سکرتێرە 23
گۆتم : بڕۆ ئەو دەرمانانە بکڕەو زوو وەرەوە، گۆتی : دیارە ئەو سەیە سەلامەتەو نەتۆپی، گۆتم : وەختی هەندێ نیە زوو بڕۆ، گۆتی : توخوا بەڕاستیم پێ برێ ئەمن دەمرم ؟ گۆتم : جەعۆ کەس هەیە نەمری، ئەرێوەڵلا دەمری و سندانت دەگاتێ، جەعۆ ویستی خۆبێخی و هێرنجان بینتەخۆ، گۆتم : دەست بەکلاواتان مەکەو بڕۆ دەرمانەکان بینە، باشبوو جەعۆ ڕۆیی..
گەڕامەوە لای دەرکەی تەواری، دیتم مارو منداری مام عەوڵای هەموویان بەرامبەرەمن ڕاوەستاینەو چاوەڕێی من دەکەن، هەرچوومە پێش خێزانی گۆتی : وەرە ئێرە جەنابی وەزیر با دوو قسانت لەگەر بکەین.! زانیم باسی کەین و بەینی زێخەو مام عەوڵایە، لۆیێ گۆتم : هیچ پێویست ناکا قسەی بکەین، چونکە زێخەو مام عەوڵای هیچیان لەبەینێ نیە، هەر ئەوەیە لەوەزارەت پێکەوەنەو خاتری ئێکدیان دەیەوێ، کیژەکی مام عەوڵای گۆتی : ئەدی ئەو هەموو سینگ کووتان و هەلهەلە لێدانە چبوو ئەو ژنە کردی، کەس لۆ برادەری ئەوها دەکا ؟ گۆتم : بابە هەر یەک دوو سعاتی دیە مام عەوڵا چادەبتەوەو دەچینەوە مارێ، لۆ خۆتان هوردو درشتی لەگەر باس بکەن، خێزانی گۆتی : ئەو هەموو بەزمە لەبن سەری تووە، ئەتوو نەببایە وەزیر عەوڵاش ئەوهای نەدەکرد..! زیاتر لەگەریان پێدا نەچووم و چوومە لایەکی ڕاوەستام..
جەعۆ هاتەوەو دەرمانەکانی هینابوو، لێم وەرگرت و بردم لۆ ئەو قاوشەی مام عەوڵای لێ درێژ کرایە، لەدەرکەمدا، کارمەندەکە کردیەوە، دەرمانەکانم دایێ و گۆتم : دەکرێ بیبینین ؟ گۆتی : ناوەڵلا جارێ، هێشتا بەتەواوی نەهاتتەوە سەرەخۆ، بەران تەندروستی باشە، دەستخۆشیم لێکردو چۆوە ژۆرێ، شەریف مل تڕتڕۆک هاتەوە، گۆتی : ئەرێ بەو کابرایەت نەگۆ باسی هەشتا وەرەقەکەی بکا لەگە عەوڵای هەتا سەگتۆپ نەبووە ؟ گۆتم : ئەوە ئەتوو بەڕاستیتە ؟ بەمن نارێی ئەو کارمەندە چ پەیوەندیەکی بەو ئیشەی دایە هەتا باسبکەم لەگەری..! لەو هەرایەی دابووین زەلامەکانی گەڕەکێ هەموو هاتن، پیرداود بێ ددان بەپێشیان کەتبوو، دیاربوو ئەو ڕێ نیشان دەریان بوو، دەیگۆ : وەدوومن کەون ئمن کوون بەکوون شارەزای ئێرەمە، وەکی چاویان بەمە کەت لۆلایمە هاتن، سەلامیان کردو پیرداود بێ ددان گۆتی : ئەفەندی ئەوە خێرە عەوڵا ئەوهای لێهاتیە، باشە ئەنگۆ لۆ خەبەریمەو نەدایە، جیرانەتی ئەوها دەبی ؟ گۆتم : خۆ مشەوەش مەکەن عەوڵا سەلامەتە، ئیشاڵلا هەندەی نابا دەردەچین، ئیشەکەش چونکە کت و پڕبوو، لۆیێ پێڕانەگەیشتین خەبەرتان بدەینێ، پیرداود بێ ددان گۆتی : خوا خێری جەعۆی بنووسی خەبەری داینێ، ئەگەنا ئەمە هەر نەشن زانیبوو..!
تەحسین وەلوەلۆک گۆتی : وەڵلاهی جەنابی وەزیر بەگێی من دەکەی مام عەوڵای دەنێریە تورکیای لۆ چارەسەری، ئەمنیش ئامادەمە فی سەبیلیللا لەگەری بچم، گۆتم : تورکیا پارەی دەوێ برادەر، دوایێ خۆ عەوڵا وەزعی واشڕ نیە، ئیشاڵلە چادەبی ! شەمسەددین گەندەبای گۆتی : لۆ ئەتوو وەتێدەگەی تەعسین دەرێ عەوڵای لەسە عیسابی خۆی بنێرە تورکیای ؟ گۆتم : ئەدی لە حسابی کێ ؟ گۆتی : وەزارەت وەزارەت ڕەعمەت لەبابت..! تەحسین وەلوەلۆک گۆتی : ئەمن لۆیێ دەرێم لەگەری دەچم، بەشکوو ئەمنیش شتەکم بەبەر دەکەوی لەو هەرایەی..! لەتیف پێ بەتووک هەریدایێ و گۆتی : وەڵلا ئەگە دەکرێ بینێرنە ڕوسیای، دختۆری عەججایبی لێیە..! گۆتم : کاکە ئەنگۆ ئیشەکەی لۆ ئەوها گەورە دەکەن، ئیشەڵلا ئەوڕۆ سبەکی مام عەوڵا وەکی تۆپی لێدێتەوە..!
زەنگی مۆبایلەکەم لێیدا، تەماشام کرد سەرۆک وەزیرانە، وەرامم داوە، پاش چاک و چۆنی، گۆتی : چیە دەرێن نەخۆشی و لەخەستەخانەی داخیل بووی ؟ گۆتم : ناوەڵلا ئەمن نیمە، ئەوە عەوڵای پاسەوانمە، بەران خەرک وەتێگەییە ئەمنم، لۆیێ خەبەرەکە وابراو بوویتەوە، گۆتی : یاڵلا دەی ئەگەر دەرێی عەریزەکی بدە عەوڵای تۆڕی دەکەین و ئێکیدی لەجێی دانێ ! گۆتم : ناوەڵلا لێیگەڕێ بابمینێ گوناحەو ساحێب مندارە، گۆتی : بابە خەمی ئەو عالەمەی هەمووی بەمە هەرناگیرێ، ئەتوو ئێستا لەکێی ؟ گۆتم : لەخەستەخانەیمە، گۆتی : قاتی لەگەر پاسەوانەکەی نەچووی ؟ گۆتم : بەرێوەڵلا، لەبنی دریڕا پێکەنی و گۆتی : زەلامەکی سەیری، کورە دەبڕۆ پاردەوە لەمارێ و سەی دەوی بەردە، وەڵلا دەبی سەری ئەو سکرتێرەشم سفر کەم کەخەبەری دامن ئەتوو نەخۆشی و ئەتووش نەبووی و لەو خەوە شیرنەی هەستاندم، یاڵلا دەی خواحافیز..! مۆبایلەکەم قەپات کردو بنی درم ئازاری پێگەیی، ئاخ لەو وڵاتەی بنیادەم قیمەتی نیە تێیدا..!
گەڕامەوە کن جەماعەتی و چاوەڕێمان کرد بزانین وەزعی مام عەوڵای دەگاتە کێ، عومەر گورینگ لەوسەریڕا بەمشەوەشی هات، گۆتی : تێمبگەینن بزانم عەوڵارۆک چیتی ! شەمسەددین گەندەبای گۆتی : خۆت مشەوەش مەکەو سەلامەتە، گۆتی : خەمی سەلامەتی ویم نیە، خەمی خۆمە، گۆتم : لۆ خەمی خۆتە، قاتی پارەی لەتووش قەرد نەکردیە ؟ گۆتی : ناوەڵلا، بەران دە وەرەقەم دایتێ بەوشەرتەی ژنەکم لۆ تەرتیب کا لەو وەزرارەتەی توو، گۆتی ژنەکم لۆ دیتیەوە لەناو پاکەتی، مێوژە ڕەشکەی بخوا لە گەردەنی دیارە، گۆتم : دوعای خێر لۆ عەوڵای بکەو دەستیش بشۆ لەژنەکەو لە دە وەرەقەکەی..! جەعۆ گۆتی : کورە ئەو مام عەوڵایە گەلە سەگ بووەو ئەمەش نەمانزانیە..!
کارمەندەک هاتە دەرێ و گۆتی : بائێکەکی نێزیک لەو نەخۆشەی هەتا ئێرەبێ ئیشمان پێیە، جەماعەت هەموو تەماشا منیان کردو ژنی مام عەوڵای هات و گۆتی : دەبەخۆت بڕۆ بەقوربانت بم، ئەتوو وەزیری و قسەت لۆ دەکەن، ئەمنیش ناچار بووم بچم، چوومە ژۆرێ و کابرا گۆتی : جەنابی وەزیر چت لێبشارمەوە، نەخۆشەکەتان لەهیکڕا وەزعی تێکچوەو تەندروستی باش نیە، گۆتم : ئێ خۆ گۆتتان باشە، گۆتی : ڕاستە وەمانگۆ، بەران لەهیکڕا وەزعی تێکچوو، گۆتم : چبکەین چارەچیە ؟ گۆتی : وەڵلا لێرە هیچ ناکرێ و هەتا زووە بیگەیننە خەستەخانەکی ئەهلی، گۆتم : لۆ ئێرە خەستەخانە نیە ؟ گۆتی : بەرێ هەوە، بەران خەدەمات لێرە سفرە، ئەو دختۆرو دەرزی و دەرمانەی لەئەهلی هەیە لێرە دەست ناکەوی، بەینی خۆمان بی، بەبەرنامە خەستەخانەی حکومیان تەفنیش کردیە، هەتا خەرک بچیتە ئەهلی، ئێ بەخۆشت دەزانی زۆربەی خەستەخانە ئەهلیەکان ئی کێنە ! گۆتم : بەرێ دەزانم ئی مەسوول و مندارە مەسوولانە، گۆتی : ڕەحمەت لەبابت، دەوجە هەتا زووە بیگەیننە خەستەخانەکی ئەهلی، بڕوا بکە دوو ڕۆژیدی لێرە بمینێ، حەییاتی لێ دەبڕڕێ..!
هاتمە دەرێ و چوومەوە کن جەماعەتی و مارو منداری مام عەوڵای، گۆتیان : ها ! گۆتم : وەڵلا وەزعەکە باش نیە، مارو منداری مام عەوڵا بە شەپازللان وەرگەڕانە خۆ، تێکڕا غاریاندا لۆ ئەو قاوشەی مام عەوڵای هەیە، بووە تێک قژقژانەک و هەرایەک نەبیتەوە، بەمەو بەکۆمەرە کارمەندەکی تانیمان دووریان بێخینەوەو بڕەک هێوریان بکەینەوە، گۆتم : پێویست بەو هەراو هۆریایەی ناکا، دەبی هەتا زووە فریای مام عەوڵای کەوین، تەحسین وەلوەلۆک گۆتی : چبکەین چارەچیە ؟ گۆتم : وەڵلا دەرێن زوو بیگەیننە خەستەخانەکی ئەهلی ! پیرداود بێ ددان گۆتی : تەواو، بەنامووسم قۆری عەوڵای لۆ سێ پشتان دەبڕنەوە، دەوجە دەبینن کوو قرغتان دەکەن، ژنی مام عەوڵای گۆتی : بەقوربانت بم کووت پێباشە ئەوها بکە، گۆتم : یاڵلا کاکە بڕۆن ئیسعافەکی بینن، باعەوڵای بگەینینە خەستەخانەکی ئەهلی..!
هەندەی نەبردو ئیسعاف هات، عەوڵامان لە بەتانیەکی لوول داو هاویشتمانە ناو ئیسعافی، هەندەک لە ئیسعافی سوار بوون و ئەمەش بە سێ چار تڕومبێلان کەتینە دوویان، گەیشتینە خەستەخانەی ئەهلی و فەوری دەرکەیان کردەوەو سێ چار زەلام هاتن و عەوڵایان لوول داو بردیانە ژۆرێ، ئەمن و جەعۆو جەماعەت چووینە پرسگەی، وەرەقەکی داینێ و گۆتی : بڕۆنە حساباتی، خشین لۆ وێندەرێ و وەرەقەکەمان دا کیژۆرەکی لەسەر کۆمپیوتەری بوو، وەریگرت و یەک دوو چشتی نووسی و گۆتی : بێ زەحمەت دەفتەرەکی دانێن ! گۆتم : بەرێ ؟ گۆتی : دەفتەرەکی دانێن وەکوو تەئمینات..!!
مایتی[1]
مایتی..