ناونیشانی بابەت: لە شەقراوێ لۆ نەمسای/ بەشی 26
نووسینی: #ڕزگار خۆشناو#
$مونیر بەشیر چی پێ گۆتم؟$

بەشەک لە ئیمتیحانی عەمەلی ئەوە بوو کە هەموو تەلەبەک، ئەوەل جار ئێک دوو پارچە موزیقای وەک لۆنگاو سەماعی و بەشڕەف لێ بدەن، پاشان دەبا هەر تەلەبەک، ڕەقەمەکی لەناو شووشەکی دەربینی کە لەسەر مێزەکی داندرابوو، هەر ڕەقەمەکیش هی پارچە مۆزیقەکی بوو کە بێ پێشتر دیتن و تەمرین کردن، عەزف کا!
ئەمنیش ژمارەکم دەرهینا کە پارچە مۆسیقەکی مامەستا (ئیبڕاهیم ئەلعەزاوی) بوو، ئەو مامەستایە بە ڕەحمەتێ بی، مامەستایەکی زۆر زیرەک و باش بوو، دەرسی نەزەڕییاتی غەربیی پێدەگۆتین و خەریجی بەریتانیا بوو، لە عەینی وەختیش ڕەئیسی جۆقی بەغدای عەسکەری بوو، دیار بوو هەر مامەستایەک پارچە موزیقایەکی دانابوو، هەرکەسە خۆ و بەختی، ئێ کیهە مامەستای لۆ دەرچووبا، دەبوو عەزف کا!
بەران مۆزیقەی ئێکەکی وەکی (ئیبڕاهیم ئەلعەزاوی) کە لە لەندەن خیندنی مۆزیقەی تەواو کردبوو، فەڕقی هەبوو لەگەر ئێکەکی وەک ڕەحمەتی (شەعووبی ئیبڕاهیم)ی، کە مامەستای جۆزەو عازیفەکی شەعبی بوو! پارچە مۆزیقەکەم لە پێش خۆ دانا، وابزانم مەقامی نەهاوەند بوو! هەندەک تەماشام کرد و دەستم بە عەزف کرد! پارچە مۆزیقەکە کورت بوو.
کە خەلاس بووم، زۆربەیان گۆتیان، زۆر سەریعت لێ دا، دەبوو هەندەک سەبرتر لێ دەی! گۆتم یەکەم: ماتول سورعەت تەحدید نەکرایە، ئەمن حەقم هەیە بە کەیفێ خۆ لێ دەم، سەبر یا سەریع. دووەم: عادەتەن ئەگەر ئێکەک بتانی پارچە مۆزیقەک بە سەریعی باش لێ دا، ئەوە بە سەبری ئەتانی زۆر باشتریش لێ دا! کە تەماشایان کرد سورعەت نەنووسرایە! هەموو گۆتیان ڕاستەکا و حەقیان دامێ، لەگەر ئەوەش جارەکی دکەشم بە سەبری لۆ لێدان، دیار بوو ئەو جارە زۆر بەدریان بوو، هەموو چەپرەیان لۆ لێ دام!
ئەوجا منیر بەشیر هاتە جواب و داوای تەقسیمەکی ئیڕتجالیی لێ کردم و ئەمنیش لە خوام دەویست، شتەکی وام لێ تەلەب کەن کە لەکنە من گەلەک مهیم بوو، لە پێش مونیر بەشیری و ئەو لوجنەی گەورەی کە هەموو مامەستاکانی مەعهەدی تێدابوو شتەکی بە کەیفێ خۆ عەزف کەی، دەستم بە تەقسیمەکی مەقامی بەیات کرد، زۆر بە فەخرەوە لێمەدا و چوومە جەواب و هەندەک تەحویلاتم تیدا کردوو زوو خەلاسم کرد! هەموو گۆتیان عافەرین، زۆربەیان بەو ڕوحیەتە #کورد#یە ڕەسەن و خۆش و بە تامە شاگەشکە بوون! بەس مونیر بەشیر نەبی، کە چەپرەشی لۆ لێ نەدام و هاتە جواب و گوتی: ڕوحییەتەکەت زۆر کوردییە!
ئەمنیش گۆتم: لۆ ڕوحییەتی کوردی عیڕاقی نیە؟
گۆتی: با بەران باشترە ڕوحییەتەکی عیڕاقی سڕف بی!
گوتم: ”ئوستاز، برێ ڕوحییەتەکی عەرەبیی سڕف بی!“
نەک هەر ئەمن، بەرکوو دیار بوو هەندەک لە مامەستاکانیش، ئەو قسەی مونیر بەشیریان بە دری نەبوو، ئینتیزاریشیان ناکرد، تەلەبەک بەرامبەر عازف عوودی ڕەقەم ئێکی عیڕاق و مودیر عامەکی گەورە و گران، ئەو قسانە بکا! ئەمن بەو شەش سارەی مەعهەدی، مونیر بەشیرم زۆر باش ناسی! وەختی بەعسیەکان حوکمی عیڕاقیانەکرد، مونیر بەشیر گەڕاوە عیڕاق و لۆ مەوقیع و پارەی تەوقیعی کرد و بوە مودیرعامی دائیرەی شوئونی فەنی لە وەزاڕەتی سەقافە و شەباب، ئەو وەختی مهیمترین دائیرەی مۆزیقەی بوو لە عیڕاق!
ڕاستە مونیر بەشیر عازیف عودەکی زۆر باش بوو، بەران کابرایەکی هەتا برێی ڕوح گەورە و لەخۆڕازی و حەسوود بوو! هەتا کەیفی بە ڕەحمەتی جەمیل بەشیری براشی نەدەهات کە هەم لە عەزف و هەم لە شەخسییەتیش زۆر لە مونیری برای باشتر بوو! هەرچەندە لە ئێک داک و بابی بوون، بەران مونیر زۆر موحارەبەی دەکرد و نەیدەهێشت حەفلەی عودی بکات، هەتا لێنەگەڕا لە مەعهەدی دیڕاساتی نەغەمی ببیتە مامەستای عوودی، کە ئەو سەردەمی لەکنە من بێ مونافیس، باشترین و بەقوەتترین عازف و مامەستای عوودی بوو لە عیڕاق. یەک دوو جار سەردانی مەعهەدی کرد، بەران دیار بوو، مونیر حەزی لەوەش نەبوو سەردانی مەعهەدیش بکا!
جەمیل بەشیر بە گەنجی بە کوردی گۆرانیەگۆتن و زۆر پارچە مۆزیقەی کوردیی لێدایە لە ئیزاعەی کوردی، لەگەر زۆر موتڕبی کورد مۆزیقەی لێدایە، چ عوود چ کەمان! جەمیل ئەوەندە حەزی لە ڕوحییەتی کوردی بوو، هەتا ئەو حەدەی خۆی بە کورد دادەنا! بەران مونیری برای بەس خزمەتی مۆزیقەی عەرەبی و مەقاماتی عیڕاقیی کرد! جونەیدی کوڕی جەمیل بەشیری ڕەحمەتی لۆی گێڕامۆ کە وەختی خۆی بابی عوودەکی زۆر باش و گرانی لێ بزر ببوو، یا برێین لێی دزرابوو! پاش ماوەکی گەلەک زۆر، عوودەکەی لە لای مونیری برای دیتبۆوە! سەروەختەکی لە بەغدایێ، مونیر بەشیریان بە دکتۆر ناوەهینا! هەتا پاشان کەشف بوو کە ئەو نە شەهادەی ماجستێر و نە دکتۆرای هەیە!
پاشماوەی هێشتا مایە![1]

تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!