کورد دلۍ چەرخەکا تاریخینە
بەشۍ: دوەسەڎ و ویس و چوارەمە
نویستەی: #هاوڕێ باخەوان#
ساڵەو (1902ز): چن تۊمارێ پېوەس پی ساڵېوە ئینێ وەردەسەنە:
* مارک سایکس، سەروەختو گەشتە بە نامبانگەکەیشەنە دلۍ شارو سلێمانیرە، سەڎ و پەنجا دوکانۍ چەخماخسازیش ئەژمارێنۍ.
* ئەچی ساڵېنە، عەبدولجەبار ئاغا-کانی شاعېر ئامان دنیا.
* یەکەمین کۊمای کوردی جە میسر، بە نامۍ (کۊماو عەزمی هېزەکانو کوردەسانی) ئەچی ساڵېنە مەرزیانەرە.
* ئەچی ساڵېنە، یەکەمین کۊنگرەو کۊماو یۊبییەی و وەڵېکۆتەو تورکیای جە پاریس بەسیان، دۋۍ سەردارۍ کوردی چەنەش بەشدارۍ بیېنۍ، ئاڎییچۍ عەبدولڕەحمان بەدرخان و حیکمەت بابان بېنۍ.
* ئەچی ساڵېنە، ساڵح زەکی ساحیبقران لوان پەی ئەستانەی، پەی ۋانگای سەربازی.
* ئەچی ساڵېنە، مینۆرسکی کتېبو پیروزو ئەهلو هەقی (سەرەنجام)ش ئېستەنۆ، ئی کتېبە سەڎەی وەڵینەنە نویسیانۆ.
* نەجمەدین مەلا، نویسەر و خاسسازو کوردی ئەچی ساڵېنە جە سلێمانی ئامان دنیا.
* ڕەمزی مەلا مارفی شاعېر، ئەچی ساڵېنە دلۍ شارو سلێمانی ئامان دنیا.
* ئەچی ساڵېنە، جەمال بەگ پەی ماوەو ساڵێ بېیەن بە فەرمانڕەواو سلێمانی.
* تاریخو (14-04-1902ز) دما ژمارەو ڕۊنامەو کوردەسانی جە جنێڤ بەرشییەن، کە ژمارە (31) بییەن.[1]