حەمە ژەنی مارۊ
بەشۍ: یەرەمە
سەرو هەسارەکێوە کە تەنیا چن گەزێو چەنی کەپرەکێ بەینش بێ، نیشتارە. دڵەۋرکێ وەقرەش چەنە بڕیەبێنێ و شکەم بە چېۋێۋی کەردێبێ. ئاڼەش نەبەرد قیژەو سۆسەنێ چڵاکنانېرە و تەکانێوەش وەنە دانێ. نەزانام چەنی هۆرساوە، کەمتەر جە دەیێقێوی وېم یاونا وەروو کۆگاکێ. هەر دوورەو مڎیەو سۆسەنەی بەسەزوانەشا پاڵ وسێنە و مامۆژەنیم باڵێش و ئەدایچم قاچە باریکەکېش گرتێنېش و بەرزێش کەردێنێ. زریکەش لوێ ئەو ئاسمان و هیچ کەس فریاش نەگنێ. مەتی خەجێم دیە سەرەش بەردەبێنە بەینوو قاچا سۆسەنێ و تێخێو دەسشەو بۍ و دیار بۍ چەمېچش خاس نەوینێنێ و زوو زوو ۋاچۍ: ئیسە تەمامیۆ ڕۊڵە گېیان، مەتەرسە!
ئەڎام سەرەش هۆرگېڵنابێوە ئۆ دما و زاتش نەبۍ تەماشەو تێخەکەو دەسو مەتی خەجێ کەرۊ!چا حاڵەنە وېم نەگرت و قێڕنام سەرەو ئەدایېمەرە. ئەڎام فرە بە پەشۆکیاییەو واتش:
حەمە ڕۊڵە ئینە کاری ژەنانەن تۊ وېت تێکەڵش مەکەرە!
خەریک بۍ دڵم تەقۊ، هیچم پەنە نەکریێ، دەسەڵاتم بېیایا مەتی خەجێ چا وەختەنە ئایېر دێنێ. چەولایچەو ئەژنەویەبێم ئی کارە شەرعیا و مشیۊ پەی کناچڵا کریۆ. ئیسەیچ هەر ئا پەلەقاژێ سۆسەنێمە ویر مەشۆوە، ڕەنگەش بیێبێ پېسە هەڵاوەی چەرمەی.
ماوێوش پەو شی، سۆسەنە کەوتەو سەرو ڕۊتوو جارانیش. ئیسەیچ هەر جارێو تەماشەش کەروو، تەرسېوە و شەرمەساریێو دلێ چەماشەنە وینوو.
ئا هامنە هەرمانۍ مڵکیما فرە فرێ بێنێ و من هەمێشە هەوڵ دێنێ وېم دزوۆ چەنەشا.
تاتەیچم وېش، تۆزێو پاش نیابێنە سنحە و ئادیچ پېسەو من ئاڼە وېش نەڎۍ ئەو هەرمانا. فرەو جارایچ سەرو ئی باسا، ولە و بۊڵێ کەرۍ سەرو منەرە. فرەتەروو ئەرکو یانەیما سەرو شانا ئەڎایېمەو بێ. چەنی نماو سەحبی هۆرزێ و نانەکەی پەچێ و چایێو حازر کەرۍ تاکو ئېمە هۊرزمۍ.
گرڎ ڕوێویچ، چەنی هۆرسەیش، سۆسەنەی واڵێچم بە وەیۋڵەکێ باوشێشەو هۆرزنێ و گاوە زەردەش دێ پەنە تاکو بەرۊش پەی دلێ شوومەکەو پەشتەو کێڵەکەیما. جار جار سۆسەنە ئاڼە پەشۆکیێ وەیۋڵەکېشەرە، گاوەکېش ویر شێوە و گاوە لوێ دلێ کیارەو یانەو مامۆیم و پا جۊرە قێڕ و قاڵوو مامۆیم هۆرزنێ.
ئەرکوو باخەکەیما فرەتەرش سەرو کاک ڕەحیمیمەو بێ. دوێ تەڵانێ درێژێما بێنێ کە گرد ساڵێو کەرېشا تەماتە و سەمەرێوی فرە بەر دێنێ. ئا سالیچە تەماتێ فرێشا پۆوە بێنێ. چند ڕوێ جارێو چنێنمێشاوە و دوۍ سەوێ گەورێ تەماتێش چەنە بێنێ. کاک ڕەحیمم بەرێشا پەی تەۋېڵۍ و ئیتر فرەو خەرجوو یانەیما سەرو ئا دوە تەڵانەو تەماتەیەو بێ. کاک ڕەحیمم سەرەڕاو هەرمانە و ئەرکوو مڵکی، هەسەرێوەیچش بێ، هەم بارێ مڵکیش پەنە بەرێ و هەمیچ جار جار بارکېشای خەڵکیش پەنە کەرۍ.
کاک ڕەحیمم چند ساڵێو بۍ دڵش کناچېوەو بۍ و نەڎێنېش پەنە، سەبەبەکەیچش ئانێ بۍ چا چند ساڵەنە، پەڼۍ فرێش دەیبێنێ و چند جارێ چەنی کناچەکێ چیلا و چەولاوە دیێبێنېشا و ئیتر کاک جافر تاتەو کناچەکێ کۆتەبێ قینیەو و نەڎێش پەنە.
ئی مەسەلێ بیێبێ ۋرکێوی گەورەو تاتەیم و هەمیشە چەنی کاک ڕەحیمیم چا بارەو جەڕ و باسێشا بێنێ. فرە بەزەییم بە کاک ڕەحیمیمەرە ئەیوە، تاکو کۆچما دەگانە بێ، وەزعەش خاستەرە بێ، چوونکوم یانەو کاک جافری تاتەو (فەرخی)ۍ دەگانە هامسایما بێنێ و گرد ڕوێو دوور یا نزیک، فەرخیێ وینێ و ئاگاش جە وەزعەکێ بێ. وەلێم چا وەختەو کۆچما ئامابێ مڵکەرە، نەڎیێبېش و خەریک بۍ شێت بۊ. جار جار دەردێ دڵێ لاو منەو کەرۍ و هەلسی گنێنێنە چەماش. ڕاسەکېش من چا عەمرەنە حەز بە کناچا کەرېنێ، وەلێم پەیم سەمەرە بۍ و نەزانێنێ وەشەویسی مېیاوۆ ئا یاگێ، یۆی گراونۆ.
کاک ڕەحیمم پاسشە پەنە ئامابێ کە هیچ چېوێوی جە هیچ کەسی نەشارېوە و بە ئاشکرا ۋاچۍ تاکو مەردەی منیشوو دیاروو (فەرخیۍ)وە. من خاس زانێنێ کە فەرخییەیچ هەر ئانێنەو چند جارێ لاو منەو واتەبېش: یا هینەو خاکیەنا یا ڕەحیمی، چوونکوم فرەو جارا من بەینشانە بێنێ و قسەکاشا ئارێنێ و بەرێنێ.
ڕەزا بەهمەنی.[1]