ئایېر و ئاتەشگا لاو زەردەشتیەکاوە پیروزېنۍ:

ئایېر پەرەسی دمای داستانو حەزرەتو ئیبراهیمیۆ دەسش پەنە کەردەن، دلۍ ئاویستاینە باسو ئایېری بە پەنج جورۍ کریان، پی تەرزە:
1.ئایېرو پەرەستگای.
2.ئایېر دلۍ لاشەو مروڤی و ئاژەڵینە.
3.ئیېرو دلۍ ڕوەکی.
4.ئایېرو دلۍ هۆرە برووسکەی.
5.ئا ئایېرە بەهەشتەنە ئینا وەردەمو ئاهورامەزداینە.
ئایېر دلۍ ئاوێستاینە پەنەش ماچان (ئاتر) ، بەڵام زوانی فارسینە بېیەن بە (ئازەر) و بەکوڕو ئاهورامەزدای نامش بریان، ئاتیەشگا (یانەو ئایېری) وەڵتەر هەشت بەرېش بیېنۍ، نموونەش ئاتەشگەو (شارو یەزد) ی کە سەردەمو لەشکەر کېشی سوپاو ئیسلامینە کریان بە مزگی.
ئا ئاتەشگێ کە ئایېرشا چەنە کریانۆ، مەشیێ بە تەرزێ بیێ تیشکەو ڕوجیاری نەڎۊش وەنە، پەوکەی دلېشەنە هۊڎێ گولانەی تاریکشا کەردەنۆ ئایېرش چەنە کەراوە.
ئایېر جە لاو زەردەشتیەکاوە نیشانۍ گېیانی نوورانی خوڎای گۆرەیەن.
ئایېرو ئاتەشگەی جە لاو پېیا دینیەکاوە چەمداری کریۊن، بە دارێ ئی دیم و ئۆ دیم کریۊن، کە دارو ڕوەکێن پەنەش ماچان (بەرسم) ، بۊوەو دلۍ ئاتەشگاکا بە (بوخورد) وەشە کریۊن، مەشۊم گرد زەردەشتیێ پېویسەن بلۊ پەی ئاتەشگای و نزاو (ستایېشو ئایېر) ی بوانۊ کە پەناش ماچان (ئاتەش نیایشین) ، باوەڕشا چامنەن هەر کەسېو ڕوانە یەرۍ جار بلۊ پەی ئاتەشگای و نزاو (ئاتەش نیایشین) ی بوانۊ، وەش گوزەران و بەختیار مەبۊن، ڕوحش ئاسوودەن.
دماجار مەبۊ ئانەی بزانمۍ کە زەردەشتیەکۍ ئایېر پەرەسۍ نېیەنۍ، بەڵکوم ئایېر بە نوورو خوڎای مزانا.[1]