چەنی کتېبی باڵا کەرمۍ
بۊنەو خاڵاتوو کتېبوو ساڵەو کوردستانی
ماچا فڵانە کەسی وات: تەمەدۊن وەختیێ دەسش پەنە کەرد هەکە خەڵک یاوانە مەشیۆ جیاتی تاپیرا جە کەلیما ئیستیفاڎە بکەرۊن. یام بە واتاتێوەتەر؛ جیاتێو مەچۆڵا و هېزوو شانا، جە کەلیما و هېزوو زوانی ئیستیفاڎە کەرۊن. ئینە یانېو پەردەچیای لاو دەسەڵاتوو ویری و مەژگی و ئەنەفکریایەرە. چونکووم زوان تافگەو ئەندێشەیەن و کەلیمێ؛ هورقوڵیاو مەژگی.
ڕەنگە پارچە شێعرەو هورموزگانی جە ئەچیمنە ویرێوە خولقیێبۆ. یام ئا گرد بەرهەمێ و ئا لێشاوە کەلیمێ جە ماوەو ئی هەزاران ساڵانەو جە سەرچەمەو ئی فەرهەنگیەوە، مجیێنێنە دلێو مەیڎانوو فەرهەنگوو بەشەرییەتی. باڵوڵەکێ، دایە خەزانەکێ، جەهان ئاراکێ، مەستوورەکێ، مەولەوی و بېسارانیەکێ، ...کێ! ئینێ هەرکام ئەڵقێوەنێ هەکە وەڵەفەکاو مەنەیۊ و پێوەرە بېیەی میللەتێوە بەرینیشا هاملک، هەمچارە و تارێخدار کەردێنێ.
هەر ئانەن ئی فەرهەنگە هەر جە دێرین زەمانۆ چەنی کەلیما و زوانی و ویری و ئەنەفکریای هامدەم بېیەن و قەوارەش گېرتەن. ئی ڕۆتە هەر چا وەختۆ تاکو ئیسە درێژەش بېیەن وبۊش.
سەرکۆتەی و پلەمەنڎ بېیەی بەرهەمێوە گورجانە و سەردەمیانەو ڕۊڵێوە پەروەردەکریاو ئی فەرهەنگی جە بەرنامەو کتیبوو ساڵێنە. درێژەبەخشوو ئی کاروانی و درکنەروو ئی نیشانانە.
سەرکۆتەی کتېبوو (ئەفسانەهای دیار ما) بە قەڵەموو (کوورش ئەمینی) جە یەرۆمین دەورەو کتېبوو ساڵەو کوردستانی هېمایېوە دڵوەشکەرا و مزانیو بەردەوامیی ڕۆتوو ئاوەزی و ئەنەیاوایەنە مڎۆ.
بەڵۍ فەرهەنگ یانېو ئینە. حەر ئانەن نە ئاشوور، نە یۆنانی، نە عەرەب، نە مەغوول و... نەتاوانشان ڕیشکەن و بنبڕش بکەران. ئانەن کە ماچوو ئېمە بە کەلیما گۆچ کریێنمێ و چەنی کتیبی باڵا کەرمۍ . ئینەچ پەی فەرهەنگی یاگێو شانازین.
ڕەئوف.م.[1]