- داعش بە 6 خۆکوژ هێرشیکردە سەر سەنگەرەکانی پێشمەرگە لە گوندی گڕاوی ڕۆژئاوای کەرکووک، هێرشەکەشیان تێکشکێندرا. لە هێرشەکەدا پێشمەرگەیەک شەهید بوو و فەرماندەیەکە بەناوی مامە غەفە و 4 پێشمەرگە برینداربوون.
- لە میحوەری مەخمور داعش لەڕێگەی چەند خۆکوژێکەوە هێرشیکردە سەر فیرقەی 15 ی سوپای عێراق و، بەهۆیەوە چوار سەرباز برینداربوون.
- بڕیاربوو ئەمڕۆ د. ئاسۆ فەرەیدون پارێزگاری سلێمانی بۆ بەشداریکردن لە مەراسیمی پەردە لەسەر لادانی پەیکەری بەرخۆدان بچێتە ڕۆژئاوای کوردستان، بەڵام ڕێگری لێکرا.
- لە ناوەندی شاری ئامەد لە باکووری کوردستان شەوی ڕابردوو لەنێوان شەڕڤانانی یەکینەکانی پاراستنی سیڤیل یەپەسە و هێزە ئەمنیەکانی تورکیا شەڕو پێکدادان ڕوویدا و بەهۆیەوە دوو کەس گیانیان لەدەستدا.
- جەمیل بایک هاوسەرۆکی کوما جڤاکێن کوردستان کەجەکە قۆناغێکی نوێی شەڕی پەکەکەی لەدژی تورکیا ڕاگەیاندو جەختیکردەوە، ئامانجی سەرەکییان ڕووخاندنی دەسەڵاتی ڕەجەب تەیب ئەردۆغان سەرۆک کۆمارو پارتی دادو گەشەپێدانی دەسەڵاتدارە.
- هەریەک لە فەریق ڕوکن ڕیاز جەلال فەرماندەی هێزی وشکانی عێراق و هادی عامری سەرۆکی ڕێکخراوی بەدر و مەهدی تەقی فەرماندەی حەشدی شەعبی لە دوزخورماتوو و شێخ جەعفەر فەرماندەی هێزەکانی 70ی و سیروان بارزانی بەرپرسی میحوەری گوێر و مەخمورو لەگەڵ نەجمەدین کەریم پارێزگاری کەرکووک کۆبوونەوەیەک لە کەرکووک ئەنجام دەدەن، بە مەبەستی هەماهەنگی پێشمەرگە و حەشدی شەعبی بۆ بەرەنگاربونەوەی چەکدارانی داعش.
- ڕێکخراوی داعش ئەمڕۆ لەراگەیەنراوێکدا ڕایگەیاند، هێرشەکەی سەر پێشمەرگە لەگوندی گڕاو سەر بەقەزای دبس لەلایەن چوار چەکداری تایبەتەوە ئەنجامدراوە بەناوەکانی (ئەبو تەڵحە ئەنساری، ئەبو خەتاب ئەنساری، ئەبو کەرەم ئەنساری، ئەبو ولا‌ء شامی). داعش ئاماژەی بەوەشکردووە، لەهێرشەکەدا کە شەش کاتژمێری خایاندووە سێ چەکداری داعش خۆیان تەقاندووەتەوەو کوژراون، چەکدارێکی دیکەشیان لەمیانەی پێکداداندا لەگەڵ هێزەکانی پێشمەرگە کوژراوە.
- هێزە ئەمنیەکانی تورکیا ئەمڕۆ سێشەممە 53 ئەندامی پارتی دیموکراتی گەلان (هەدەپە)یان دەستگیرکرد، لە ئۆپەراسیونێکدا کە لە شارەکانی کۆنیا و ئەسکی شەهیر و ئانتالیا و ئەدەنە بەڕێوەچوون.