بە تاوانو کناچە بییەیم
بەشۍ: دوەمە
هۆرئەوەگېڵنای: گوڵزار شەریفی
پام نېیا وانگای ڕانموونی هەوڵی فرەتەر دێنا پەی دەرسیم. حەر ئا ساڵە ئەڎام لەمە پەڕە بیەوە و دیسان بېیانیوە ساحێبوو براڵێو تەری. واچېنی خوڎا دەنگو دوعایەکانوو بابەیمش ئەژنەویێبێنێ و دوێ کوڕێ ئێزافێ کریای بە بنەیانەو ئېمە. بە ئامای دووهەم براڵەیم بابەم فرەفرە وەشحاڵ بی. دەور و بەروو ئەڎایمەرە خۆلەش ئێ و یاوېش پۊرە و دایېمە دەس وەشیش چەنە کەرۍ هەکە ئەوجاخش ڕۊشنە کەردێنەوە. نمەزانو گاهەز بابەم هەقەش بۊ و حەز نەکەرۊ ئا ماڵ و ئەمواڵشە گنۆ دەسو غەریبەی، بەڵام چا بەینە من چ گوناحێوەم کەردەبۍ؟ منێو کە تەنانەت حەسرەتوو یەک کەڕەت چڕیەی نامېم بە دەمو بابەیموە نریابێ دڵم. بۊنەو ئانەیوە بېیەیم سەلەمنوو بە بابەیم، گردو هەوڵیم دێنێ پەی دەرسەکام نمرەی عال گېروو. شوکروو خوڎای وریای بێنێ گردو دەرسەکام بە معادڵوو 20/یوە تەمامنای.
وەختێو بەڵگەو قەبووڵیەکەیم بە زەوقێو فرەوە نیشانەو بابەیم دام. بابەم ئەسڵەن پەیش گرینگ نەبۍ و واتش: خاس دەی ئینەبۊ بە چېش؟ ئاخرش مشۊم بلی یانەو شووی و زاڕۆڵێت با و یانەڎاریش پەی کەری. موهێم موحەمەد و ڕەزانێ بتاوا خاس دەرس بوانا. ئەڎام بە چەم و برۆ ئیشارەتێوەش کەرد پەی بابەیم تاکو قسێش بڕۊ، بەڵام بابەم حەر بە قساش درێژەش دا و بە ئەڎایم واتش: ئاخر تۊ چېش ماچی ژەنەکێ؟ کناچێوە کە دەرس بوانۆ و بلۆ بەروە کەس نمەتاو وەرش گېرۆ. زوانش درێژبۊ پەی شوویش و نمەتاۋۊ شووداریچ کەرۊ. تویچ بە یاگێ پاڵپەشتی کەردەیش بڕېو هەرمانێ فێرەش کەرە تاکو ئارۊ و سەوای تەف و لەحنەتێت پەی نەکیانا. ئەڎام فرە بە جدی بە بابەیم واتش: ئەر نمەزانی ئیسە ماچووت ئانەیە بزانە، پاییزە تاکو نەبۊ بە دوکترە نمازوو شوو کەرۊ، من کە شانسم نەبۍ ناسشا دەرسم بوانوو بېیاو پا ئاواتێمە، بەڵام پاییزە مشۊم حەتمەن ئڼە بوانۆ تابۊ بە دوکترە. بابەم پا قسێ ئەڎایمە فرە ناڕەحەت بی و ئێتر حیچش نەوات، منیچ سەرم وستەرە و لوانی هوڎەکەو وېم.
پام نېیا وانگای دلێڕاسین، هەمبۊنەو زەریفموە و هەمیچ دەوڵەمەڼی بابەیموە داواکارېم دەورەشا دانۍ، بەڵام ئەڎام بێ‌ئانەیە هەرمانۍو کەرۊ بابەم بزانۆ گردی جواب کەرۍ و واچۍ: پاییزە مشۊم دەرس بوانۆ. ئاخرین ڕۊ ئێمتێحانی ساڵ ئەوەڵوو وانگای دلێڕاسینیم بێ، سەرسوحانێوە لوانی ئێمتێحانم دا و گېڵانیوە پەی یانەی. تاکو یاوانیوە یانە شماڵوە زەنگشا دا پەی ئەڎایم و واتشا: حاڵوو ئەڎا گەورێم خاس نېیەن. ئەڎام فرە ناڕەحەتە بیە و پەشۆکیا، پەلە پەل زەنگش دا پەی بابەیم واتش: زوو وېت بېیاونەوە یانە، ئەڎام حاڵش خاس نېیەن مشۊم بلمێوە پەی شماڵی. بابەیچم پەلەپەل وېش یاونا و کەوتێ ڕا. ئەڎام موحەمەدش ئەسپارا بە من و ڕەزاشا بەرد چەنی وېشا. شۊنی یەرێ چوار سەعاتارە نەمام گووشی زەنگم دا پەی ئەڎایم تاکو هەواڵوو ئەڎا گەورێم پەرسوو، چی مەگیرە گووشیش کوشېیانوە، گووشیەکەو بابەیمم گېرت ئاڎیچ دەسڕەسەنە نەبۍ، پەلەپەل شمارەکەو یانەو ئەڎا گەورێچم گېرتم، دیسان کەسی جوابش نەڎاوە.
تا دەوروو عەسری حەر شمارێم گېرتێ، بەڵام کەس جوابش نەڎانیوە. خەفەتی گېرتانی و حەساوی پەشۆکیای بێنێ، نەزانێنا چېش کەروو؟
گووشی دلۍ دەسیمەنە وەقرەم بڕیابێ، حەر ئێنا و لوێنا. گەرەکم بۍ زەنگ بڎەو پەی مامۆویم کتووپڕ زەنگوو بەرەو یانەی دریا، بە پەلە وېم یاونا لاو ئایفۆنەکەی واتم: کېنی؟ دەنگو مامۆویم کەوت گۊشم و واتش: پاییزە گېیان، من گەرەکمەن بلوو پەی شماڵی شمەیچ جمدێرە بەیدۍ چەنیم. واتم: پەی چێ؟ چېش بېیەن؟
مامۆویچم واتش: بابەت زەنگش پەی دانی واتش ئیسە کە گەرەکتەن بەی پەی شماڵی زاڕۆڵەکاو ئېمەیچ بارە چەنی وېت. فەقەت کرژ جمدېوە و بەیدېرە واری.
چەنی مامۆویم کەوتێمێ ڕا، مامۆم فرە تن خۆڕێنە ماشینەکەیش، حەر وەخت گەرەکم بېیایا واچوو نەختێو یەواشتەر خۆڕەنە، بە حورسێو فرەوە، تنتەر پا نیێ ملو گازەکەیرە، وەختێو یاوایمێ لوا وەروو بەرەو نەوەشخانېوەنە مدرا. بە سەرە سڕمەنایوە واتم: مامۆ!
پەی چێ ئیگە؟
مامۆم واتش: ڕاسەکېش.[1]