لاچەمێوی خېرا سەرو ڕۊمانەو (دێڕ بە دێڕ حەسرەت)
بەشۍ: دوەمە
نویستەی: #هەورامان ڕۆستەمی#
تێموو داستانەکێ:
ئەوەڵوو ئی داستانێ پاسە ملۆ وەرەوە کە وانەر پاسە ئێحساس کەرۊ کە ئینە ڕۊمانېوە دژە پیا و فێمێنیستیەنە! (سارا) وەشش نمەی شوەکەیش، تەنانەت مەتاڤۆ پەی یەک جاری بڎیۆ دلێ چەماش، مەتاڤۆ نامېش دۊ واچۆ (سەعدی) هەر ماچۊ ئاغە!بەڵام بە تەشەر نەک ئاغەی هەرەقەتین.
وەروو ئانەی داستانەکێ خەتی نەلۆ وەرەوە و پەی وانەری هەم جاڵبەبۊ و هەم نەبۊ بایێسوو مانیایی وانەری، نویسەر دماو ئانەی حاڵوو ئیسەو (سارا)ی بەیان کەرۊ پەیما گۆرج فلاش بەک مڎۆ ڤنە و بەرۆماوە پەی پانزە ساڵا چیوەڵی و واوەی درێژەو داستانەکێنە وەختێو ژیوای وېش گېڵنۆوە پەی کناچەکېش دووبارە بە تکنیکوو فلاش بەکی بەرۆماوە قەدیم و واوەی فۆرواردما کەرۊوە پەی ئیسەی.
یۊ جە تایبەتمەنیا و خاڵە فرە گرنگەکاو ئی داستانێ ئانەن کە ڕاوی داستانەکێما جار جار زەمانوو ڕەوایەتی فاڕۆ، هەم تکنیک و تەوانایی وېش کېشۆ ڕۊخوو وانەریەرە و هەم نمازۊ ڕووتین سەرو یەک زەمانیەوە مەنمێوە و پەی نموونەی ماوێو جە زەمانوو حاڵیەنە باسما پەی کەرۊ جەیاگێوەنە کە گەرەکشا باسوو بابەتێوی کەرۊ پېسە بەیانش کەرۊ:
دمایی (دێڎە حەفسێ) گېڵنابېشەو، یۊ جە شەوگاروو پاییزێ بیەبێ و....یام:ئاغە جگەرەکەش چېرسیگاریەکەنە کۊشنانشەو و واتەنش:
و...
تایبەتمەنتەرین خاڵەو تێم و شێوازوو پەردازشوو ئی داستانێ ئاخرەکاو ئی ڕۊمانێن، وەختێو (سارا) کەمڵ تووشېیاروو ناوەشیەکەی بېیېنە و چېگەنە نویسەر ڕۊڵوو وېش و تەوانایی وېش هۆنەرمەندانە وستەن گڕ و بە فاڕای زوو زوو سێکانسەکاو بیمارستانی و یانەی و قسێ هەڵەت و پەڵیتێ (سارا)ی، دەمېو بەرۆمانە دلێ بیمارستانی و زوو مارۆماوە یانە. (سارا) ئینا بیمارستانەنە دوێ خەتێ وارتەرەنە ئینا یانەنە و کەمېوتەر لوەینە پەی دلێ قەبرستانی، ڕېش چەرمېو خەریکا خنیکنای خنیکنۊش، دەمېو بەرمشۊ دەسشەوە دەمېو گەرەکشا بلۆ شۊنیشەرە.
ئی فاڕای زوو زووو سێکانسەکا نیشاندەروو وەزعەی ئاڵۆزوو ساراین.
نامۍو کتېبی و ڕووبەرگ:
نامۍ کتېبی و ڕووبەرگ فرە گرنگ و بایێخدارا.بەتایبەت پەی کەسېوی یام وانەریوی کە نویسەری نمەژناسۊ ئاشناییش نېیا چنیش.
نامەکېش پەڕوو پۆسیشەنە و گېرە زیاتەریچ.بەڕاسی دێڕ بە دێڕوو ئی کتېبیە کەلاو کەرۊ جە حاڵ و وەزعەو سارای، هەر چن دماتەرەنە باسش سەر کەروو و جیاکارا جە ئەسڵوو باسەکەیما، بەڵام من ئێجیۆم فرەفرەتەر جە حەسرەتی تەوەجۆ کریان بە حاڵ و وەزعەو قارەمانوو داستانێ ئینە ئێتر سەلەقەیین و وانەر هەن پېسەو من زوو مانیۆ جە ئاڼە تەوزیحاتی و هەنیچ پنەش وەشا.
ڕووبەرگوو ئی کتېبیە بەداخەوە قسێوەش پەی واتەی نېیەنە، هەر چن هەوڵش دان وەزعەی پەشێڤۆ سارای نیشانە دۊ بەڵام من هەم وەڵێ ئەوەوانایش و هەم دمایچەوە ئاڼە ئێرتێباتم چنی نەگېرت و کریێ وەشتەربۊ و جە باری دەروونناسیەوە بڕېو ڕەنگێ و شێوازێش چنە با کە نیشاندەروو حاڵ و ڕۊو سارای با، واخوڎاش کەروەوە کە ئینە سەلیقەین.پەی نامۍ داستانێچ هەرپاسە، وانەر هەن تەنیا حەز بە یەک کەلیمەی کەرۊ، پەی نموونەی نامېش هەر حەسرەت یام سارا بېیەیا،بەڵام من وېم وەشم نامېوێ مەی کە ڕەستەیەبۊ.
‌‌ڕاوی یام زاویەو دیدی:
زاویەو دیدێ یام ڕاوی ئی داستانێ ئەوەڵ کەسا، یانېو نویسەر جە زوانی قارەمانەو داستانەکێوە پەیما باس کەرۊ، شیکاری وردش هەن ملو زەین و ڕفتاروو گردو شەخسیەتەکاوە، بە تکنیکیوی عال و ژرانەیچ جار هەن پەی نموونەی وېش جیای سەعدی قسێ کەرۊ و هەر بە ڕاوی ئەوەڵ کەس و مەفاڕۆش پەی یەرۆم کەسی کە جە نۆعوو وېشەنە پەی من جاڵب بێ.
تەنیا یەک یاگەنە کەمېو نامۆ بۍ پەی من کە وەختێو باسوو جوانی و زەریفی وېش کەرۍ کەمېو دێ دڵوو وانەریەوە کە کەسېو باسوو زەریفی بەژن و باڵاو وېش کەرۊ ، چی جۊرە یاگانە مەعموولەن ئېمە عاڎەتما کەردەن کە ڕاوی یەرۆم کەس بۊ.[1]