بنەچەو بەگزاڎەکا هۆرامانی
بەشۊ ڼوزڎەهەمۍ

خەلاتەکەو فەرهاد میرزای پەی (زورابە کەچەڵی) :
دمای شکەستو سوپاو فەرهاد میرزای جە دەشتەو شېخ ئیبراهیمی، نزیک بە مەریوانی، بە دەسو تفەنگچیە هۆرامیەکا، تەماموو تەدارەک و ئازووخەشا دەسش سەرەرە گیریا، یۊ جە تفەنگچیە هۆرامیەکا بە نامۍ (زورابە کەچەڵ) ی دلۍ باهوڵو جلەکا فەرهاد میرزاینە دەسێ جلۍ شاهانۍ بەرمارۊن و کەرۊشانە و بە سیناریو لاسایۍ فەرهاد میرزای کەرۊۋە، وەختێ خەبەر مەیاوۊ لاو فەرهاد میرزای، فرە تووڕە بۊن، فەرمان مڎۊن هەر کەسێ بە زیڼەیی یان بە مەردەیی زورابە کەچەڵی یاونۊ دەسش، خەڵاتێ (100تمەن) ی و دەسێ جلۍئاوریشمیۍ گرانبەهێش پېشکەش کەرۊن، زورابە کەچەڵ وەختێ پا هەواڵەیە مزانۊ، یەکسەر مەگنۊڕا پەی (سنە) ی، ملۊ خزمەتو فەرهاد میرزای، پەنەش ماچۊ: جەنابت فەرمانت دان هەر کەسێ زورابە کەچەڵی بە زیڼەیی یان بە مەردەیی یاونۊ دەست خەلاتش کەرین، شازادەیچ واتەن: بەڵۍ، ئاڎییچی واتەن: دەی من (زورابە کەچەڵەنا) ، ئینا بە زیڼەیی ئامانا وەردەمت، داواکەرۊن ئا خەڵاتە کە فەرمانت دان بڎەیم پەنە، فەرهاد میرزایچ هیچش پەی نەمەنەنۆ، فەرمانش دان خەڵاتش کەران. گەر سەرنجە بڎەیمۍ چا عان و سەردەمەنە خەڵکو هۆرامانی بە ئیمانێ قووڵۆ پەشتیشا بە خوڎای و بە وېشا و کەشەکاشا قاییمە کەردېنە، هیچ سەنگێشا پەی دژمەنی داگیرکەری نەنیێنەرە.[1]