2سیاوکامی ڕۊی جەهانیو زوانی ئەڎایین.
هەرکەس بە زوانی ئەڎایی وېش نەزانۊ وەنۊوە و نەزانۊ بنویسۊ بېسەوادا (یۆنسکۆ).
بنویسمۍ بە زوانی هۆرامی و وەنېموە بە زوانی هۆرامی چوون ئاڵاو قەڵەمی نەبڕیاینه باڵاو هیچ میللەتەیرە (مستەفازادە)
▫️پەی من، پەی تۊ، پەی شمە و پەی گردوو ئېمە کە زوانی ئەڎاییما هۆرامین:
زوانێوە کە چا ڕۊوە ئامەینمۍ دنیا و چەنی ئەوەڵین هەناسێوە کە شمشاما دان جبەر و کېشتەنشنا دلۍ، ئیناما چەنە.
▫️ ئانە زوانی ئەڎایین، زوانێوە کە پەی بېیەیش وېما هیچ چنگەپڕچېوەما نەکەردېنە. پېسنەو نامۍ، ڕوومەتی، یاگېو ژیوایی، ئەڎا و تاتەی و فرینەو چیواتەری.
▫️زوان ڕەنگا لاماوە کەرەسێوە ئاساییبۊ و پېوەرە گەورۍ بیېبیمۍ و غەریب نەبۊ پەیما. بەڵام ئەرتەی کوچېوە پشمێرە و سەرەنجە دەیمۍ، یاومېنە کە زوان ڕاسیەکەش کۍ بېیەو ئېمەن، ڕېک عەینوو شناسنامەی. زوانمان ئېمە پېسە کەسېوە هۆرامی مڎۊ قەڵەم، زوانا میللەتەکا جە یۊی جیاواز مڎۊ چەمۆ. یام بە جۊرېوتەر تاومۍ واچمۍ زوانا کە ڕەگەزەێو و بنەڕەتی نیشانی مڎۊ. جا ئینە وەختارێوە هەمیەتدارتەرا کە جل و بەرگ، وەڵات و... یۊ بانێ، ئا وەختی تەنیا زوانا کەبۊ کۊڵەکێو هۆویەتی و کۍ بېیەی.
▫️گرڎما زانمۍ هۆرامی قسۍ کەرمۍ، بەڵام نوسیتەینە و وەنایوەنە به زوانو هۆرامی ئیسەبۊنەو کەم کاریو کاربەدەساوە بېیەن یا خۊ خەتاباریو وېمان مەزانمۍ و تاخەیت هەنۍ کەسانېوەیچ کە چەنوو زوانی ئەڎاییشا بېگانېنۍ.
▫️ئېمەی هۆرامی زوانی میدیا، ڕۊنامە و دەسەڵاتی سیاسیما نېیا و تاخەیت ئانێچ کە دەعیەو براگەریشا هەنە چەنیما ئا براگەریشا دەسەوام نەڎەینمێوە و مەڎایچماوە، جا ئېمە واز نمارمۍ و کۆتا نمەیمۍ و مەیاومېنە کە مافما ئینا دلۍ میللەتەکەو وېمانە و مەبۊ تەماکاروو کەسی بیمۍ.
▫️خەتاباریو وېچما ئینەن کە ئەغڵەبەو خۆڵکی بە دەمارزلیش زانا کە بە زوانێوەتەر قسێ کەرا هەم یانەنه و هەمیچ جبەرنە، ئینە کە هەوڵ دەی زوانێوەتەر فېر بی فرەیچ یاگېو دڵوەشینە، بەڵام ئەر قەراربۊ پاڵشنە زوانی ئەڎایی وېت هۊشت پشۊوە ئینه یانێ گەورەتەرین مقەددەر، ئینه یانێ قۊمیای وەنە.
▫️من وېم ئینەم بە چەمو وېم دېیەن. پەنج ساڵۍ چېوەڵ فەرهەنگېوە باخەڵی هۆرامی ئێنگلیسیم نویست، فرێوە یاگېو خەفەتی و مەراقی بۍ پەیم کە وینېنۍ وەنایوە ئینگلیسیەکەی پەی هۆرامی زوانەکا ئاسایی تەرا تاکو وەنایوە کەلیمە هۆرامیەکا. هەر ئانەن کە یاومېنە یۆنسکۆی فرە بە هەق ئینەش واتەن[ هەرکەس بە زوانی ئەڎایی وېش نەزانۊ وەنۊوە و بنویسۊ، بېسەواڎا].
▫️یۊتەر جە خەتاباریەکاما ئانەن کە بڕېو یانەگۍ هەنۍ خوفیشا هەنە کە زاوڵەکېشا وانگانه یا خۊ جبەرنە عانوو قسە کەردەینە لەهجشا زاقبۊنە و نەتاوا وەش بە زوانی ڕەسمی قسۍ کەرا. هەر پا بۊنەوە گنا واڎیی کە هەر بنەڕەتنە یانەنە فېروو کەلیمە بېگانا و لایەڎاشا کەرا و ناغافڵېنۍ چانەی کە واچیان: هەر کەسېوە کە قسە کەردەیشنە لەهجەشبۊنە، مەبۊ گاڵتەش کەری پەنە و مشۊم زانی ئانە ئاڎ زوانێوە جە تۊ فرەتەر زانۊ.
▫️با خاس زانمۍ و خاس وریایۍ بیمۍ کە ئی خەتایۍ کە کەرمېشا، سەبا ڕۊ با بە هۊو ئانەی کە کۍ بېیەو وېما و زاوڵەکاما پاشېل کەرمۍ و پەی هێستەیشۆ مشۊم کۊڵێوە هېز و زەحمەت کېشمێ تاکو سەلەمنمۍ هۆویەتما کامەن و کامە بېیەن؟!
▫️هەمیەتوو زوانی ئەڎایی ئڼە فرەن کە جە لاو یۆنسکۆیوە ڕوېوی جەهانیش پەنە تایبەت دەیان کە ڕۊژمارنە (2و سیاوکامی)ن و ئەچی ڕۊنە سەرتانسەرو دنیاینە چڼەها کۊنیشتۍ و کۊبیېیوە ملا ڕاوە و بایەخێوە فرەش پەی منیارە، ئېمەی هۆرامی زوانېچ مەبۊ تەماکاروو کەسی بیمۍ و وېما مشۊم زوانیما و کۍ بېیەیما پارېزنمۍ و پەی مەنەیوەش و مەنەیوەو وېما هەوڵ دەیمۍ. ئانەیچ زانمۍ شانازی کەردەی بە هۆرامی بېیەی تەنیا بە واتەیش نېیا و مشۊم یاومېنە زانای، نویستەی و وەنایوە بە کۊڵەکێو هۆرامی بېیەی کە زوانی هۆرامین.
▫️پارېزناو زوانی هۆرامی ئەرکوو سەرو شانەو گرڎیمان.
نویستەی: مێهران ئەحمەدی.[1]