پیری ئاخر شەڕەن
مروڤ چەنی باڵاکەردەیش، مەشۊم ئەقڵ و ئاوەزیچش هامشان باڵا کەران، چوونکوم زانست و ماریفەتش زېیاتەر بان، تەجرەبېش فرۍ و سەرنجېش قووڵتەرۍ بان، ئیتر وەختێ مەیاوۊ تەمەنێ گۆرە یانی تەمەنو پیری مەشۊم پېسە ڕیش چەرمېوە مۊچیاری خەڵکی کەرۊن، بەڵام بڕێشان خەڵەفیاو ڕەفتارۍ نا درووسۍ مەکەران، خەڵکی چەمەڕایی ئانەیشان چەنە نمەکەرۊن، پەوکەی پەنەشان ماچان: پیرۍ ئاخر شەڕۍ، یانی ئاقیبەت خێرۍ نېیەنۍ.
هۊکارو ئا جۊرە ڕەفتارا ڕەنگە دوۍ مەڵامەتېش بان، یۊشا باڵا نەکەردەی ئەقڵ و ئاوەزو ئا جۊرە کەسا هامشانو باڵاو تەمەنیشا، دوەم ڕەنگە چا تەمەنەنە توشو ویرۆشېیەی و نەوەشی بان زەرەر بڎۊن ئەقڵ و ئاوەزشان.
گەر چن نمونێ بارمێ پەی ئا جۊرە پیرا، پەی نمونەی پیېوە پیر گەرەکشەن نزیکی کەرۊن چەنی ژەنا، پەنەش ماچان تۊ کەی چانەیەنە مەنەنی؟ پیری ئاخر شەڕ.
یان نمونەی کەسێ گردو تەمەنیش خەریکو خوڎاپەرەسی و خێر و خێراتیەن، بەڵام تەمەنو پیرینە هۊرگېڵۊوەو ڕەفتارۍ غەریبۍ کەرۊن، پېسە شېخی سەنعانی کە تەمەنێ فرەش جە خوڎاپەرەسینە ویەرنا، کەچی تەمەنو پیرینە کۆت شۊنەو کناچە گاورێ.[1]