ساڵیاڎو ڕۊنامەکاری کوردی مەبارەک بۊ
ئارۊ یادو ئا ڕۊیە مکەرمېوە هەکە (126) ساڵۍ چېوەڵ و ڕوێوی چیمنەنە و وەڵاتو غەریبینە بنەیانەو بەدرخانەکا یوەم ڕۊنامەی کوردیشا بە زوانو کرمانجی سەرینی بەرکەرد و دنیاشا یاونانە هەکە ئېمە گەورەتەرین گەلی بې دەوڵەت و ساحیبې زوانێ و فەرهەنگێ و خاکێوە بەشکریاینمې.
ئا زوان حاڵە وەختو وېشەنە تاواش ئا پېخامیە بېیاونۊ بە دنیای و ئانەیە بواچۊ هەکە پەنەوازبې بوچیۊ.
پا بۊنۊ مەبارەکبایی وېما مواچمې بەگرد ڕۊنامەوان و میدیاهەرمانۍوە هەکە چی ویارەنە مانیانەژناسانە خجڵو خزمەتین.
ڕۊنامەو کوردەسانی چڼ ئەژمارېوەش چەنە بەر کریا و دماتەر مدرا، وەلێم چا ڕۊوە بەدما ئیتر ئا دەنگە سەرەمڕە فەریادش بەرز بې، ئەر یاگێوە داگیرکەرې وەڵاتی حەولېشا دێنې خەفەش بکەرا، لایېوە تەرۆ ئا دەنگ و هەستە ئازادیوازە سەرهوردې و پېخامو وېش یاونې.
چی سەردەمەیچەنە تەکنەلۆجیا پەرەشسانان و ئامرازې یاونای مشەمەرې بینې و فەرهەنگ و کەلتورە زلەکې حەولې مڎا زاڵېبا ملو گەل و نەتەوە و فەرهەنگەکا تەریرە و قوتشا بڎا و دلې وېشانە بتاوناشاوە، داخەی سەختە ئانېنە هەکە وەرچەمتەرین ئامرازو ئی هەرمانې میدیا و بەشە جورا و جورەکې ویارو ڕۊنامەگەرینې، پەوچی هەڵای ئانزانیەت حەر پەنەوازا بە هۊشېیار کەردەی و ڕۊشنویر کەردەی تاکو گەل و نەتەوە بەش وریێکې بتاوا وېشا گېرا وەرانوەرو ئا هۊتەرە فەرهەنگیېنە و نەتاویاوە.
ئېمەیچ پېسەو هۆرامی هەکە خوتانو فەرهەنگېوە دۊڵەمەڼی و ۋېیەردېوە پرشگدارینمې و ئیسەتې چېرو قەهرو ڕۊزگارێوەنە هەکە کەوتېنمېشەنە، وېما و زوان و فەرهەنگ و تاخایتێ خاکو وەڵاتەکەیچما ئینایمې چېرو هەڕەشێوە سەختېنە و ئەر چېوێوەما مەنەبۊ دلېنە بشۊ زوانەکەمانە هەکە تاکو ئیسەتې دەماودەم پارېزنانما و بەداخەی سەختۆ ئاڎیچ خجڵا بەتەمامی دلېنە مشۊ و بەدور نمەزانیۊ ئەر هەوڵې دڵسۊزا نەبېیێنې ئیسەتې ئاڎیچ هەرزوو دلېنە شیەبې.
چی ویارەنە مشۊم دەور و کاریگەریی ئا چڼ ئەرەمەرزیا و تەلەفزیۊن و پەیج و کەسایەتیە دڵسۊزا بەرز بنرخنمې هەکە چا ویارەنە وېبەخشانە هەرمانە مکەرا و یاگەدەسشا دیارا و وەشبەختانە ئەرەمەرزیاو ئاژینیچ یۊن چا لایەنا.
پاڵو ئانەیچەنە یاگې وېشەنە گلەیې وېما ئاراستەو ئەرەمەرزیا حکومی و کەسایەتیە پەیوەندیدارەکا پی پەرسېوە بکەرمې هەکە کەکېوە مەبۊ مېمانەشا و نېیەنې خەمو کەلتور و فەرهەنگ و زوانو دۊڵەمەنتەرین و گرنگتەرین بەشەو نەتەوەکەیشانە هەکە هۆرامی و زوان و فەرهەنگ و ژیوگەکەشا.
چی بۊنەنە ڕوەو دەمیما مکەرمې ئەو وەرپەرسا حکومەتی بەگردیی و وەرپەرسە پەیوەندیدارەکا پېسەو وەزارەتو پەروەردەی و ڕۊشنویریی و گەشتو گوزاری، تایبەتتەر ئا وەرپەرس و دۊڵەمەندە هۆرامیې هەکە قسې و دەسشا ویەرۊ، فریا و زوان و فەرهەنگ و ژیوگەو هۆرامانی بگنا و سەروەریېوە پەی وېشا و وشۊرەتیشا تۊمار بکەرا و وېشا نەوزا وەرو نەفرەتو تارېخی چوونکە تارېخ ڕەحم بەکەسی مەکەرۊ.
ئەرەمەرزیاو ئاژینی
3/مانگەو چڵکڕی.[1]