حەمە ژەنی مارۊ
بەشۍ: دەهەمە

زیانېرە بەر، زانێنێ ئا ڕوە ئیتر وەنۊشێ مەتاوۊ وینوۆ، حەز کەرېنێ شەرمینەو مەتیێم وینوو و کوچېو دڵم هاڵی کەروو. پەی شانسوو من ئا ڕوە شەرمینەیچ نەبۍ چا. نیم سەعاتێو لا مەتی شەمعێمۆ نیشتارە و ئامانێ پیڎیمەرە.
ڕانە هیچ دڵم وەش نەبۍ، من بە چ دڵ و بارێوۆ لوابێنێ، بەڵام پاسە ناما وەرۆ کە چەمەڕاییش کەرېنێ. سەرەڕاو گردو ئا چېوا کە ڕوەشا دا، وەنۊشە لوێبێنە دلێ قووڵایی دڵیم و گردو خیاڵەکامش گرتەبێرە و بە هیچیتەری بێجگەم ئاڎۍ ویر نەکەرېنێوە.
ڕۆ زەماوڼۍ ئاما وەرۆ. ئا ڕوە چەنی ڕوەکاتەری فەرقش بۍ پەیم، دڵم پېسەو دڵو مریچڵێ دێ وەنە، وێچم نەزانێنێ چی!فرەتەر دڵە ۋرکێ ئانەیمە بێ، کەسېوە کە قەرارا بۊ بە هامسەرە و هامڕاو گردو ژیوایم، چی مشیۊ ئاڼە چەنەم شەرم کەرۊ و تەنانەت گەرەکش نەبۊ وینۆم و تەماشەم کەرۊ.
بانگو عەسریشا دا، وەیوەشا جە کەلو چناری ئاردە پیڎیمەرە. بەینو کەلو چناری تاکو دلێ دەگێ نیم سەعاتێو زیاتەر نەبۍ. ڕەفێقەکێم و جوانەکێ بە (وەیۋەی باڵابەرز) لوێ پێوای وەیۋێۋە. وەروو بەرەو یانەکەیما پانایێو بێ، خەڵک بە ژەن و پیاوە هۆرپڕێنێ. ئەڎام و واڵەکێم جە گرد کەسی زیاتەر دلێ زەماوڼەکێنە دیارێ بێنێ و ئارەقێوی فرەشا کەردەبۍ. تاتەم چەنی جەمېو جە ڕەفێقەکاش سەرو بانو وېماوە نیشتێبێنېرە و پێوەرە خوێنێ و قسێ کەرېنێ. سۆسەنە واڵە گولانەکێم گجیێوی سوور کە وېم پەی ئەسێ بۍ کەردەبېشەنە و بە زەوق و شۆقێوی کناچڵانۆ لوێ و ئەی و زوو زوو نزیکەم گنێوە و پەرسێ: کاکە حەمە کەی وەیۋە مېیاوۆ؟
وەختێو وەیۋە چەنی هامڕاکاش نزیکێ کۆتێوە، کاک ڕەحیمم لامەنە بێ، هەردویما پێوە لوایمێ پێوایشاوە. کاک ڕەحیمم وەڵتەر گرد چېوش جە بارەو ئۍ شەوی پەنە واتەبێنێ کە مشیۊ چېش کەرو. بۍ خەبەر چانەیە کە وەیۋە کێنە و چەنینەنە!
وەیوەشا سەرو هەسەرەکێوە وەزنارە. کۆپانەو هەسەرەکێ مۆجێوەی سوورەشا دێبێ ملەرە، وەختێو وەزناشارە قاچېش سڕێ بیێبێنێ و نەتاوێ هەنگامە هۊر گېرۆ.
وەیوە، فرە گولانۍ ئاما وەروو چەمام، تەنیا سەرەش جە بیبنەکەیم بەرزتەر بێ. چیروو تۊڕەکێنە خاس ڕوەش نەوینێنێ، دەسم گرتە و ئامایمێ ڕوەو یانەی. ئاڼە پەشۆکیا بێنێ کەسیتەری دۆروو وېمەنە نەوینێنێ. دماو چن هەنگاما تۆزێو ئامانێ سەرو وېم.
لام کەردۆ مڎیەو ژەنېوە چۆلاشۆ ئۆ دەسەکەش گرتێنە. ژەنەو چیشی وەختێو تەماشەم کەردە تەمام تەرسانێ، باڵاش کوڵ و پان بێ، مەمێش ئەجۍ دوێ سەرنگێنێ و سەرو سینەیشۆ ئاڵۆچیێبێنېرە، فێسێوە سەرەشۆ بێ، پڕچکەکەش تاکو سەرو تەۋېڵېش وەسەبێرە وار. گجیێوی قایمی کەوەش پۊرە بۍ و سۆخمېوی مەخمەڵی سیاوش کەردەبۍ سەرەنە. ئارەقێوی فرەش کەردەبۍ، بۊنەو درێژی ڕاکێوە، کڵو چەماش سەرو ڕوومەتیشۆ ئامابێرە وار و دوێ خەتێ سیاوېش چیروو چەماشەنە وەشێ کەردێبێنێ. فرە تووڕێ دیارە بۍ و باڵو وەیۋېش مەحکەم گرتەبێ، پاسە وېش نیشانە دێ، کە کەس بە بۍ ئیجازەو ئاڎۍ هەقو تەماشا کەردەی وەیۋېش نیا.
مەتی شەمعێم و چن ژەنێ تەرېچ چەنی وەیۋێ ئامێبێنێ. شەرمینە وەڵێ گردیەنە بۍ و هەر دوورۆ بە خوە ئاما پێوایمۆ و دەسش کەرد ملم. گردو دڵوەشیم شەرمینە بۍ، چوونکوم زانێنێ دلێ ئا جەمەو ژەنانە کە چەنی وەیۋێ ئامێبێنێ، ئاڎە جە گردی بە وەنۊشێ نزیکتەرە بێ. یەواشێوۆ لا گۊشیمەنە واتش:
حەمە گېیان خیاڵت ڕەحەت بۊ من گرد چېوم چەنی وەنۊشێ جە بارەو تۆوە باس کەردەن، هەرچن زارۆڵێنە، وەلێم ژیرە و ئاقڵەنە، مزانۊ چېش کەرۊ و چېش نەکەرۊ.
وەروو دەربازەکەیەنە تۊڕەکێ سەرو سەرەو وەیۋېم لادا. دەم و لوتێوی وەشڵانە و ڕوێوە خرتەش پۆوە بێ. دوێ جارێ وەڵتەر دیێبێم، وەلێم ئیسە فرە زەریفتەر ئاما وەروو چەمام. بە هیچ جۊرێو سەرەش هۆرنەبڕنێ تاکو دلێ چەماش وینوو، ئاڼە گرەوێبێ برژانگێش چەسپیێبێنێ یەکتریەرە. دلێ جلەکاشەنە شاریێبێوە و جلە وەیۋیەکېش فرە زلتەر جە لاشەیش بێنێ. فرە مەزڵوم دیارە بێ، وەختێو تەماشەم کەردە، دڵم سۆت پەیش و بەزەییم ئاماوە پۊرەشەرە. مەزانۇو چی ئاڼە گرەوێ بێ. هیچ حەز نەکەرېنێ وەشەویسیەکەم بۊ بە بەزەیی چەنیش.
دڵم نۆعێوش پەنە ئامابێ. وەختێو تەماشەو دەساش کەرېنێ، پەنجە باریکەکېش تەنیا تاوێنێ وەیۋڵێوە هۆرگېرا و ئیتر هیچیتەر.
ڕەزا بەهمەنی.[1]