بابا سەرهەنگی دەودانی:

ئی زاتە ساڵەو (324ک/935ز) جە دەگاو (دەودان) ی ئامان دنیاوە، عاریفێ نامداری سەردەمو وېش بېیەن، سەرو ڕاو باڵوڵی ماهی گوزەرش کەردەن، کۊشېیان پەی ئەشناسای و وەڵاکەردەیۆ ڕاو ڕەچەو یارسانی، بەیتە شېعرێنە فەرماوانش:
سەرهەنگ دەودان سەرهەنگ دەودان
ئەز کە ناممەن سەرهەنگ دەودان
چەنی ئیمامان مەگېڵم نە هەردان
مەکۊشم پەرۍ ئایینی کوردان
بە ماناو: نامم سەرهەنگی دەودانەن، چەنی موریدا و شۊنکۆتەکام گرڎ یاگېرە مەگېڵ و کۊشش کەرو پەی زیڼەکەردەیۆ دینو کوردا، ماناو ئی بەیتە شېعرۍ بېخۆشە و ڕۊشنەنە، کە بابا سەرهەنگ پەی زیڼەکەردەیۆ ئایینو کوردا کۊشېیان، دیارەن وەڵتەر دینو کوردا (میترائیزم و زەردەشتی) بېیەن.
دوۍ بەیتۍ تەرەنە دەربارەو (هەفتەن) ی قسېش کەردېنۍ کە لاو زەردەشتیەکاوە پەنەشان ماچان (ئەشمەسپەنتان- جاویدانی پیروز) ، ئینۍ فریشتەکۍ دینو زەردەشتینۍ، ژمارەشان شش فریشتېنۍ و سەری گردیۆ (ئاهورامەزدا) ن، (هەفتەن) سەردەمو (سان سەهاکی بەرزنجی) چەنە بە (جاویدان) یان حۊت تەنی جاویدانی نامۍ بریێنۍ، (هەفتەن) جە لاو یارسانەکاوە ئانېنۍ کە جە سەرەتاو دنیێوە تاکو کۊتایی دنیێ ڕوحشا هەمیشە ئینا گېڵەنە، هېز و تەوانای خوڎاییشان چەنەن و پەیشان هەن دلۍ (تەن) ینە وېشان پیشانە بڎان، ئینېچ دوە بەیتەکەنۍ:
هەفتەم سەرخېڵەن هەفتەم سەرخېڵەن
جە ئاسماندا هەفتەم سەرخېڵەن
هەر یەک وە ڕەنگێ نەگەشت و گېڵەن
هەر یەک پەی کارێ ئاوارە و وېڵەن.
چېرو ڕۊشنایی کتېبو (سەرەنجام) ی ئی حۆت فریشتە کار و بارو ئاسمان و زەمینیشان پەنە ئەسپاریان، هەر یۊشان بە هەرمانێوە خەریکەن.
چېگەنە مەشۊم ئیشارە دەیمۍ پانەیە کە ژمارە حۆت جە لاو میتراییەکاوە پیروزەن و پلە دینیەکېشا حۆتەنۍ. ئی زاتە جە کۊتاکا سەڎەی چوارەمی کوچینە جە (تەوېڵۍ) کوچی دمایینش کەردەن و هەر چاگە ئەسپەردە کریان.[1]