ناونیشانی هۆنراوە: گەڕان بەدوای نیشتماندا
هەڵبەست نووس: #حەمە ئەحمەد جاف#
دەستێک چەپڵەو...
دەستێکم پڕ لە (بەتاڵیی)
بەتاڵیی، تاڵ
تاڵ وماندوو
تاڵ، وەک ئیجەو...
حیکایەتی
بەهەزاران گەنجی خنکاو
ماندوو، وەک بڕستی ڕێگاو
مەرگی هەنگاو
(ئەو)
لە نیشتمانێکی
پڕ لەگیرفانی نەوسن و...
تێرەوە دێ
(من) و (تۆ) ش،
ڕووت وقوت و برسی!
(ئەو)
ئێوارەیەکی سەرخۆش و...
مەستی باڕو سەمای دیسکۆ
(من) و (تۆ) ش حەرەسی
سەنگەرێکی پێشەوەی پێشمەرگەو ...
شەمی شەوانی تەنیایی نیشتمان، ..
ئەو
جوانی نیشتمان لە پێکێکی، ..
سەرمێزی شەودا دەبینێ
من و تۆش
لەشکۆی خاک و
دڵۆپە خوێنی سەرسنگی شەهیدو...
جوانی ئارەقی تەوێڵی پێشمەرگەو...
قومە ئاوی متارەکەیدا
شکۆی خاک و شەهیدیش
بەپەیکی بەفرو....
مەفرەزەی ڕەشەباو..
حەسحەسی بروسکەو ..
گاردی باران دەسپێرین !
هەموومان
لە چەپڵەدا یەکڕیز و..
لە ڕاپەڕیندا حەماسی و...
لە ئەی ڕەقیبدا مەست دەبین !
لێرەوە ژیان دەستپێدەکاو..
ڕەش وڕووت مێژوو دەنووسێتەوە و..
(نیشتمان) ێک ، کۆماندەکاتەوە!
ژیانیش لەچاوەڕوانی و ...
زەمەن لە چاوشارکێ و.، ..
تەمەن لە خۆیدا لولمان دەداو...
مەرگیش (مەی)
بەونیشتمانە سوتماکە دەخواتەوە!
دەستی خەم
مەلۆتکەی نێو یەختی نیشتمانی ئاو
بە بێدەنگی ڕادەژێنێ و .، ، ،
(بێدەنگی) یش
لە خەندەی تۆراوی
ئاهەنگی شەوەسپییەکانی
نیشتمانێکی سووردا دادەگیرسێ و ...
ئیلهامی شیعرێکی یاخی
دەخاتە ئامێزی، فریشتەکانی
ئاسۆی نیشتمانی غوربەتەوە !
(ئەو) دێت و ...
عەشق
لە دڵی قەیرە کچێکدا متووربە دەکاو
ئەمەل بە ژیان دەبەخشێ و ...
حەز
لەئێوارەیەکی جنسی و..
شەوێکی ڕۆمانسی مارە دەکا!
بەردی مراز
لەکوانووی جۆشسەندووی
دڵی فریشتەیەکی سپی، ..
شەوانی نیشتمانێکی تووڕە، ..
دەکا بەئاو!
هێند تووڕە
خۆی خۆیدەخواتەوەو..
یەک یەک
برینەکانی جەستەی چیاو
ڕۆحە سپییەکانی ئەنفال دەکولێنێتەوەو ..
هەڵەبجە...
لە نیشتمانی قەتماغەی زامی خەونەکان،
بێدار دەکاتەوە!
(سایکس بیکۆ)
سەدساڵ نیشتمانمی، ..
خستە سەرزینی ئەسپی خەیاڵ و وەهمەوە
سەدساڵیش زوڵم و ستەمی دەوڵەتی عێراق
(سیڤەر) یش
لە سۆمای سەوزی ژیانەوە
خەریتەی جوانترین نیشتمانی دامێ
لێ مەخابن
نەخشەو پیلانی ژاراوی زلهێزان
(سیڤەر) ی ئاوێزانی
هەڕەشەوگوڕەشەی (لۆزان) کردەوە!.
لێرەوە ..من و تۆ ....
بڕیارماندا
چیتردەست لە ( لۆزان ) یەکانی
نیشتمان و
نەخشەوپیلانی ئیقلیمی
نەپارێزین!
تا (هەواڵی سەربەخۆیی کورد)
دەدەین بە گوێی
سەڵتەنەی عامی ئەقوامدا
ئەو گوێچکەی لە (تاوان) زیاتر، ..
هیچ نابیستێ و..
لە (درۆ) ش زیاتر،
ڕاستی ناڵێ !
مێژووش قەت ناخوێنێتەوە!
مێژووی سووری، .
خەباتی ئەو نیشتمانەی
لێمان دزرا !؟
هاوارتە لە من نیشتمان!
دەهەستەوە
هەستەوەو...
سیمای کووچەو کۆڵانی منداڵیم
پڕکە لە بۆن وبەرامەی، ..
سمڵ و مێخەکی سەرسنگی دایکم ،
ئەو دایکەی ، .. تامرد
لە تێسکەی تفەنگی باوکمەوە
خەونی بە گەڕانەوەی پێشمەرگەوە دەبینی
ئەو پێشمەرگانەی
پەیامی ڕێکحستنەکانی شارو...
چریکەی تفەنگەکانی شاخ و، ....
فرمێسکی باران و....
زەردەخەنەی بەفریان دەگەیاندە نیشتمان
ئەو نیشتمانەی
فرچکی بەبەفرو ڕەشەباوە دەگرت و ...
لەئاونگی فرمێسکە یاقوتییەکانی باراندا خنکا
ئەو نیشتمانەی ، ..
لەشیعرە پاییزییەکانی ژەنەڕاڵدا دیل و
لە چاوەڕوانی کەژاوەی گریانی (شێرکۆ) کانی نیشتماندا ، زیز و ...
لەزەماوەندی کۆمەرگی، ..
ئازیزانی کۆڕۆنادا، مات و مەلوول!
نیشتمانێک
ماڵ بەماڵ ژیانمان تێدا نووسیەوە
کون بە کون خۆمان لێ حەشار دا
جادە بەجادە خوێنمان تێدا چاندو..
کۆڵان بەکۆڵان خۆمان تێدا ناشت!
ئێستاش ...من نازانم
نیشتمان، ... ونی کردووم؟!
یان
نیشتمانم، .. ونکردووە؟
نیشتمانێک پڕ لە (ئەو)
خاڵیی لەمن و تۆ!
#21-09-2021#
ئەو شیعرەم لە ژمارە (7) ی گۆڤاری (دیوان) لە کۆتا ساڵی 2021 بڵاوکرایەوە. [1]
=KTML_Bold=ئەم هەڵبەستە بە ڕێنووسی نووسەر نووسراوە و کوردیپێدیا بە هیچ شێوەیەک دەستکاری ڕێنووسەکەی نەکردووە.=KTML_End=