هەرۍ دەگێ و کۆپان ۋراز
ساڵهای ساڵ چېوەڵ، گېڵناوەو ماچا، کە دەگێوە بیېنە خەڵکێوی فەقیرش چەنە ژیوان، خەڵکو ئی دەگا خنجیلانێ، فرەتەر حەیواندارۍ و مڵکدارێ بېیېنۍ، هەر بونەو ئا هەرمان و کەسپەیۆ کە بیەنشا، ساحێبێ هەر و ماهەرېوی فرەی بیېنۍ.
ساڵێوشا وەهارێوی گەرم و وەش بۊ، هەرۍ گرد جەمێ باوە قەراخو دەگێ پەی ئانەیە دۆعێوە خێری کەرا، کە ئی جارە خوڎا کۆپان ۋرازێوی تازەشا نەسیب کەرۊ، چوونکوم ئا کەسە کە چا وەختەنە کۆپانەشا پەی ورازێ، خرابش ورازێو، کۆپانەکێ مازیشا کەرۍ بە زەخم.
ۋەرو ئانەیە کە دڵێوی ساف و سادەشا بێ، دۆعاکېشا خوڎای قەبوڵە کەردەو کۆپان ورازێوی تازە ڕوەش کەردەنە ئۆ دەگاکېشا.
کۆپان ورازی تازەیچ پېسە ئەوەڵینەکەی بۍ، نەک تەنیا کۆپانەی ڕەحەتە نەورازێ، بەڵکوم خرابتەر چاڎی، جە کەلوپەل و کەرەسەو کۆپانەکا دزی کەرۍو کۆپانەکا فرە خرابتەر ورازێ، تاکو هەرمانە یاوا یاگێو کە کۆپانەی تازێ، بېژگەم زەخمو مازی، فشاریچ وزێ سەرو یاگاتەری.
هەرەکێ دیسان جەمێ بیېوەو دەسشا کەردۆ دۆعا کەردەی پەی ئامای کۆپان ورازێوی تازەتەری، ئی جارەیچە خوڎای دۆعاکېش بە یاگێ ئاردېو کۆپان ورازێوی تازەتەر ڕاش وسە ئۆ دەگاکېشا.
ئی جارەیچە دیسان شانسشا ناردو خرابتەر جە جارەکا وەڵی، کۆپان ورازێوشا پەی ئاما کە نەک تەنیا کۆپانەی خرابەو لاروگېڕە ورازێ، بەڵکوم جە کەرەسەو کۆپانەکایچ دزێ، سەرەڕاو ئانەیچە داواش کەردێبێ ئۆ ساحێبو هەرەکا کە ئاڵفو دان، نەڎا بە هەرەکاشاو بە ئاورا بازاشاوە، پەی ئانەیە کە لەڕو وشکێ باوە، تاکو بەڵکوم کۆپانەی گۆلانەتەرەشا پەی ورازۆو، جە کەرەسەو کۆپانەکا خاستەر دزی کەرۊ.
دیسان هەرۍ بە مازی زەخمینۆ و لەمەی ئاوراوە جەمێ بیېوەو بەڵام ئی جارە پەشیمان جە دۆعاکاشا، ئاوات وازێنێ ئۆ کۆپان ورازە ئەوەڵینەکەی کە چی ناشۆکریشا کەرد.
عاقیبەت پاسشا قەرار دا، کە ئی جارە جەمێ باوە نەک پېسە جارەکاتەری دۆعێ کەرا پەی فاڕیای کۆپان ورازی، بەڵکوم دۆعێ کەرا پەی ئانەیە کە خوڎا جە هەری وېشا نەجاتشا بدۆ. هاهاهاهاه! ئیتر وېتا بزاندێ کە ئی داستانە فرە ئاشنان!
ڕەزا بەهمەنی.[1]