بە تاوانو کناچە بییەیم
بەشۍ: چوارەمە
هۆرئەوەگېڵنای: گوڵزار شەریفی

بە دەمو گرەوایوە و دڵی پەڕموە هەرسی پېسەو قرمەو وارانی ملو کۆپامەرە مجیێنېرە واری. حەر وێڵکۆنەو بابەیم نەبېنێ و واتم بابە گېیان!!! من وېم مزانوو ئڼە وەشت نمەی، بەڵام قەسەمت مڎەو، تۊ ئەرواحوو ئەڎایم بازەم با بلوو شۊنی دەرسەکەیمەرە، قەوڵ مڎەو هۊشم موحەمەدی و ڕەزایچوەبۊ. بابەم سەرەش نامنارە و لوا دلۍ ویرا و دمای سەرەنجێو چەمە پەڕ هەرسە سوور بېیاکاو منش دا و واتش: باشەن بلۆ وانگاو دەرسەکەیت بوانە، بەڵام هاگاتبۊ خەتایوە کەری سەرەت بڕیەنم و نیانم سەرو دڵیتوە. نمەزانو ئا ساتە بابەم بە چېشی یاوا دلۍ چەمامەنە هەکە ڕازی بی. فرە وەشحاڵە بېیانی پا قسێشە و واتم: سەرو چەمام بابەگېیان، پەڕ بە دڵ حەز کەرېنا بلوو وېم وزوو باوەشیش و تێر و پەڕوو وېم ماچېش کەروو، بەڵام فرەش پۆوە نەشی زەوق و وەشی منش نەوینا و بێ‌دەنگېو لوا هوڎەکەو وېش و بەرەکەش بینا.
وانگە کریاوە و لوانی سەرو دەرسەکەیم. بە لوایما پەی وانگای دەرسەکانوو وېم و موحەمەدی، ئەرکم چن وەراوەروە بی. بە جۊرێو قۆرس بۍ پەیم نەتاوێنا بە ڕېک‌وپیکی هەرمانەکام بەروو ڕاوە. هەر چی هەوڵیچ دێنا دیسان حەر کەم ئارێنا یاگێوەنە هەرمانەکێم ناتەمام مەنێوە.
وەختێو بابەم دیش هېز و تەوانم نەمەنەن و عال نمەیاو بە هەرمانەکامەرە، زەنگش دا پەی خاتوونێوە هەکە وەڵتەر بە بیەو ئەڎایم هەرمانېش پەی کەردێبێنمێ واتش: بەشکوم حەفتەکێنە دوێ کەڕەتێ بەی پاک و پۆختەیە یانەی کەری پەیما. نامېش خاتوو فاتمە بێ، چەنێ ئېمە فرە مێهرەبانە بۍ و بە دڵ موحێبەتما پەنە کەرۍ. هەمیشە واچۍ ڕۊڵە گېیان حەر وەخت حەر هەرمانێوتا بیە واچدێم پەنە، تەنانەت ئەر یانەو وێچما بوو نەگندێ دلۍ ڕوو دەرباسی، زەنگم پەی بڎەیدێ دڵنیای بیدێ عازا وېم مېیاونوو. خوڎایش هەر وەخت ئامایا بە گېیان و دڵ دڵسۊزانە هەرمانێ کەرۍ، تاکو هەم دیسان ئامایاوە هەرمانێم نەمانێنێ. یەک ساڵ بە نەبیەو ئەڎایم  بە سەختتەرین شێوە ڕوېما دەی سەر. وردە وردە باسوو ژەن ئاوردەو بابەیم گەرم بی. حەر کەس چەمش گنێ بە بابەیم واچۍ ڕۊحوو خېزانێت بە بەهەشت شادبۊ، بەڵام ویروو وێچت و ئا زاڕۆڵایچتەنە بە، مشۊم کەسیەبۊ پاک و پۆختەیشا کەرۊ و بېیاوشا پۊرە. وێچت جوانەنی نمەکریۆ تەنیا بنیشیەرە. زانێنا دڵوو بابەیمەنە چېشەن و وەروو ئېمە تەرێقبۊوە و نمەیارۆ حیچ واچۆ.
ماوایە وېیەرد تاکو ڕوێوشا ئەڎا گەورێم کە لوایبێ پەی ئاڵمانی ئاماوە. لوایبێ پەی لاو مەتیێم زاڕۆڵەش بیەبێ تاکو کومەکش کەرۊ و نگنۆ دلۍ عەزیەتی.
وەختێو ئەڎا گەورێم ئاماوە گردیما پێوەرە لوایمێ پەی یانەیشا. چاگەنە بابەم بە ئەڎا گەورێم واتش: ئەڎا!!
مەگەر چېشبۊ ماوایە بەی پەی یانەو ئېمەیچ و هاگات زاڕۆڵابۊ. ئەڎا گەورێچم سەرێوەش هۆربڕنا و وردەو بابەیموە بیە و واتش: وەڵڵا ڕۊڵە  من ئێتر پیرە بیێنا و هېز و تاقەتوو ویاری کەردەو زاڕۆڵام نەمەنەن، بە تایبەت ئەر کوڕێچ با. بە نەزەرەو من خاستەر ئانەن تۊ ژەنیوە باری هەم بېیاوۆ زاڕۆڵەکاتەرە و هەمیچ سەرو سامانېوەبۊ یانە و مەنزڵیت و وێچت تەنیاینە بەی بەر.
بە ئەژنەویەی ئا قسێ دڵم پەڕ بی و دەسم کەرد گرەوای، هەرسیم پېسەو قرمەو وارانی مجیایرە. ئاخر نەتاوێنا حیچ کەسی بە یاگێ ئەڎایم قەبووڵ کەروو. ئەڎا گەورێم و چەنی بابەیم بۍ ئانەیە هەرسەکاو من بوینا بە قساشا حەر درێژە دێنێ، ئاخروە بابەم واتش: وەڵڵا من نمەزانو. دمایی بەبۊنەو ئانەیوە من نەزانوو چەمێوەش قرتنا پەی ئەڎا گەورێم و هۆرێستوە لوا بەر تاکو ئېمە تەنیای بیمێ.
بابەم پاسەش زانا من نەزانانم، بەڵام من گردو ئا ئیشارەت و ڕەفتاراشانە حەوایوە گېرێناوە و حیچ چېوێو لاو منوە نەشاریېوە.  بابەم لوا بەروە چەنی ئەڎا گەورێم مەنایمێوە پەنەش واتم: من حەز نمەکەروو بابەم ژەنی بارۆ. ئەڎا گەورێم بە نەرم و نیانی واتش: پاییزە گېیان، کناچە شیرینەکێم. تۊ ئیسە خەریکوو واناینی، دڵنیاێنا ساڵێوتەر سەڎی جە سەڎ قەبووڵە بی و ملێ پەی زانشگای. ئەر تۊ بلی کێ هاگاش براڵەکاتبۊ؟ واتم ئیسە تاکو ساڵێوتەر وەخت فرەن فکرێو کەروە. ئەڎا گەورێم واتش: ئەسڵەن زاڕوڵێ حیچ، بابەت چېش جوانەن و دڵش موازۆ ڕەفێقێوەشبۊ. هیزیکەیچ مامۆت واچۍ دێر مەی و زوو ملۆ پەی دووکانیچ. وێچت خاس مزانی دووکانەنە زیارە ڕاوە نمەیوە یانە، کام لا ملۆ؟ نمەزانمێ. تەرسی ئانەیمانە هەنە  ئاوڕووما بلۆ. ژەنی بارۆ خاستەرەن تاکو گنۆ داموو ڕەفێقی خرابی و ماڵ و ئەمواڵش چەنە کېشارە. پی قسانە نەختێو ئەهوەنیم پەنە یاوا و هەقم دا بە بابەیم و بە بێ‌دەنگیم ڕەزایەتوو وېم سەلەمنا پەنەشا.
ڕوی دماینش ئەڎا گەورێم کەوتە دلۍ فامیل و ئاشنای پەرسان پەرسان پەی ژەنێو عالۍ پەی بابەیم.[1]