هەرەسە
نویستەی: شارۆ

کەڵەهەرز بۍ، بېکاری بېزار کەردەبېنا و هەواو باخەڵۍ سەردتەر جە چلۍ زمسانی بۍ. قووتوو زاڕوڵا کەمتەر چانەی بۍ پیرەوەرزیما ورازۊ سەوزیرە!
تۊشەم لچ‌پەڕ کەرد نانەوشکەی و سەفەرم یاونا شاروو هەڵەبجەی.
پیشەم پېسە بۍ پلوورەوارانۍ و هەرکەس هەر جۊرە هەرمانێوەش بیێ، بەڵۍ عاڎەت دریاو زوانیم بۍ. بەناییوە تاکو گەچکاری.
مانگێوەم لتە کەردېبۍ، تاقەت کەل بی و نەبېیەی هەمدەمېوە دڵی هۊرنیۍ پەی گېڵایەو.
هەواڵ یاوا، چن هاوماڵێ دەگاو تەوېڵېنە هەرمانە کەرا، وەقرە پاش کەرد پاڵایېوە و تاقەتش جمنا پەی تەوېڵۍ. ماوێوە ۋېیەرد، عەسرانێوە خەبەرشا دا، هەر کەسېۋو خەڵکوو ئۆ دیمین بۊنەو هۊرچنیەی سەرۆک کۊماروو ئێراقیوە مشۊ هەرېمی جېیا بازۊ.
ئاسمان تووڕە بۍ و زمسان سپاو وەروېش ۋستەبۍ ڕا. چنی ڕەفېقا وېما پېترە و ڕوەو کەل هەڵمەتەما هەنگامەش نیا. کەلو داڵانیما ترازنا، شەوە داشەرە و چەمما جمەش کەم حوکم بی. بۊران وەربەسوو ڕایما بۍ و گم بېیەیو ڕای حەتمی. نەزانېنمۍ یاوێنمۍ کۊ؟ تەنیا زانېنمۍ داڵانیوە کەردەنما پی دیمرە و هاکۊ مل منیەیمۍ. دەنگېوە ئاما و هاژێوە خېزیا. دەنگو ڕەفېقا نەمەن. زۊر دەس و پانە ڕەمابێوە و تاریکی دنیاش تەنېبۍ. هەرچی هەوڵۍ دېنا، نەتاوېنا جووڵە کەروو. چن جارێ هاوارم هۊربڕی، بەڵام هیچ‌کەس جوابم نەڎېوە! هۆڵم دا بە چن تەکانێ ڕاو لەشیم وازە کەروو بەڵام نەتاوېنا! دووبارە هاوارم هۊربڕی، دەنگېو دوورەو ئاما، نەزانام کامشانە، واتم فریام گندۍ لەشم خەریکا جە گۊ گنۊ! نازم بۍ و ئاڎ چەوپەڕەو بۍ و هەواو هەرەسێ دوور ۋستەبېوە و نەزموو لەشیش کەمتەر شېویابۍ. بە زەحمەت وېش یاونا لام و بە هەر حاڵێو بۍ بەرش ئارداوە. دەسېم جە گۊ کەوتېبېنۍ و زوقم دەسامەو سەردی دزۍ!
دەسېم نیێنۍ بنەو باخەڵېم تاکو تینی گېرا و بە هاو هەناسەی وەرمشا ڕەمۊوە و بتاومۍ یارڎەی ئەویشا دەیمۍ. نەزمین سی چل میترۍ دوور کەوتەبېوە و تەنیا کەمېو سەرەش ۋناڵین بیەبۍ، بەڵام فەرحان دیارش نەبۍ. بە هاوار هاوار و گېڵای پی لا و پەولارە فەرحانیچما دیەو، ئاڎ فرەتەر بیەبۍ دامی هەرەسېوە. لەشش تەزا بۍ و پاش پەی جمەی هەنگامەش مەڕیێبۍ!
بە کېشۍ ئاردما تاکو وېما یاونا بنەو تاشێوە.
بۊران هەڕەشۍ کەرۍ و شەوە وەربەسوو ڕایما بۍ،
نەزمین چن بنجەگیواوێ وشکی و چن چۊکڵەوشکۍ پېسە قاچە مریچڵاش وېستێوە و بە هەزار زەحمەتۍ بنەو تاشێوەنە کە پاڵشنە وڵەیوە وچکلېش چەنە بۍ، ئاویرش کەردەو.
ناچاریېنە ئا جلا دلۍ کۊڵەکەیمانە بېنۍ ئاویر دېنمۍ.
نازم بە هەر زەحمەتێو بۍ کەکەوی تەڕۍ ماڕېوە تاکو ئاویرەکەما نەکوشیۊوە.
ڕۊشنایو ئاویری فەرېحە وزۍ دڵما، فەرحان هاواروو قاچیش کەرۍ، قاچش مەڕیا بۍ و لەشش شیتاڵ بیەبۍ.
بە جلەکاما ونبەسما کەرد تاکو یاونمېشۆ دەگا و ...
بەڵام فەرحان ئېشش فرە بۍ و تەنیا غیرەتش نازۍ چەمېش ئاودز کەرا. ماوێ ۋېیەرد، سەرەم هۊربڕنا و دیم وەروە نمەوارۊ و کەم کەم هەسارۍ ئاسمانەو چەمېما پەی کلنا. وەشی کەوت دڵما. نەزمین فرز بۍ، لوا سەرو قوتەیوە تاکو بزانۊ یاوێنمۍ کۊ؟ چڕیش وەنەما نزیکوو سەردانینمۍ، تەگبیرما کەرد یۊما گنۊ ڕا پەی دەگای، نازم و نەزمین سەرو سفرێوە گەورۍ بیېبېنۍ و نازم چن گجیێش فرەتەر دڕیېبېنۍ، ماچۊ:
نەزمین بلۊوە و خەبەر بڎۊ دەگای، وەروە ئڼە فرۍ بۍ، نەزمین بە زەحمەت پا فاڕېوە، تاکو چەمنە پېچ کەوت، خیاڵما ڕچەش پەی ماڕۍ، سەعات یاڼزەو شەوۍ بۍ، تەرسیما بۍ، دلۍ ڕانە فۊتیۊ وبۊ قووتوو وەرگا، پی بۊنەوە نازمیچ لوا شۊنیشرە. سەرەو فەرحانی باوشیمنە بۍ و ڕۊشناییو چەماش پېسە شۊڵەو چراوە دەسیېوە کز کریەیبۊ، چەمۍ ترووکنۍ و ۋاچۍ: بەهمەن گېیان، تۊیچ لوە با نەفۊتیەی، من کارم تەماما و ونیم شیەنە و توانام چنە بڕیان. ئارام هەرسی چکنېرە و وەسیەت کەرۍ پەی زاڕۊڵەکاش، وەروو ئانەی فەرحانێو گنۊ دڵوو فەرحانی، بە زەحمەت وېم گرتەبۍ تاکو نەگرەو. واتم: کاکەگېیان، بېخەم بە جیات نمازوو، یا نەجاتما بۊ یا پېوە مرمۍ. جە نازمیچ تەنیا یاگە پایۍ جیا مەنېبېنۍ، ئاویرەکەما کز بېیەبۍ و پەی ئانەی تاقەت بارۊ، وېمۆ داستانێ ڕېک وزېنۍ نەکا وەرمما گنۊ پۊرە و سەردایەنە فۊتیەیمۍ و ۋاچۍنا: زاڕۊڵۍ داستانوو پاڵەوانیما مکەرا شەوچەرەو زمسانیشا. هاوار جە فەرحانی پەی ئانەی منیچ گنوو ڕا و قەسەمێ جە من تاکو ئاخر نەفەسی لاتۆ مەنوە. جارجاریچ گنېنا ویروو کناچەکامرە، چەمەڕایی گېڵایمەو کەرا.
سەرەو فەرحانیم نېیا سەرو کۊڵەکەیم و سەرێوەم کېشت بەر. ئاسمان ساف بیەبېوە و هەسارۍ وریشەشا ئۍ، سەعاتە، لنگش نیابۍ ئۆ لاو دوېوە و قاڵاو مەرگو ئاخر هەناسەکاو فەرحانی وانۍ، لوانێوە لاش و دڵگەرمم کەرد، جگەرێوەم گیسنانە و خیاڵا بەردا ڕاو ڕەفېقارە، داخۊ یاوا وەرەو؟ ئاخۊ ویروو ئېمەشابۊ؟
دەمی هەرسامەو، جگەرە، بووڵە کەرۍ سەرەشرە و هایېوەش مەنەبۍ گېیان بازۊرە!
سەرەم هۊربڕنا و نیگام پادەشتش پیما. هەزار هەسارۍ وەستېبېنېرە زەمین و پادەشتەنە ڕچە ماڕېنۍ.[1]