یاڎو قەڎییمیا
بەشۍ: یەرەمە
گرمەو دەهۆڵی لەمەو پیای وزیرە، قریوەو سەرچوپی ئا دەرەشە ئاردەبی نەعرەتانی. توزەو زرمەو پەیاو هورپڕاو جوانەکا سەرو ماوەزایۆ سەیش کەردیبی. چی دلیچەنە دەنگو گوڵەکەم نەخشانمی بەدەنگو ئوسمانەی و لولەکی قالەزیتەی جار جاریو شەماڵ دیش گوش و ڕاویەریەرە. تەڵانەکی پاچاڵگایەنە، پیدەسو پۆدەسەرە مشکی بەسەری بە هۆرامیانە لەمەشا وادینی و نەرم نەرم یاگی ویشانە هورپرینی. تاقمەو ژەنایچ پۆدەسەرە سەڵتە و کەواشا کەردەبی لارەو پوشینی ڕەنگاو ڕەنگۍ و فیسی گوڵەنگداریشا کەردیبینی لاسەرەیشارە، فرە بەشەرمو حەیاوە هورپڕاو ویشا ئەرمانینی.
تەڵانەو تەختەو (پاچاڵگای) بەڵخە، وەرو دەگێنە جمەش ئێ چەنی هورپڕاو خۆڵکی. ماباقی مەخلوقیچ تانا سەرو بانو هانەیۊ و تانایچ سەرو پاسارو تەڵانەکاوە نیشتیبینیرە و تەماشەو هورپڕای کەرینی. هەرکەس چەنی دوسو ئەحبابو ویش گروپیوش وەشکەردەبی. چین و فەقیریو چین و دۆڵەمەنی و بەگ و مسکین و کریکارو هیتیار گرد پیوە تیکەڵی بییبینبی. هیچ غەرەزیوی سیاسی یان کۊمەڵایەتی نەبی. گردو بەڵخەی پسە یەک خېزانی گۆرەی پاچاڵگانە ئاڕوە کەیفکەری.
یو جە خانمە سەلارەکاو ئاوەختیە ئەڎاو مەرحومو مام مەحمودی بی (مەحمود بەگو بەڵخەی) بەنامی خاتو (سەراحی)، خاتو سەراحیە ژەنیوەی گۆری و کەسایەتیوی بەرزش بی، وەرو حورمەتی خانەوادەگیش ڕیزیوی تایبەتش بی. جارو بار یاگی پەرسو ڕاو ژەنابی. لوێ هەریاگیو مەجلیسەکە تەکانیوە دینە ویش. خاتو سەراحیە ئاڼە پەرمی ویشەرەو بڕواش بە ویش بی سوعبەتیچ چەنی پیایا کەری.
لالو ئۆلغەفوریچ پېیێوی فرە ڕوح سوک و قسەوەش بی. قەدوباڵێوی کوڵی پتەوش بی. میوبڕیوی عەجایب بی. جارو باریچ یەرەقی تاشی و دەسو دارتاشیش بی. مشاریوی لاری گولانەش بی کە تایبە پەی میوبڕیەی کەریش چیرو بیبنەکەیشەرە ، ڕیک پاڵو دارجگەرەکەیشەرە.
لالو ئۆلغەفور ئاڕوە پاچاڵگانە چەنی هورپڕای، ئارامش نەبی. جە هورپڕای مانیا، ئارەقیوی فرەش کەردەبی، چوخوڕانکەکەیشۆ دابیشۆ بەر، ئاما سەرۆکوی تاکو چوڕیو ئاوی کەرو دەمشو بلوە دەمو هورپڕاکەیشۆ. خلە خل نەمدرا تاکو ئاما دلی ئا پیڕەو ژەنا کە خاتو سەراحیەش چەنەبی.سڵامیوش دا حازریا، باڎیە ئاویو نریابیرە دلیڕاسەو ژەنەکانە بە هەناسەبڕکی نیاش سەرەشۆ، وەختیو کنیاوە بە دەسە زبرەکاش لچیش ئەسەڕییشو گەرەکش بی بلو، خاتو سەراحیی ناست بلو.
خاتو سەراحی وات: لالو ئۆلغەفور!!
لالو ئۆلغەفور: بەڵە قوربان خاتو سەراحی، فرە بەشۆقۆ مدرا پەی پرسیاریوی یان هەرمانیوی.
خاتو سەراحیە: ئانە وەختیو پیێ هورپڕا چیوشا (گ....شا) شوکیوە؟
لالو ئۆلغەفور فرە زوو ئاماوە دەسی و واتش: ئەی قوربان بیقەزابی، ئێ ئا قریوە هنو چیشېیا.
لالو ئۆلغەفور ئینەشە واتو ئۆدما، سەرۆچیر بیۆ دیسان پەی یاگی هورپڕاکەی.
پاچاڵگا: ماوەزێوی گۆرەن ئینا وەرو دەگاو بەڵخەیەنە جارا چابنەو وەزانە خەڵکو بەڵخەی خەتەنەسوران و زەماوەڼە کەرېنۍ.[1]