ماچۊ کابرێوە کوڕېوی هەرزەکارش بۊ، ئی کوڕه ڕەفېقۍ فرېش باو هەرچی وەشی و سەفاش هەن، چنی ئی ڕەفېقاشه بەشش کەرۊ و جه بازارەنه هەر ئېڎ دەس کەرۊ باخەڵەشەرەو پەی سێرانیچ حەر ئېڎ کۊڵۍ پېچۊوە، بەڵام تاکو ئیسه نەکەوتەنەنه تەنگانه تاکو بزانۊ ئی ڕەفېقېشه دیسان هەنۍ چنیش یا نا؟
تاتەکەش پیېوە ژیر مەبۊن، به کوڕەکەیش ماچۊ: ڕۊڵه گېیان، پېسه بزانوو ئی ڕەفېقېته دەرده و تەنگانەی نمەوەراو هەر جە وەشیەنه ئینێ چەنیت، کوڕەکه ماچۊ: تاته گېیان پی قسېتە باوەڕم نیا، چوونکای ئی ڕەفېقېمه فره وەششا مسیەو، دایېمەدەره ئینێ چەنیم و به گېیانوو من قەسەم موەرا.
تا ڕوێو تاته و کوڕەکەی کاوڕېو سەره بڕۊ و پاکش کەرۊ و دەسماڵێوەش مڎۊ ملەره و به کوڕەکەیش ماچۊ: لوه پەی لاو ڕەفېقەکات و پەنەشا واچه تووشوو گېچەڵېوی ئامانا و قەتڵێوه ئامێنە ملمەره، شمه ڕەفېقۍ گېیانیۍ منەندۍ و من فەقەت شمه شکه بەروو بەیدۍ دەممۆ، ڕا و چارێوەم پەی بېزدېوه.
کوڕەکه به واتەو تاتەکەیش قەوڵش کەردو لوا پەی لاو ڕەفېقە‌کاش و هەرپاسە تاتەیش واتەبۍ قسېش گېڵنایوه. بەڵام هیچکام چا ڕەفېقە گېیانیاشە نامێ دەمشۆ و هەر یۊ به نۊعېو وېشا لا دا، یۊ واتش من ژەن و زارۊڵەم هەن نمەتاوۊ شەریکوو گېچەڵەو تۊ بوو، یۊ تەریشا واتش تۊ قەتڵەت کەردېنه ئێمه مشیۊ تاوانەش دەیمۍ؟ مەگەر ئېمه واتەنما قەتڵ کەری؟ ئەوی تەرشا واتش لوه گوم به، تاکو خەبەرم نەڎانی، ئەو یۊیچشا واتش من عەسڵەن تۊ مەژناسوو!
کوڕ ئاماوه پەی یانەی و به تاتەیش واتش به خوڎا ڕاست وات، ئی ڕەفېقۍ هەر هینوو وەشی و ویارای بېنۍ و پېسه و مەشا دەوروو شیرینېیەنه گلېرۍ بیېبېنېوە، ئانا ئارۊڤەلای گردم نیێ لاوەو ئیتر نمەلوو دەورشانە.
تاتەش واتش دەی من قەومېوی شڕۊڵەم هەن، یانەش ئینا دەگانە لوه واچه تاتەم تووشوو گېچەڵېوی گەورەی ئامان، واچە زوو بێ و چارەو ئی گېچەڵېشه پەی کەری، کوڕە لوا و یاوا یانه و قەومەکەیشا، واتش: من کوڕو فڵانە کەسیەنا، تاتەم تووشوو گېچەڵېوی گۆرەی ئامان، قەومەکه ماتڵ نەبی و زوو وېش مەحکەم پېچارەو وېش موسەلە‌ح کەرد، ئانه هەکه لازموو سەفەری بۍ حازرش کەردو کەوت ڕا، چنی کوڕەکەی ئامێ تاکو یاوێ یانە، دماو وەشی و تشی تاتەو کوڕەکەی به قەومەکەیشا واتش پەوکای چڕیەنیم تووشوو قەتڵێوی ئامانا، خۊ من هیچ تاوانێوم نەبۍ و ئی کابرا ئامابۍ دزی کەرۊ و قەسدوو گېیانوو منیچش کەردەبۍ، من وەرگیریم جە وېم کەردە و ئی کابرا دلۍ دەسامەنە کوشېیا، ئیسه نمەزانۇ چېش کەروو، قەومەکەی واتش: من و تو جه ونێوەنمۍ و گېچەڵەو تۊ هینەو منیچەنه، تۊ کارت نەبۊ بازەش پەی من، هەر ئیسە گېرووش کۊڵۍ و بەرووش یاگێو چاڵەش کەروو، تۊیچ یاگېش نەزانی!
پیاکەی واتش: دەی با گردیما پېوەره بلمۍ و بەرمېش پەی کەشی، چاگه کەرمېش چیروو خوڵېوە، پی جۊره گردشا لوێ، تاته ڕوەش کەردەنه کوڕەکەیش و واتش: ڕۊله گېیان، قەوم هەر قەوما و هەر پاسه قەڎیمیۍ واتەنشا قەوم گۊشت بوەرۊ، پېشەکەی نمەماڕۊ، هەر قەوم دەرڎه و قەومی موەرۊ، خۊ ئیسه به چەماو وېت گرڎ چېوت دی، ڕوەیچش کەرڎەنه قەومەکەیش و واتش: خوڎا کەرۊ هیچ وەخت تووشوو هیچ گېچەڵېوی نەیمۍ، بە خوڎا ئینه فەقەت ئیمتېحانېو بۍ و شوکروو خوڎای من جه ئېمتېحانەکەنه بەرئامانۍ، وەڵڵا جەنازەو چېشی و قەتڵە کامەنە؟ ئانه لاکوو کاوڕېویا و ئیسەیچه ئارڎەنم چېگەنه گرڎیما بوەرمېش.[1]