پەی ئاسمانی بېیەی مامۊسای جەمیلی
نویستەی :#ئومێد حەبیبی#
هەوازەی نەبیەت
هەتیمی سیاوچەمانەی
و حەوزەلارېو زۆخاوێ
هەواڵیوی کتوپڕ، جەرگبڕ و هەزار کەڕەتێ دڵ ئێشن
مامۊسا جەمیل ئەحمەدی ئۊسا دیواری هێقموو یانەو گۊرانیێ هۆرامیێ، نۆسووڎەٚەو ئاواتە بەرزەکاشەنە پەی هەتاهەتای دنیاو حەسرەتە ئەوەنەبڕیاکاش ئاستش جیا و پێسنە پەلەوەریوی بۍ نازی باڵێش گېرتێوە پەی حەوت ئاسمانەو هۆنەری.
پەی خەڵکوو هۆرامانی، پەی گۊرانیەواچاو هۆرامانی و پەی کۊمەڵگای هۆنەری کورڎەسانی هەواڵیوی ناوەش و قۆرس بێ.
نەواچیا دیارا هەر نەتەوێو حەنەرێوش هەن تایبەو وېشا و مەلیڤیۆ پەی کۊماڵێوەتەرێ پاسنە هەرمانێوەشبۊ مەر لاسایێش کەرۊوە، حەنەروو وەڵاتە پەڕ ڕەمز و ڕازەکاو هۆرامانیچ هەوازە سەربەرزەکەو سیاوچەمانەن.
سیاوچەمانە نزانی هۆنەروو وەڵاتیویا کە میدیانە بە گرڎوو سەخڵەتیا و وەربەس و وەرپەنگاشەوە ژیوان و پاڵو لاوک و حەیران و هۆرەی، لاپاڵو زاگرۆسوو سۆڵاوەکاشاوە قۆڵێ ئێنسانی و هۆنەریش کەرڎێنێنە قۆڵێ یەکترینی تاکو ژیوای هامبەششا ئامێتێوبۊ جە هۆنەری و جوانخاسی و جوانخاس ڤینای هۆنەرمەنداش.یەکەم چېوێو شۆنۆ ئەژنەویای نامۍو هۆرامانی مەینە ویروو وەردەنگی سیاوچەمانە و ورڎەبەزمێ ئۊسا دەنگ وەشەکاشا، ئا مامۊسا چنەزانێ و حاڵ زانێ کە هەرڎ و کەش و کۊ وەڵاتیشا پنە لاڤنانەوە و خەم و خەفەتشا دان گۊشێ نیشتمانیەرە.
یۆ چا مامۊسا دەنگ وەشاو هۆنەروو گۊرانیێ هۆرامانیە کە ساڵانیوی هۆنەری بریقەدارش ویاراره مامۊسا جەمیل ئەحمەدی ئەژناسیا بە جەمیل نەوسوڎی بێ.
ساڵانێو لیکموو شانازی و شابازی.
ساڵانێو هۆرگیروو پاشەکەوتێو بە بارەسای شاهۆی شاهۆبەی.
ساڵانێو زانایی بە گازرەو تەمەنێو ئاواتێ گا نامای
ساڵانێو پەڕ جە شارەزایی و شاکاری.
ساڵانێو تێکەڵوو حەزیوی بەرزی و هەوازێوی غەیبی جە ئاسمانوو پیرەکاو هۆرامانی.
جەمیلوو چەپڵەڕېزانوو شاڎیەکا
جەمیلوو ورڎەبەزمە ئاهوورایەکا.
جەمیلێو ماواو حەوزەلارەینە چەمېش دنیاشا دی.
ماواو ئەلیلەی و مامۊ کامیلی و پایەبەرزەکاو نەوسوڎێ و شۆشمێ.
جەمیلێو بە هەوازەی حەنەریش کۆگاو سیاوچەمانەیش هەتیم نەوست و نەما لوسێ تاکو هەتیمی و مەینەتوو نیشتمانێو پەڕاوپەڕوو ئاواتە بەرزا نەڤینۆ.
مەلۆ ویرمەنە هۆرامیبۊ و هۆرامانەنە ژیوابۊ و بە دەنگو ئاڎی سەرمەس جە گەورەییش خولێوە دەسەملانوو وەشیێوی بۍ حەننا نەبیەبۆ.
بێ هیچ شکێوە جەمیلێوتەر ئەڎا مەڤینۊشەوە و ئینەنە وەرێژ پەی ئېمەمانا کە مزانمۍ ئاڎ وەش مەبۊوە و یاگێش هەرگیزاوهەرگیز پەڕە مەبۊوە و....
داخێوە کە بەرەکۆ خەمەوەرا و دڵسۆچناو هۆنەروو هۆرامانی وەر مەڎۆ ئانێنە کە چی مشیۊم هۆنەرمەندێش و گەورەپیاکېش ئەوپەڕوو کەساسی و ئەوەنەپرسایەنە دنیای بازا جیا و هیچکەس لاشا نەکەرۊوە لا! ئاڎیچ چی ئاژێنە کە شۆنۆ ئاڎیشارە خەریکا هەروەرەنە و وارەبەوارە سیاوچەمانە دلېنە مشەی مشۊ چوونکەتی ئێتر کەس نېیا بە شارەزایی ئاڎیشا ئا تەشک گۊرانیێ واچۆوە.
ئای ئای ئای
نە ئاکادێمیڤ نریارە پەی فێر کەرڎەی و بار ئارڎەی حەزپنەکەراو گۊرانیێ هۆرامیێ، تاکو زەمانێو ئا ئاڵتوونێ مەنێنێ چنەشا کەڵک هۆرگېرمێ.
مامۊسا جەمیل لوا، هەرچن دەنگش هەتاهەتان مەنۆوە بەڵام شارەزاییش چنی هەزاران ئاخێش واشیشا کەرڎە خاکو پیرۊزوو نیشینگەو ژیرلارە
بێ ئانەیە ئا تۆشەبەرۆ زانایە کۊڵێشەوە گېرمێرە!
بێ ئانەیە پەرسمێش چنە هۆنەروو وەڵاتی چېشش قەرەتا و کەلەبەرەکاش گېرمێ و باروومش هەرۆڵ نازمێ!
ئیسە کە مامۊسا جەمیلی نازاری و دەنگ نازاری ئاستیمێ جیا با وەڵێ ئانەینە جەمیلێوتەر بۍ دەنگیێوی جەمیل ئاسایەنە!بازۆماوە چنی هەمماروو مێراقوو نەبېیەیش، با هاگاما هۆنەرمەندەکامابۊ، گۊش دەیمێ داڵغە و دڵەچرکەکاشا، گۊش دارمێنە قسەکاشا و بزانمێ ئاڎێ پا گرڎوو تەجرۆباوە چېش ماچا پەی ترۆق و ئەوەتەنای هۆنەروو هۆرامانی.
فیلسووفیوی گەورە ماچۊ: پەی ئەژناسای پیایوی لەیڎەی تەماشەو شناسنامەکەیش کەرا و پەی ئەژناسای هەر نەتەوێویچ چەمۍ بڕانە زانا و نویسەر و هۆنەرمەنداش.
ئایا ئېمە پێسنە هۆرامیا چەمۍما بڕیێنێنە زانا و نویسەر و هۆنەرمەندەکاما؟
ئایا بېیەی نامۍو مامۊسا جەمیل و هۆنەرمەندەکاو هۆرامانی خەزێنێوی گەورە نېیا پەی وەڵاتی؟
دەی با هاگاما گەورەکامابۊ و تاکو زەمانێو ئینای ژیواینە و پاڵمانە هەناسەو مێراقا هۆرکېشا بلمێ پێوایشاوە، ئێحتێرامشا گېرمێ، جە کەلوپەلەکەیشا مووزه وەش کەرمۍ، مووزێو ئاستوو بەرزی ئاڎیشانەبۊ تاکو وەڵات بە نامۍ گەورێ ئاڎیشاوە نامۍش کۊرە نەبۊوە.
هەرمانە هۆنەریەکاشا هۆرگېرمێ و پارێزنمێشا.
ئەر نەوارێوی دەمیشا هەنما دەیمێش دەسو لایەنگیرە هەرەقەتیناو هۆنەروو هۆرامانی تاکو بە پارێزەوە وەڵاش کەراوە تاکو هەم جە فەوتیای ڕۊزگارێشا کەرمۍ هەمیچ قەبارەو هۆنەریما بەرزتەر کەرمۍ.
مامۊسا گېیان ئارام و ئەهوەن بووسە، سپاس پەی تەمەنیوی چنی تۊ ڤیارامارە و ونەگۊشێ چریکەی حەنەریت بێنمێ.
یاڎت هەرمان.[1]