لاچەمێوی گولانە سەرو ڕۊمانو دێڕ بە دێڕ حەسەرەت
بەشەی یەکەمە
ماشەڵڵا سارا، بەژنت گېیانش وستەنەنە وەلەگوڵاواو گجیەکەیت!ل-183
دێڕ بە دێڕ حەسرەت!
نامې ڕۊمانێویەنە بە قەڵەموو خاتوو ئامینە ڕەحیمی (ژوان)
پېشکەشش کەرڎەن بە ژەنا هۆرامانی و کوردستانی.
دلې دنیاو ئەدەبېیاتی داستانییەنە، جار جار قەڵەم بە دەسێ عالێ و وەشنویسێ ژیرێ و ئاوەزدارێ پەیدای با. ئینەیچە تەنیا هۆرامان و وەڵاتا دەور و بەرو ئېمە نمەگېرۆوە، بەڵکوم جە گرڎ فەرهەنگ و کولتوورێوەنە هەن. جار جاریچ دلې ئا وەش ویر و وەش نویسانە، کەسانېو هۊرگنا کە فرە تایبەتێنێ و سەبک و شێوەو وېشا هەنشا و ئۆ هیچکەسیتەری نمەشان.
خاتوو ئامینە ڕەحیمی (ژوان) یوە چانیشانە!
من خاتوو ژوانەم جە ڕاو دوې دانێ جە ڕۊمانەکاشۆ ئەژناسا، (خەڵاتوو پاییزی) و (دێڕ بە دێڕ حەسرەت)، دیارا ئی خاتوونێ ساڵهان ئینا خزمەتوو فەرهەنگ و ئەدەبېیاتو هۆرامانییەنە و بە قەڵەمی تێژ و ویری گەشش هەر ماوێو جارێو خەڵاتېۋما پەنە بەخشۆ، هەم چەنەش فێرێ بیمێ و هەمیچ لەزەتش چەنە بەرمێ. سپاس کە هەنی خاتوون.
ڕاسەکېش ئەر من گەرەکم بۊ فرە قووڵ بوەرە دلې کرۆکوو ڕۊمانوو دێڕ بە دێڕ حەسرەتی کاتېووی فرە و نویسێوی پەنجا شەس پەلیش گەرەکا کە نە فەیسبووک و فەزای مەجازی یاگېش کەرۊوە و نە وەردەنگیچ تاقەتوو وانایش هەن.
هەر پەوکەی چی نویسەنە کۊشش مدەو تاکو ئا یاگې پەنەم کریۆ کوڵ و موختەسەر ئێژایی و ڕاس و ڕەوانی قەڵەموو خاتوو ژوانێ چی ڕۊمانەنە وزوو سارا، دیارا چا یاگېچەنە پەنەواز بۊ، پەیلوای وېم منۋېسو.
ئینەیچە دیسان پا مانا نیا، ئانە من ماچوو پاسە بۊ.
داستان جە بەشو دوویەنە و بە یۊوەم کەسی تاک دەس پەنە کەرۊ. سارا زارۆڵێوە چواردە ساڵېنە. وانگەنە دەرس موانۆ. پەی فرەو زارۆڵا ئا تەمەنە دەورانێوی جە ویرنەبریان. قەڵەم و دەفتەر و گەمە زارۆڵانەکې و ڕەفێقە هەمکەڵاسیە نزیکەکې، بەشېوی جیانەکریاو ژیوای ئا دەورانییەنێ.
سارا هەر چا عەمروو چواردە ساڵیەنە، بۊ بە دامەو نەدامەتوو کولتوورێویۆ کە بەشېوی فرەش هینوو وەڵاتەکەو وېش نیا.
سونەت یا ئەوەمەنەی دلې وېیەردەیەنە، عادەتێوی ئەوەنەبڕیان کە هەمیشە چەنی فاڕیای ئینا بەربەرەکانێنە و ڕاو هەناسەیش جە ژیوای تازەی بڕیێنە.
ئایین بېژگەم بەشە عېرفانیەکەیش، کە؛ ئارامی پەی ڕۊح و ڕەوانوو باوەردارەکاش مارۆ، پاڵپەشتێوی پۆڵایینا پەی مەنەی ئا سونەتا دلې کۊمەڵگایەنە. بە باوەرو ئایین دارە سونەتیەکا، هینکاری کەرڎەی هەرکام چا داب و نەریدا، گوناحێوی گۆرەن و ملۆنە ملو ئانیشا گەرەکشابۆ فاریایێو وەش کەرا.
تەقەدوس مقەدەس زانای خەڵکێوی ملو خەڵکێویتەریەرە، یا وەڵاتێو سەرو وەڵاتېوتەریەرە. ئی ویر و ئیدئۆلۆژیچە بە جۊرېو ئینا پاڵو سونەتە ئەرکۆیایەکا کۊمەڵگایەنە.
سارا ئینا دەورانێوەنە هەڵای زارۆڵەییش نەتەمامیان، بې ئانەیە هۊرچنیای وېش بۊ، گیرۆڎێ ئا یەرە سننانیە بۊ و هەرچی پەلەقاژێچ کەرۊ بە هیچ لایېوە نمېیاوۆ. سارا نموونەو هەزاران و مللیۆن ملیۆن جە ژەناو ئی دنیایەنە کە هەر بە جوانی و فرێچشا بە زارۆڵەیی با بە قۆربانی ئا سونەتە وېرانکەرا. ئی کردەوە قیزەونە و ئی بارە گرانە کە فرەتەر ژەنا گېرۆوە، تەنیا چا وەڵاتە سونەتیانە نیا، بەڵکوو دلې بڕېو وەڵاتە سەرمایەدارەکایچەنە هەن وەلێم بە جۊرېوتەر وېش وزۆ سارا.
ڕەزا بەهمەنی.[1]