سەفەرو سیاوچەمانەی
نویستەی: #جەلیل عەباسی#
سیاوچەمانە، ڕاو سەفەریش گرتەنە وەر. سەفەرێوە دوورودێژ بە هەڵەتەڕای پېچەڵپېچەو زەروانیرە.
هۆرە، هەوارگەو تەموورەینە کەپرێش جە لاولاو (بابا میری) پەی کەرد و حەسیرێ جە پەژمو (خورشیدی)یش یاوارە چېرش.
بەرزەچڕ، هەزاربەهەزارو ڕاو هەوارگەی چۆڵو سەنتوورێ وڵاویاینە، پلەکانێ جە (پېچەپېچەکا)ش پەی نیارە.
دەرەییە، گۊشەو باخو شمشاڵێ وڵوڵین جەرگێش پەی ڕازناوە بە ولەگڵاویەکاو (ولەکێ گېیان)ێ.
سەحەرییە، سەڵاتو سوبحدەمیش کەرد شاباشو ڕێش، تاکو دێرش پەنە نەبۊ و ڕاش دوورە نەگنۆوە.
گۊشی، کەپرێ سەرهەواریش بە باقە چنوورو (کۆنە هەواران)ی پەی بەست.
خاو، هەنگامێ وردێ و بەلەنجەلار دەمو (ئەی یاران یاران)یۆ لوا پێوایشۆ تاکو ڕاو یانەو نازاراش نیشانە بڎۆ.
وردەبەزم، ئاو و دویێ کەفەسەرش جامۆڵە ڕۊحینە زەریفڵەکەو بێرەڕاو (خاڵسیاو گېیان لەیلۍ گېیان)ینە نیارە وەرو دەمیش تاکو مانیایی و تەژنەیی ڕای دوورەو سەفەریش پەنە سەینۆوە.
چەپڵێ، گوڵاوێ وەشبۆش جە ولە گڵاویەکاو باخو (سنجانە)ی و بەتامو (هەلامە)ی پەی گېرتۆ تاکو دەماخش بەهەناسێوە ڕۊحنەوازو دڵوەشی چاخ کەرۊوە.
چوو دوورۆ، سۊزو دەنگێوە حەزینی کەوت گۊشش،
شێخانێوە، هاناش بەرڎېبێ سەرو ڕێش و نەرم نەرم چڕېش وەنە تاکو لایەش وەنە کەرۊوە و دڵسۊزانە دۆنۊش، وەش لاڵیێشۆ وەنە:
تۆ ڕەزای ئەڵڵا ڕوو بەملاوە کە.
سیاوچەمانەکەما، هەنگامەش هەر ڕېوازێ نیا، یاگەپاکەشەنە چووزە چنوورێ (تاشانسەر)ی زیا.
هەر سەرکارېزێنە ئاویش واردۆ، باقێ (گوڵ وەنەوشەو باخانم) تنگیاوە.
هەر مەنزڵگێوەنە سەیاوە، تۆزێ تۆپڵاخە بەستێ سەرو (کۆنە هەواران)ێوەش سڕیۆ.
ڕاش کەوتە هەر سەرکەشێوە، زوانو ژەرەژڵێوە خاڵومێڵ ڕەژیە بە قاقبەو (سەیری وەزەرا)ی پژگیا.
پاش نېیا سەرو هەرتەوەنێ، (تەقەی تەوەنمیر) بی جریوە و کەوتەنە دەمو زەردەوەلە نەخشینەکا دەرەی.
سیاوچەمانەکەما، ورینگیش نەدا.. ئاوی مردا ئەو نەمدرا. سەرکەش سەرکەش.. ملبەرز و لەنجە وەش ئاما.
یاوا گوڵستانو نەکیسا و باربودی و (چەنگ)ش لیپانلیپ کەرد جە نەغمەو (کنالەیل)ی.
ڕاش کەوتە وەزەندە بەرزەکێ خەوشو خان ئەحمەدخانی و خزانە دلۍ لەواسەی ونینو یۆسۆ ئاسکەی و ئایەتەو عەشقو (خواڵەداد)یش پۆوە نەخشنا.
ئاماو نەما ئەڵقەڕېزو گڵوەو مامۊ حەکیمی و تەقەش دانە، چۆدیمۆ (خواڵەوەی) بەلەنجەولار ئاما پێوایشۆ.
یاوارە هەمزەیەو ڕۊحو حاجی یاقۆی و هەنارێش جە سۊزە مەلیسیەکەیش کەندۆ.
حەر لوا تاکو وەروبەرەو (خورشید خان)ێ کە هەواڵێ ڕەشەغوڵامی پەرسۆ، (لارەکاو)ۆ جوابش ورگېرتۆ کە هەڵای شیوەنو شەونشینیەکا لاو دڵدارێش گەرما.
تەتەش تەی کەرد و نوەیجەڕۆ دیاوە شارەزووری و هەیاتەنە لەنگەرێش گېرت. ئێتر هەر هانەچیاڵەرە پەی دەربەنی و پەی سەرچەمەی و پەی بلچەسوورێ و چاوە پەی خزمەتو سوخنەکەو دەروېش خێرەدینی، تاکو بەرەکەتێ وزۆنە خەرمانەکەو بابا عەزەی. ئانە بۍ دماتەر دوێ (لاسێ)ش چەنە زییە و ئێتر سیاوچەمانەکەما داڵانەو ماما خاڵێنە وېش ئاڵۆچنارە بیرێ قووڵەو حەنجەرەو عوسمان و حەمەحسێنی.
فرەش نەبەرد گڵوەو برا کێمنەیەکا بییە هاناوێ و پاسە ورتەقا، هەرچی باخو دنیاو هارمۆنېیا تێراوبۊ چەنەش. جوێ، کورە نا تۊ واچە دەرێوە سەرش کەرد و لووشناش: میرو وتمانەرە پەی مارانی چاوە پەی نەڵکمینی و ئێتر ورخزا کەلو هەراتیرە و سەرەنجام مجیانە حەوزەلارە. سوورە چنارێ چاگە سەوز بی و باڵاش کەرد و سێبەرێ فێنکەو (پەروین گېیان)ێش پژگنا ملو نۆسووڎەێ و خەندانەکەڕیره و چریکێوە سێبەرەکێنە کەوت گۊش، سیاوچەمانەکەیما ئەژناساوە و بە ئەوە سەیای و ئەرخەیان واتش: ئێگە سەرمەنزڵو گەشتەکەیما، چیولای حەنجەرەی بێگەردو (جوانخاسو سیاوچەمانەینە) گېڵدێم پەی.[1]