نانیشانی هۆنراوە: قەڵەمێک و مشتێ وشە و تۆ شک دەبەم
نووسەر: #حەمە ئەحمەد جاف#
منی برین
لێوانلێو لەخەمی زەردی
پاییزێکی پڕ لەوەرین
منی گۆچان
هەنگاوی ڕێی ،..
هەوارێکی چۆڵ و وێران
منی ماندوو
زامێکم لە جەستەی سڕی پیرە مێژوو
منی مێژوو
تازیە بار بۆ کۆچی شاخ و ..
جەرگی سووتاوی داربەڕوو !
منی سیخناخ
تازیەبار بۆکۆچی شارو
مەرگی بووکی سپی لوتکەی
نێو کەژاوەی شەکەتی شاخ
**
باوانەکەم
ئێستا لێرە
قەڵەمێک و مشتێ وشەو
(شنەی شیعرو تۆ شک دەبەم)*
تۆش وەرەو تەنیاییم بەرە
لەم وڵاتە بێ کیشوەرو
لەو نیشتیمانە شەکەت و بێ لەمپەرە
**
دڵ و گیانم
ڕۆشنایی شەمی شەوانی شیعرەکانم
وەرەتاوێ
تاومدەوە بەرەوژیان
بمبەوە بۆ
مەئوای مەیلی هەست وتاسە
تەنیاییم بەرەو..
بمدەوە
بەرشیبای شیعرو هەناسە
هەناسەی تۆ
هەناسەی حەزی تامەزرۆ
هەناسەیەک
لەدرزی پەنجەرەی چرپەو
نیگای چاوی نیشتیماندا
لەگەڵ پاییزدا هەڵوەری !
هەناسەی دڵێکی گەرمی پڕ لەپشکۆ
پشکۆیەک
جێماولەکوانووی،..
هەواری چۆڵی جێژوانی
نیشتیمانێکی کۆچەری!
***
دڵ و گیانم
ڕۆشنایی شەمی شەوانی شیعرەکانم
تۆ تەهلیلەو..
زیکری دەروێشانی عیشق و
هاژەو سەدای
لایلایەی شەپۆلی چەم و
چپەی ژوان و
پەپوولەی سووتاوی شەمی شەوانمی !
بێشکەی نیشتیمانی خۆرو
هەلۆرکەی ژیان و ژوانمی !
هەرچەندە دوورو لێم ونی
وەلێ تۆ هەتوانی زام و
سەرکۆماری خاکی عیشق و
نیشتیمانی شیعری منی !
**
منی ئازار
منی بێ نیشتیمان و وار
زامێکم لە جەستەی سڕی پیرە مێژوو
بۆیە تەنیا
لەنیشتیمانی شیرینی
عیشقی ناکامی زین ومەم
(شنەی شیعرو تۆ شک دەبەم)*
زۆردەمێکە
حەزی هەڵچووم
بووکی سووری دەواری سپی ئارەزووم
مەستی ئاوێزەی سەرنج و
سیمای جوانیی
حەزێکی عەجول و هەڵچووی بێ ئامانە !
جووتە مۆمی داگیرساوی
سەرسینەی ئەوین و تاسەت
لە پێشوازی
مەرگی شەوەزەنگی تاری نیشتیمانە !
حەزی هەڵچوو
بۆ بووکی سەوزی دەواری سپی مێژوو
ئەومێژووەی
مێژووی من دەنووسێتەوە !
ئەومێژووەی عەیامێکە
بەدوای نیشتیمانی وندا
دەگەڕێ و نایبینێتەوە!
نیشتیمانێک
ڕۆحی زیندووی خاک و..
هەنگاوی ڕێناسی بێ پێناسە
نیشتیمانێک
شنەی شیعری عیشق و جوانیی
بەژیان دەبەخشێ هەناسە
***
ئەم ئێوارەیەش..
لەنیگای پاییزانەی
تاوسە ژنێکی شیعرەوە
ڕەوەندییەک
لەسینەی هایکۆی نەوسن و..
حوجرەی شیعرێکی عەییاردا
مەحوی ئاسا
لە حزوری تەسەوف و
لەسیمای عەرشی ئاسمانی !
لە ئێوارەپاییزی قەڵای هەولێرو
شیعرێکی ئەسمەری ڕوانی !
***
ئەمشەو شیعر..
لەنیشتیمانی ڕەنگاڵەی
قەڵەم و فڵچەو تابلۆدا
لەدیداری زەردەخەنەو..
سووراوی ئێوارەیەکی
نیگاگەرمی ژیلەمۆدا
هایکۆیەکی پاییزانەی
ژنەڕەوەندییەکی شیعرچن!
ڕۆمانێک لە ژوانی ماچی
لە ئەوکی ئاڵی جێژوانی
ئێوارەیەکی پەمەیی،
پیرەشیعرێکی بەرقەڵای
پیرە هەولێردا نووسیەوە!
دوودەستی عەجوول و نەوسن
باوەشێک و..
لێوێکی ئاڵی پڕ سوراو
مۆری ماچێکی شیرینی ،..
بەسەرلێومەوە بەجێهێشت !
**
ئێستاش منی ئازار چەشتوو
منی بێوارو بێ مەوتەن
زامێکم لە جەستەی مێژوو
لە نیشتیمانی زیل و بەم
(تەنیا شیعرو تۆ شک دەبەم)*
گوڵم ئەتۆش
لەدوادیداری ئێوارەی
ژوانی شیعرێکەوە
هاتی و..
پەیامی خەمێکی سپی و
لوێچێ ماچ و زەردەخەنەت
گەیاندە ژوانی لێوانم
هاتی و ..
هەگبەیەک هەڵوێست و
نامەیەک لە سیمای شاخ و
هەنگاوی سەرنجی شارت
دایە دەستی نیشتیمانم
دڵ وگیانم
لەوڕۆژەوە
تەنیاییمت
لە نیگای گەرمی سۆماتا
تواندۆتەوە و
هاتیەوە ناو نیشتیمانی خەونەکانم !
دڵ و گیانم
لەوڕۆژەوە
تەزووی عیشق و خۆشەویستیت
گەڕاندەوە ناو ژیانم! [1]
=KTML_Bold=ئەونیوە دێڕەی ناوکەوانەکە لەشیعرێکی مەهاباد قەرەداخی شاعیر وەرگیراوە=KTML_End=