کۆبەندیێوە نرخ شناسانە و
چڼ خاڵێوە بەراوردیی سەرو شێعره و ئارۊو هورامی
چوارەمین بەشە
نویستەی: #عادل محەمەدپوور#
10_ ئی خەسارێ کە هۆرمادای دلې ناخوو دەقەکامانە گەورێ و جۊرێو پادشاگەردانیی ئەدەبین و چنی ئێلێمانەکاو پیشەگەرایی و شارەزایی کەرڎەی دەراوەکاو ئارۊی، هیچ کە یۊ نمەگېراوە و زەننیی نەرینیچ موزۆ سەرو باروو ڕۊشنویری ئارۊیما. بە داخەوە ئارۊنە ساڎەوازی و ڕوەکەردی پۆپۆلیستی بېیەن مۆره و میاچەمایما و حاشا هۆرنەگېرا. ئەر قەرارا سەردەمیێ بیمێ و بە شارەزایی و بە پەشت سووری ئەدەبەکەیما تێکەڵوو ئەدەبوو مەحاڵەکایتەری و دەراوی تازەتەری بیمێ؛ فەلسەفەش ئانەنە کە تەڕکیزما تەنیا سەرو هێژمۆنی فۆرمی هونەری و فەنی بېیەی و زاڵ بېیەی ملو بابەتە ۋیری و فەلسەفیەکاو ڕۊیرە هەرمانە کەرمې. هیچ کە فەرهەنگی ساویلکە پەرە پەنە نەڎەیمێنە، مشیۊم فره و کاتایچ چنەبڕیا و پەڕبەرژەوەندیی تاکی، هەنجارماڕی کەرمې و چەنی هەر جۊرە ڕوەکەرڎې عەوام پەسەننانەی و (پۆپۆلیستی) کەرڎەی شێعرێ و ئەدەبېیاتی تا ڕادەو (سادە واتەی و سادە دیایش) دوورە پارێزی هیچ، وەرانوەری کەرمې و فەلسەفەو بۊتیقای شارەزایی وېما بوێزمێوە و بەینوو قسێ و کردارینە، پارادۆکس و دژە هەرمان وەش نەکەرمې. پی بۊنەوە گرڎما؛ نویسەرەکێ، شاعێرەکێ و تەنانەت ئەنجۆمەنەکێ فرەتەر ئانێما کە زایەڵەما پەی وەڵ ئاهەنگ بېیەی بەرزکەرڎەنۆ، چی بارەوە وەرپەرسیارێنمێ.
11_ پەی وەرانوەریی چنی ئی خەساره وەرەچەمانە، وەڵێ گرڎ چېویەنە مشیۊم سەرو نەزەریێوی ئارۊیانەی، هەرمانەی پراتیکی و فەرهەنگ سازی بکریۆ پەی وەڵکەوتەیی و وېما کەرمې سەرنموون پەی ئی هەرمانێ و تەرسی و هەراس، بەرژەوەندی تاکی و پارێزوازی بنیەیمێ لاوە و بە مانای ڕاسەکی سوننەتماڕای کەرمې. نەک (یەک بان و دوە هەوا) کە ئینە وېش مێمڵوو تازەگەرین... بەشداری جە ڕەواجدای ئی ئەدەبە سادە پەسەننینە، چنی نەفسوو وەڵکەوتەیی و چڕەکاش یۊ نمەگېراوە. چوون جیای وەرەولوای چن هەنگامې مەیمێنە دماوە و زەننەیچ موزیۆ سەرو ئا شاعێرا کە هەرمانه و تازەگەری کەرا و کاراییەکاشا کزنۆرە و هیچ کات ئی ڕەوەندە نمازۊ ئەدەبېیاتما، بژووژیۊوە و بەڕۊ کریۊوە و چنی ئەویشا وەرانوەری کەرۊنە و ئا هەرمانێچە کە تا ئیسە کریاینێ کاڵ و کاڵتەرێچ باوە و پێوەننیما چنی دنیاو دەوروبەری پڕچیۆ یام مرۊرە.
12_ گوزاره و (هامشانکەرڎەی تێئۆری و کردار)ی تەنیا ڕایێوەن پەی بەڕۆکەرڎەی پڕۆسه و تازەگەری و بەردەوام بېیەیش پەنەوازەن؛ غەزەڵواچې، ئازاڎێ و کەلیمە پێکنێ (ناظم)، چنی حەشر و نەشروو وەردەنگاو وېشا، هەوڵێچ بڎانە کە چی ڕاسا تێئۆریکینە، تەوەنەو بنەڕەتەو شارەزایی کەرڎەی ئەدەبېیاتیما دنیاو ئارۊینە بنیارە و پەرەش دریۆ پەنە.
13_ تەجروبەو ئەدەبېیاتوو ئەویشاتەریەنە سەلەمیان و ئینە بېیەن هەتا بېیەن کە فۆرمەکێ و ویرێ جیاوازێ، هەمیشە حۆچانینە بېیێنێ و فره و کاتایچ، ململانێ ئەدەبی و ویریی ئاڎیشا، ئەوەفاڕیای و جووڵەش پەی وەش کەرڎېنێ. نموونەش چەنەبەچەنێو ئەدەبیی نیمایی و سۆننەتوازەکاو شێعره و فارسی کە وەڵتەر چی کتېبەنە بە تەسەل باسم چەو کەرڎېنێ، وەلێ خەسارەکە ئینا چێنە چەپەوانەو ئېمە ئیتر دلېو دەقەکاشانە نیشانېوە نېیا کە ئەدەبی ساویلکە هێژمۆنیش بېیەبۊنە. شاعێری ئارۊیی نمەتاۋۊ هەم وەڵکەوتە بۊ و هەم هەرمانەکېش ڕاساو ئەدەبی پۆپۆلیستینە با. کۊمەڵگا جە گرڎ دەراوێنە پەنەوازش بە هەنجارماڕای هەن. ملە جێڕێ چی بارەوە، زەڼەو وەردەنگی چالاکینە، هەر شاعێری پۆپۆلیست نامې بەرکەرۊ.[1]