گېسکەکەو هەیاسی
نویستەی: #هەورامان ڕۆستەمی#
فرە ئەژنەویەنما کە ماچا من یام فڵانەکەس ئەجیۆ گێسکەکەو هەیاسیا، یانېو وەرگەو قسات و چێقە چێقیت مەگیروو.بە تایبەت ئا پیایێ کە بەڵانێسبەت ژەنێ دەمبازە و فره واچە شا هەنە! یام ژەنېوە کە پیایوی دەمباز و دژماندەرش هەن، ماچۊ من بېیەنا گێسکەکەو هەیاسی، پەی ئانەیە کە وېشا مەزڵووم نیشانە بڎا و تانێ بڎانە وەراوەرەکەیشا ئی جۆمڵێ ماچا. بزانمێ چی پی بۊنەوە نامۍ نریان و کەوتەن سەرو زوانا.
(ئەڵبەت ئی داستانێمە لاو پیاییوی قەڎیمیەوە ئەژنەویێنە و یاگێوتەرە یام کتېبێوەنە نەڎیێنەم.ڕاس و درۆش مەزانوو) .
پیاییوی قەڎیمی پەیش گېڵنانێوە کە ئۊسا، جەنابوو سۆڵتان مەحمووڎی غەزنەوی گېسکېو مڎۆ دەسو هەیاسیەوە و ماچۊش پنە: ئی گێسکە (7) کیلوێن، سالێوە مشیۊم لاتەوەبۊ و دماوە باریشەوە پەیم ڕېک پێسنە وېش. یانېو نە کیلوێو زیاڎش کەردەبۊ و نە کەم! فەرق ۋزۆ گېیانت کېشوو! ئێتر سۆڵتان مەحمووڎا و حۆکمەکېش. هەیاسیچ خۊ مەیارۆ فززە کەرۊ و بە بەڵۍ قۆربان واتەی و گێسک بە دەسو پەشتا و پەشت مزیۊرە.
کەس مەیاوۆنە ئی حوکموو جەنابوو سوڵتانیە و هاوار و داڎ لاو هەرکەسی بەرۆ، مەتاوا یاوەریش دا و ڕا و جاش پنە برمانا. تاکو ڕوێو ڕاش گنۆ لاو ڕیش چەرمیوی ژیر و بە ئاوەزی. ڕا و جاش پنە ماچۊ و هەیاسیچ بە ڕېک و پێکی بەرۊش ڕاوە تاکو ساڵەکێ ویەرۆ.
دماو ئانەیە کە واڎەو ئەوەبەردەی گێسکەکەی مېیاوۆ، هەیاس ملۆ خزمەتوو سۆڵتانی و وەختێو پیمانەش کەرا، سۆڵتان و وەزیرەکېش تەمام سەرەشا سڕ مەنۆ. سۆڵتان ئەمرە کەرۊ زووبۊرێوە جواب بزانوو چەنی تاوانت ئینەیە کەری.
هەیاسیچ لچ بەرۊوە کە قۆربان بە واتەو فڵان ڕیش چەرمەی ساحبێ تاکو نیمەڕۆ خاس وەیش کەرېنێ و نیمەڕۆدماوە وەراوەروو ۋەرگېۋیەوە بینێنېشەوە تاکو ساحبێو! بەسەزوان هەرچیش واردەبێ و لەوەڕیابێ ئەیوە لا کەلاواشەرە و ساحبێ واوەی هەمان دەسور.
ئەپېسە داستانەو گێسکەکەو هەیاسی کەوتە سەرو زوانو خەڵکی و پەی تانەو تەشەری جار جار ماچاش بە یۆترینی.
ئاواتم ئانەن کەس گێسکەکەو هەیاسی نەبۊ و وەرگیچ نەبۊ یانەشە، هەم پیا هەم ژەنی.[1]