کورد دلۍ چەرخەکا تاریخینە
بەشۍ: سەڎ و چلەمە
نویستەی: #هاوڕێ باخەوان#
ساڵەو (1820ز)
* تاریخو (27-04-1820ز)، ئەچی ڕوەنە میستەر ڕیچ سەردای (ئەسکی کفری)ش کەردەن، بڕێ وشکنایۍ و هۊرکۊڵیێش چەنەکەردەن، کە ئەنجامەنە ژمارێ گۊزۍ و دیزېش ئېستېنێ.
* تاریخو مانگەو پەنجو ئی ساڵېنە، یانی (00-05-1820ز) ئەڎاو مەحمووڎ پاڎشاو بابانی سەردای بەغڎایش کەردەن پەی گفت وگۊی چەنی داوڎ پاڎشاو والی بەغڎای.
* تاریخو (05-05-1820ز) میستەر ڕیچ مەیاوۊ دەربەڼو بازیانی و سەرنجەو ئانەیە مڎۊن هەکە دلۍ دەربەڼەکەینە یانێوە گولانە و کەلاوێوە چوارگۊشۍ کۊنە و سەکۋێ و شۊنەوارو گومەزێ خڕی و چن بیرە ئاوێش چەنەنۍ.
* تاریخو (08-05-1820ز) میستەر ڕیچ مەیاوۊ نزیکو سلێمانی و بنەو بارگە هۊرمڎۊو دمانیمەڕۊ مەحمووڎ پاڎشاو بابانی ملۊ پەی پېشوازیش و خېرئامایش کەرۊن.
* تاریخو (09-05-1820ز)ینە میستەر ڕیچ پلەو گەرمی سەرچناری نزیک بە سلێمانیش پیمان پی تەرزە: دەمژمار پەنجو ساعبی سېڼزە پلۍ سەڎی، دۋۍ دمانیمەڕۊی ویس و شش پلۍ و دەو شەوۍ شاڼزە پلۍ سەڎی بییەن.
* تاریخو (10-05-1820ز) ئی ڕوە میستەر ڕیچ پلۍ گەرمی شارو سلێمانیش پیمان پی تەرزە بېیەن:
دەمژمار پەنجو ساعبی حەڤڎە پلۍ سەڎی و یەرۍ و نیمو دمانیمەڕۊی ویس و چوار پلۍ و دەو شەوۍ ویس پلۍ بییەن.[1]