لە ناو چاخانە و بازاڕدا بوو بە قاوەقاو
کە ڕادیۆ حوکمی ڕەزا پەهلەوی ناو برد بە ڕووخاو
حوکمێکی هێندە بێ ڕەزا و پیس بوو، حەتتا تەنانەت
ئاغای ئیستیعمار نەیگرتە خۆی و کردی ئاوە ئاو
ئەو حوکمە شوومەی هەر لە مادەوە تاوەکوو ئەمڕۆ
خەریکی فەوت و سەرکوتی کوردە بە سەد چاووڕاو
لە جێی ئەو خووگە، وا حەمەڕەزای کوڕی دانرا
بێ شکم ئەمیش وەکوو ئەو گۆڕ ئەکرێ و ئەکەوێتە داو
خۆزگە بەمیشدا بگەیشتمایە، کە کوردی نەبەرد
تۆڵەی بەرودوای کوردی ئێرانی لێ ئەسەند بە تاو
جارێ بۆ ئەویان با تەئریخ دانێم گەر منیش نەمام
ڕوڵەمان زۆرمان تەئریخی ئەمیش بگرنە بەرچاو
بۆ تەئریخی ئەو چوومە سەر تەل و بانگم کرد هەلاو
«سەگێک تۆپیوە، ڕایئەکێشنە، ناوەندی گەناو»
--------------------------------------
حەسرەتا بۆ مەرگی تریاکیی گڵاو
مەفخەری تریاکییانی میاندواو
ئەکبەرئاباد دوور لە تۆ بێ ڕەونەقە
ڕووسپی بێ بەرگ و نانە و بەشبڕاو
موشتەری و شاگردی ناو مەیخانەکان
بۆت زویرن، سەر بە قوڕ، هیوانەماو
بۆت پەرۆشن، دڵ بە خەم شیوەن ئەکەن
بەنگفرۆش و بەنگکڕ و دمڵەکدڕاو
شین ئەگێڕن زۆر بە کوڵ بۆ مردنت
پۆخڵەی بێقیمەت و قنگهەڵچڕاو
جەردە و تاڵانکەرانی بێڕەوشت
دەستەپاچە و سەرکزن، ئەژنۆشکاو
بێشعوور و سەرسەری و حیز و تەرەس
بۆت ئەنۆشن شەربەتی مەرگ و زووخاو
ڕۆژی مەرگت ڕۆژی جەژنە بۆ وڵات
بەزم و ئاهەنگە لە ناو پیاوانی پیاو
پۆل بە پۆل گەورەکچان و شۆڕەژن
وا لە سینگ خۆیان ئەدەن عەتر و گوڵاو
.....................................
ماشە و مەنقەڵ خوماریان دێت لە چاو
ساڵی تۆپینتم لە شاپوور ویست وتی
«کەر کە تۆپی ڕایدەکێشن بۆ کەناو»
1362ی کۆچی مانگی
هۆزانەوان: #قانع#
دیوان: #سروەی بەربەیان# [1]