بەڵۍ من خاکم
من جە خاکی ۋېم هیچ نېیەن باکم
خۊف خوڎاوەند نە دەروون داروو
عەیب (عاسیان) پەنهان مەداروو
جە گونا و (تەقسیر) دایېم سڕپۊشم
سەتار سەربەرز خاو و خامۊشم
قەترە جە دەریان یەکسەر جە لای من
وېنەی قەترەی ئاو جە دەریای بۍ بن
بېئەمری خوڎا نەکەردم ڕەفتار
وەرنە گونابار کەرۊم نگوونسار
شاهان گرد جە خاک بەردەن مایەشان
گرد جە سایەی خاک بەرزەن پایەشان
ڕۊزی مەخلووقات مەخفی و هۋەیدا
یەکسەر جە زەمین گرد مەبۊ پەیدا
ئەنواع و ئەقسام میوەی ڕەنگاڕەنگ
باقی نەباتات پاکیزەی قەشەنگ
ترشی و تاڵی و شۊر شیرینی و شەککەر
یەکسەر گرد جە خاک بەرمەیۊ وە بەر
خوڎاوەند قەدییم جە کەلام وېش
وە کۊی مەرحەمەت لوتف عام وېش
وە (تین و زەیتون) سەوگەندش وەردەن
جە (کور) سینا گفتوگۊش کەردەن
خسووس سەراوان پاکیزەی دڵبەر
زەراڵ بۍ عەیب ئاڵای (مُگهَّر)
بەر مەیۊ نە خاک مەوج مەدۊ وە هەم
پەرۍ زیندەگی ئەولاڎ ئاڎەم
نەواچی درۊ، یان ڕیوایەتەن
(ماءً طهورا) (نَصّ) ئایەتەن
گەنج جەواهیر خەزېنەی شاران
سوبات و مەعاش بزورگەواران
دەخڵش نە وە چەرخ نە وە ئەفلاکەن
یەکسەر جە هیممەت کیمیای خاکەن
تۊ حەیفەن ئەوەند بە ۋېت مەنازی
هەوا و (تەکەببور) پەی وېت مەسازی
(فیلجملە) زەمین ئەوەنڎە پاکەن
وجوود جەناب ئاڎەم جە خاکەن
ئاخر (ابلیس) هەم (تەکەببورش) کەرد
سوجدەی بەندەگی وە ئاڎەم نەوەرد
پەوکەی فەزڵ خاس خوڎا نەبەردەن
سەر تەوق لەعنەت بشیش وە گەردەن
سا تۊیچ ئەر وېنەی (ئیبلیس) ئەغیاری
جەناب ئاڎەم قەبووڵ نەداری
دال و بورهانت چېشەن بنمانە؟
قەبز و قەباڵەت باوەر بۋانە.[1]