ديمەنێ جە هامنو هۆرامانى
مانگەو تەموزى بۍ چلێ هامنى بۍ هەر وېرەگا تەکبيرما کەرد کە بەيانى هەرمانەما چېشەنە زوو کەرمېشا.
سەعبێ زوو وېم و دوێ براێتەريم دماو نان و چاى واردەى وڵاخەکێما (هەر و هەسەرەکيما) گورج کەردېوەو ئەڎا گيانەيچم نان و چايش دلێ تۆشەبەرېوەنە پەى پېتيمێ، کەوتيمێ ڕا هەر فێنکاى هەڵاى ڕۊجيار نەکەوتەبێ وېما ياونا سەرو هەرمانێما، تاتەيچم دماتەر بەتاقەت گاوەکاش ئاردێ پەيلايما.
جا هيزيشۆ دەسەوامما کەردەبۍ چەنى قۆماما، پەڵێ گەنمێما بێنى ڕنيێماوەو درەوەما کەردێ، ئارۊيچ بەيارمەتى خواى گرفتما کەردێ بەشکو ئەر مەجاليچبۊ کومێشا (کوێنيما) .
بەڵۍ چەنى برايەکام و تاتەيم دەسما کەرد بەوەشکەردەو خەرمانەو گەنمەکاش پەى بارمێ، تاتەێم وات ڕۊلە ئيگە فرە خاسا پەى خەرمانى ئينا دلێ ڕاسەنەو جارێ يۆتا بلۆ کوچێ سمەرى بارۆ، يۆتەريچتا بلۆ ئاوەو جۆگەکێ ورکەنۆ تاياگێ، خەرمانەکەى فيسنمێ و جوان کۊمېشۊ، تاتەم پەى کوايۆ خەرمانەکەى دەگاوە چەنى وېش بانتلرێوەش ئاردەبێ، بەڵۍ ئانە تاتەيم وات گرد لوايمێ دەم و هەرمانەکاماوە.
ياگە خەرمانەکەما ديارى کەرد و پاکما کەردۆ بە خەرماشەو تەوەن و چېوەکەما چەنە لابەرد و بەسەرناتک خاس گزيمادا، ئاويما نيا مل (نيا سەر) تاکو خاس فيسيا و دماتەر سمەريما شانا و تاکو نەبۊ بەهەڕە و تاکو تاومۍبە بانتليرەکەى تلنمێش و خاس کومېشۊو.
برا گولانەکەيچم هەيتا هەيتا دلێ جامۆڵکە فافۆنينە کۆنەکەنە چېرو مڵوێوەنە نيابێمارە، هەر بەيانى زوو کە ئامايمێ سەرداوەکەمانە کونەکەما گۆست، ئاوى چيێما دێپەنەو ئيتر ئاويما واردۆ و کوچێ ئيسراحەتما کەردو تازە وەر کوتەبێ.
دماتەر گردما ورئێستمێ مڵوەکێما بەدارەکێما گرد کۆکەردېوە دەور و شەش شارۍما چەنە دروست کەردێ ئيتر نيشتێمێرە پەى ئيسراحەت کەردەى و نانە بەچولە واردەى، برا گولانەکەم تاکو ئېمە ئامايمى پەى چېرو کەپرە گولانەکێما کە بە قارام و پوينە تاتەيم دروست کەردێبێ برا گولانەکەم جە بويسانەکەمانە کاڵەک و شوتيش ئاردەبێ و لتێش کەردێبێنێ و حازرش کەردێبێنێ، نانێ عالما وارد بۍ شمە ناوەش.
دماو ئيسراحەتى ورئێستيمێ، شارۍکێما گرفت کەردێ پەى دلى خەرمانەکەى، جوان نيێمارە پەى ئينەى حازرێ با پەى کواى، تاکو دەمەو وېرەگا جا شارۍکێما گرفتکەردێ، يۆ وەرێسێما پەنەبۍ چەنى فەرەنجيێوە ئننەما داسولکى پۆوە بێنێ عازاما گرد ئامابێ وريايي، وېرەگا ئاماوەو لوايمێوە پەى دەگێ، ئننە مانيەبێنمێ کفتى بيبێنمێ هەر وېرەگا وەرمما پۊرە کەوتەبێ.
سەعبى زوو ورئێستيمێوە تاکو زوو بلمێ سەر و هەرمان و کاريما، سوار و هەرو هەسەرەکەيما بيەيمێ و پەى دەشتێ فرەش نەبەرد ياوايمێ وەرۆ دەسما کەرد بەهەرمانە، گەنمەکێما کەهيزى گرفت کەردێبێنى بڵاوما کەردېوە قەراخ و خەرمانەکەيرە تاکو گەرەشا کەرمۍ و کۊميشا، دماتەر چەنى تاتەيم هەرو هەسەرەکى و گاوەکاما بەستێما گەرە و دەسماکەرد گاو گەرەکەردەى خاسبى تاکو نيمەڕۆ گەنمەکێما کوێ.
دما و ئانەيە گاو گەرەکەما وەردا و تاکو ئيسراحت کەرا ئېمەيچ لوايمى نما کەردەيي پەى لا سەرداوەکەيما، دماتەر ئامايمى ئيسراحەت کەردەى پەى چېرو کەپرەکێما، بەراستى ئننە مانێبێنمى چوون فرە گەرم بێ، تاتەيم وات ڕۊڵە شمە دماو نان واردەى لۆدېوە پەى دەگێ ئيسراحەت کەردێ و وېرەگا بەعزێ ياگى باردێ بەشکو هەرچى وېرەگا و شەوۍ و بەيانى زوو شەنەو گەنمەکا کەرو بەشکو زوو نەجاتمابۊ بەرهەمو ئێساڵی بەرمێوە، بەڵى ئانە ئيمە وات جابەجاما کەرد، تاتەم و برا گولانەکەم مەنێوە لا خەرمانەکەيۆ برا گولانەکەيچم لا گاوەکاوەبى لەوەڕنايشا لەوەڕنى، وېرەگا دێرێ ئامايمى پەى لاو تاتەيم و نان و تفاقێ خاسما ئارد چەنى وېما، تاکو ئامايمى تاتەم بەباڵە شەنەکېش نيمەى خاسشا شەنەش کەردێبێنێ، وېرەگا وەڵێ ئانەى ڕۊجيار بلۆ کەلەرە خێرا نانما وارد وەر و ئانەيە ياردى تاتەيم دەيمێ و ياومى بەشەو واريرەو جەدەسما نەلۆ ئانەش کەمەنەن شەنەش کەرمۍ، جا مانگە شەوەيچ بۍ و يەک شەماڵێش بێ، چەنى برايەکام هەرجارەو يۆما شەنە کەرى تاکو شەوۍ دێرێ تەمامنێما، ئيتر سەرو خەرمانيۆ پا مانگەشەوۍ و پا هەوا فێنکە و دەشتى وتيمێ، سەعبى زويچ تاتيم هايي کەرديمى و تاکو نان و ماسێ وەش نۊش کەرمى و دەسکەرمۍوە هەرمانە، واتش ڕۊڵە گيان يۆتا بلۆوە پەى دەگێ گونيێەوە باردێ و کوڕەکا و لالۊيتا باردێ ياردێ وېتا و وڵاخەکەێشا باردى و باگەنمەکا بەرمێوە، بەڵۍ ئانە تاتەيم وات پاسەما کەرد تاکو دەور و چاشتنگاى خەريکى بار ئاردەى بێنمێ واتم تاکو شمە ئيجارە مەيدېوە من نمە و چەنيتا بابلو کوچێ ميوە بارو دلێ باخينە تاکو ئاڎۍ ئامێوە دوێ چنگێم پەڕکەردێ هەنگورى و ساوي و هەڵوچێ و هەشتاڵوێ، کە بارشا ئاردۆ منيچ لوانى چەنيشا پەى سەرو خەرماني و چاگە دەسما کەرد هەنگورو ساو واردەى تاکو دەورو نيمەڕۆى گەنمێما بارکەردێ و شوکور پەى خواى تەمامنێما، تاتەم وات ڕۊڵە گيان ئارۊ با وەسێبۆ.
لۆدېوە ئيسراحەت کەردێ هيچما نەمەنەن تەنيا سمەرەکا نەبا ئاديشايچ سەواىبۊ پێرێبۊ بەرمێشاوە، سەوايشۆ نا پێرێ پەى کوڕەکا لالۊيم گردما هەرو هەسەرما گورج کەردېوە چەنى ڕەشکەکاما لوايمێو پەى سمەرەکاما تاکو ئاديشايچما يەک ڕۊ تەمامنێ دەورو (20) ويس بارا بێنى کەردێما کادانەکەيما سەرۆ قەڵا ڕۊچنەکەرە، بەڵام بەراستى وەزعێ گولەما بێ، تاسيێبێنمێ چەنى تەپوتۆزو سمەرا، هەرجۊربۆ تاوېرەگا تەمامنێما، ئيتر ئيسراحەتما کەرد، تاتەيچم وەعدش دێبێنمى پەنە هەريۆما قاتى (دەسێ) جلێما پەى کەرۊ ئيتر ئەننەيتەر وەشى لوا دڵما....
ئيتر ئەننە وەشيما بۍ ياگێوە هيچ هەرمانێوەما نەمەنێنە، ياگێوەتەر تاتەيم جلێ جوانێما پەى کەرۊ.
هیدایەت هۆرامی.[1]