ناونیشانی بابەت: عوبێد مەحمود: هاوسەر و جگەر گۆشەکانم لە کوێن..؟!!‏
ئامادەکردن و نووسین: #عەبدوڵڵا کەریم مەحمود#

ناونیشانی بابەت: عوبێد مەحمود: هاوسەر و جگەرگۆشەکانم لە کوێن..؟!!‏
ئامادەکردن و نووسین: #عەبدوڵڵا کەریم مەحمود#

عوبێد مەحمود محەمەد، خەڵکى گوندى سێوسێنانى کیمیاباران و ئەنفال کراوە، لە دیدارێکدا، بەم جۆرە، ‏باسى سێوسێنان و تاوانى دەوڵەتی عیراقی گێڕایەوە:
‏ - گوندى سێوسێنان سەربە (ناحییە)شارەدێی (قەرەداغ)ە، کەوتووەتە ڕۆژاواى #دەربەندیخان#ەوە‏، پێش ئەوەی سوپای ئەنفال پەلاماری بدات، 290 ماڵ بوو، قەرەباڵغترین گوندى ناوچەکەبووە.
‏لە ڕووى ئابوورییە وە، وەک شارۆچکەیەک وابوو، چەندان سەربازی هەڵات و لە شارەکانەوە، پەنایان ‏هێنابووە، ئەم گوندە ئازادکراوە.
سێوسێنان دوو قوتابخانەى سەرەتایى و ناوەندى و نەخۆشخانەیەکى ‏شۆڕشى تیابوو، کە (20)تەختى نووستنى گرتبووە خۆى، سێ پزیشک و چەند یاریدەدەرێکی پزیشکی ‏وچەند برینپێچێک کاریان تێدا دەکرد.
سێوسێنان، دووجار بەگازى ژەهراوى لێى درا.‏
=KTML_Bold=جارى یەکەم:=KTML_End=
لە ئایارى 1987 دابوو، بەشى تۆپخانەى عیراق، نزیکەى 170 گوللە تۆپى بە ناوچەکەدا ‏باران، هەموو گوللە تۆپەکان گازى ژەهراوى بوون، بەڵام دوو کیلۆمەتر لە دوورى ئاوایى دا دەکەوتنەوە، ‏لە ئەنجامدا تەواوى گژوگیاى ناوچەکەى وشک کرد، گەڵاى درەختەکانى وەراند، پەلەوەر و باڵندەکانى ‏لەناو برد.‏
=KTML_Bold=جارى دووەم:=KTML_End=
لە ڕێکەوتی 23-03-1988دا ، کیمیا بارانى کردەوە، سەعات شەشى ئێوارە بوو، بۆ (ڕەسەد) گرتنی سنووری جوگرافیای گوندەکە، دوو (ساروخ)هاژەکى (ئیشارەت) ئاماژەى بۆ سەر ئاسمانى گوندەکە هەڵدا.
یەکێکیان ‏لە ڕۆژهەلاتی ئاواییەکە و ئەوى تریان لە ڕۆژاواى گوندەکەدا، (ساروخ)هاژەکەکان، بە ئاسماندا تەقینەوە، دووکەڵێکى سپىیان لێ پەیدا ‏بوو، دوابەدواى ئەو دوو (ئیشارەت)ئاماژە، لە دەربەندیخانەوە کەوتنە کیمیاباران کردنى سێوسێنان.
دەمەو ‏ئێوارە بوو، خەڵکى ئاوایى لەسەر کێڵگە و زەوییەکانیان دەگەڕانەوە، مناڵانى ئاوایى لە سەربان ‏و کۆڵانەکان سەرگەرمى یارى کردن بوون، مەڕ و ماڵات گەڕابوونەوە ناو ئاوایی.
لەو کاتەدا ، پەلەوەر و ‏مار و مێروش هێشتا نە چووبوونەوە هێلانەى خۆیان، 40 (ساروخ)هاژەکى کیمیایی بەسە سێوسێناندا باری .
لە ‏سەرەتا هەستمان بەوە نەکرد، گازى ژەهراوییە، هەریەکەمان، بەرەو پەناگە و کونەتەیارەکان هەنگاویان ئەنا.
بەڵام دەرکەوتنى دوکەڵێکى سپى زەردباو بڵاوبوونەوەى دوکەڵەکەوە، بۆنى میوەی لێ دەهات، بۆمان دەرکەوت، گازى ‏کیمیاییە.
لەوکاتەدا لە کونەتەیارەکە هاتمە دەرەوە، هەتا هێزم تیابوو، هاوارم کرد :
-خەڵکینە، لە پەناگەکان وەرنە ‏دەرەوە، گازى کیمیاییە، ئاواییەکە چۆڵ بکەن.
دوابەدواى من (پەیمان و تابان)ى کچم. ‏لە پەناگاکە هاتنە دەرەوە، باوەشیان بەقاچمدا کرد، بەگریانەوە هاواریان دەکرد:
-بابە گیان تو خوا ‏مەهێڵە بمرین.
-پەیمان و تابانم لەباوەش کرد و بەپەلە. هەنگاوم نا، تا لە ئاوایى دوور بکەومەوە، بەڵام ‏سەرم گێژ بوو، لەشم داهێزرا، ئەژنۆکانم دەلەرزین، تواناى جووڵەم نەما، هەناسەم تەنگ بوو، کاتێک ‏هۆشم هاتەوە، براومەتە ناوچەیەکى تر، لەگەل کۆمەڵێک بریندارى ترى کیمیایى دابووم .
دکتۆر ناسیح و ‏دکتۆر فایەق، لە ژوور سەرمانەوە بوون، چارەسەریان بۆ دەکردین، گوێم لێ بوو، لەوکاتەدا قسەیان دەکرد ‏وتیان :
-جۆرى گازەکان خەردەل-فازجین-سیانیدە.
سوپای عێراق، لە هەموو لایەکەوە ‏هێرشى هێناوە، سەرباز و جاشەکان، بە سەر جەستەی ژەهراوی ژن و پیاو منداڵی سێوسێنان دا تاڵانىان دەکرد، کۆپتەر کوێرانە ‏ناوچەکەى بۆردومان دەکرد.‏
لەو ژەهربارانەدا، 69 کەس گیانیان لە دەست دا، 80 کەس بریندار بوون، سامانى کشتوکاڵى و ئاژەڵى ‏هەمووى لەناو چوون، شەهیدەکانمان بە جلوبەرگى خۆیانەوە لە گوندی ئەستێڵ و کۆشکى سەروو ‏کۆشکى خواروو بەخاک سپارد. لەو کاتەدا بەهیچ جۆرێک هەواڵى ژن و مناڵەکانم نە دەزانى، چاوەڕوانى ‏ئەوە بووم بگەنە لام، بە ئازارەوە دە مناڵاند.
حسێن محەمەد ڕەسول یەکەم کەس بوو، لە سلێمانییەوە، بەنهێنى هاتبوو بە هانامانەوە، گوێم لێ بوو وتى:
-هەواڵى عوبێد؟
پییان وت؟
-تەنیا خۆى ‏دەرچووە، ژن و منداڵەکانى شەهید بوون؟
ئا لەو کاتەدا ئەو هەواڵە جەرگبڕەم بیست، باوەڕم نەدەکرد، ‏وام دەزانى خەو دەبینم، یەکبەیەک ڕووخساری جگەرگۆشەکانم دەهاتە بەرچاوم و تێکەڵ بەئازارەکانم دەبوون.
ئەمەى ‏بۆتان باس دەکەم، شانۆگەرییەکى تراژیدى نییە، زنجیرە ڕووداوى ڕۆمانێکى جیهانى نییە، ئەمە ‏زنجیرە تاوانێکى داگیرکەرانە، بەرانبەر ئەو گوندە بەرپاکرا .
تا دوا هەناسە، هەڵوێستی جوامێریی، ( ساڵح حاجى ئەحمەد و ئەحمەد محەمەد ڕەسول) لەبیر ناکەم، لەو شەوە ئەنگوستەچاوەدا فریامان ‏کەوتن، بەسوارى تراکتۆر لە چەمى دێوانەوە توانیان ‏ بمانگەیەننە تانجەرۆ، لەوێ هەواڵمان پێ گەیشت، کە هێزەکانى سوپای عێراق و (ئەمن و ئیستیخبارات)، لە سلێمانى و لە (سەیتەرە)خاڵی پشکنینەکان خەڵکى ‏ئاوارەى گوندەکان دەگرن و بێ سەر و شوێنیان دەکەن.
بۆ ئەوەی دەسگیر نەکرێین، هانامان بردە بەر (دەواجن)کێڵگەی پەلەوەرەکەى خوار گوندی زڕگوێزەڵە، لەوێدا خۆمان ‏شاردەوە.
مەلا هیدایت عەلى داریزاینى لە (دەواجن)ەکە بوو، یارمەتی داین ئێمەی شاردەوە وتى:
‏-ئامادەم گیانی خۆم بەخت بکەم، بۆ ئەوەی ئێوەى پێ ڕزگار بکەم.
ئێوارەیەکى درەنگ، لە سەرووى، (سەیتەرە)خڵی پشکنینەکەى تانجەرۆوە، ئێمە بەنهێنى خۆمان کرد بەشاری سلیمانیدا، زۆربەمان لە گەرەکی- (حاجى ئاوا و خەبات)دا لە ماڵى خزمەکانمان ‏خۆمان شاردەوە.
ئاسایش (ئەمن)ی #سلێمانی# و (تەواری)یەکان، ژمارەیەکى زۆری خەڵکیان لەناو شاری سلێمانى دا، دەسگیرکرد و ئەنفالکران.
من ‏بەبریندارى لە ماڵى خاوەرى خوشکم خۆم حەشاردا، لەوێ هەندێک دەرمان و چارەسەریان، بۆ ‏دیارى کردم، شەش مانگ بەدەم ئازار و برینەکانمەوە دەتلامەوە، برینەکانم وردەووردە بەرەو سارێژ بوون دەچوون.
بەڵام برینى ژەهرى کیمیایی و ئەنفالی هاوسەر و جگەر‏گۆشەکانم و خەڵکی گوندەکەم، هەرگیزاوهەرگیز سارێژ نابن!!..‏

ئەمانەش ناوى هاوسەر و جگەرگۆشەکانییەتی، لە کیمیابارانی لە گوندى سێوسێنانى ئەنفال دا خنکان.
ناو- ساڵى لەدایک بوون‏
‏1- #مەلیح عبدولقادر#‏ ‏1955 ‏
‏2- #پەیمان عوبێد مەحمود محەمەد‏# ‏1980‏
‏3- #تابان عوبێد مەحمود محەمەد# ‏ ‏1981‏
‏4- #ڕۆژگار عوبێد مەحمود محەمەد#‏ ‏1983 ‏
‏5- #ڕزگار عوبێد مەحمود محەمەد‏# ‏1984‏
‏6- #لیرە عوبێد مەحمود محەمەد#‏ ‏1986‏
‏7- #یادگار عوبێد مەحمود محەمەد# ‏1987‏

=KTML_Bold=سەرچاوە=KTML_End=: پەرتووکی ڕەشەبای ژەهرو ئەنفال [1]