سکرتێرە 48

چوومە ژۆری خۆم و دانیشتم، دایە جووجە هات، گۆتی : لە دەوری سەرت گەڕێم چایۆکەکت لۆ لێنێم !؟ گۆتم : ئەرێوەڵلا، بەران قەول بوو ئەوڕۆ دۆڵمەی بینیە وەزارەتی و بیخۆین، کا چم نەدیت ! گۆتی : وەڵلا بەقوربانت دۆڵمەکەم هینا، بەران ئەتوو چوویە دەرێ و هەر نەهاتیەوە، زێخە قومبارەستوورو ست گوڵاڵە گۆتیان : کچێ دەبینە بیخۆین، خوا بزانی وەزیر لەکێ دەعوەتەو چ دەخوا، وەڵلا کەتنە سەرێ و هەموویان لرف کرد ! گۆتم : برێ هیچتان لۆ من و مام عەوڵاو جەعۆی نەهێشتەوە ؟ گۆتی : ناوەڵلا، بەران چاوم لێبوو زێخە قاپەکی وەلانا، ئەوجە نازانم لۆ تووە یان لۆ ئێکیدیە..! گۆتم : ئا ئێ ئێ، دەتوو بڕۆ چایەکم لۆ لێنێ، خوا کەریمە لۆ دۆڵمەکەی توو..!
گازی جەعۆو مام عەوڵام کرد، گۆتم : بڕۆنە تەواری و جەماعەتی بیننەوە، برێن بابە وەرنەوە وەزیر سەلامەتەو هیچی لێنەهاتیە ! مام عەوڵا گۆتی : باشە ئەگەر پرسیان ئەدی ئەو دەنگ و دۆرە چبوو براوبۆوە، برێین ژنەک بابووجەکی لە لاچاوی دایە، بەران سەلامەتە !؟ گۆتم : توخوا ئەوە قسەیە دەیکەی، ناوەڵلا دەزانی چبکە، بڕۆ سە تەلەفزیۆنەکی و ئەو قسانە بکە..! بڕۆ ئەو ژنانە بینەوە بڕۆ، جەعۆ گۆتی : گدۆ هەندم سووبوویتەوە ئەو دیحایەت لەدوو براو بوویتەوە، بڕوا بکە ئەگەر کۆترەکیشم بمردبا هەر هەندەم سوودەبۆوە..! گۆتم : نۆبەتی تووە کارخانچی..! باشبوو ئەوان ڕۆیشتن و دایە جووجەش قاوەک و ئاوەکی لۆ هینم و داینا، گۆتی : جەرگۆ قسەکی بکەم عێدز نابی ! گۆتم : ناوەڵلا، دەبرێ دایە جووجە برێ ! گۆتی : ئەرێ ئەوە لاچاوت چیلێهاتیە، قاتی ساتمەت نەکردیەوە دم و چاوت بە عاردی کەتبی ! گۆتم : ناوەڵلا دایە جووجە، پێکەنینەکی کردو گۆتی : قاتی داکی ئەعمەدی شەپیلاغەکی ڕانەوەشاندییێ !؟ گۆتم : ئەوها لەمن دەگەی ؟ گۆتی : وەڵلا برێم چ، زەلامی ئەو زەمانەی زۆر بێ جەوهەرن جەوهەر ! گۆتم : بڕۆ چایەکەم لۆ بینە بڕۆ..! باشبوو دایە جووجە خشی لۆلای چایەکەی..!
مۆبایلم دەریناو گۆتم : باشە ئەو هەموو ڕادیۆو تەلەفزیۆنە باسی کووشتنی منیان کردیە، لۆ داکی ئەحمەدی تەلەفۆنەکی لۆمن نەکرد، چشتی ئەوها کوو دەبی..! تەماشا مۆبایلی دەکەم دەبینم شەحنی نەمایە..! گۆتم : ئوهۆهۆه، دەردەکە ئە لێرەیە، هەونکە خوا بزانی تووشی چ بەزمەکی بووینە..! مۆبایلم لەسەر شەحنی داناو تەلەفزیۆنم پێکرد، دەبینم نووسرایە بەپەلە ! گۆتم : یا ئەڵلا خێر، خیندمەوە نووسرایە : تائێستا چارەنووسی وەزیری کاروباری ژنان دیارنیە، هەندێک دەڵێن مردووەو هەندێکیش دەڵێن لە گیان کێشانە..! گۆتم : یاڕەبی خوایە زۆر شوکر، ئەتوو بڕۆنێ چ بەزمەکیان نایتەوە..!
هەر ئەوەندە مۆبایلەکەم شەحنی لۆچوو زەنگەکە لێیدا، تەماشام کرد سەرۆک وەزیران بوو، وەرامم داوەو گۆتی : ئەرێ ئەتوو مای ؟ ئەوە چت بەسەر هاتیە هەی مارت خرانەبی، کێ تەققەی لەتوو کردیە، باشە مۆبایلت لۆ قەپاتە ؟ گۆتم : وەڵلا شەحنی نەمابوو، کەسیش لێی نەدایمەو لە گیزی ساغترم، هەر لێدانی ئەو بابووجەی بووە تەقیتەوەو بوویتە ئەو دەنگ و دۆرە، گۆتی : دە لێدوانەکی بدە ڕەحمەت لە بابت، دنیاو بنیا تەلەفۆنی لۆ کردیمە، وەرە سەر تەلەفزیۆنەکی و برێ هەمووی درۆیە..! گۆتم : باشە بەچاوان، هەر ئێستا..! مۆبایلم قەپات کرد و تەلەفۆنم لۆ ئوم حەمادەی کرد، هەریگرت و زیڕو هۆڕی دەگەیشتە بن پەڕەکەی عاسمانێ، گۆتم : هێور بەوەو مایمە، هیچم لێنەهاتیە و ساغم..! دیاربوو لە خۆشیان ڕەق ببوو و قسەی پێنەدەکرا، هەرچەند گۆتم ئەلۆ ئەلۆ فایدەی نەبوو، مۆبایلم قەپات کردو فەیس بووکم کردەوە، دەبینم هەموو ڕەسمی منە بە خاوی و برژایی و کورایی، سێبەشی فۆتۆشۆپ بوو، سەرکی منیان بە کەلەشەکی خیناوی وەنابوو لەسەر جادەی کەتبوو، لەبنیان نووسیبوو دوا وێنەی تەرمی وەزیری کاروباری ژنان، ڕسمی وەنەوشەکیان دانابوو، ممکینە دووسەت گووللەی پێکەتبوو، نووسیبوویان ئۆتۆمبیلەکەی وەزیری کاروباری ژنان، ئەوجە لە کۆمێنتەکانیش هەرمەپرسە، دەهەزار جوون بە فلووسەکی، ڕێ و پیکیان دەرینابووم لەگەر جوونان..! تەماشا تەلەفزیۆنیم کرد دیتم پێش تەواریەو پەیامنێرەکە دەرێ : ڕاستەوخۆ لەپێش تەوارینە، قسەهەیە تۆزەکیدی تەرمەکەی بدەنەوە، بەران هێشتا دیار نیە کەس و کاری لەکێی دەشارنەوە، ڕەنگە تۆزەکیدی سەرۆک وەزیران و سەرجەم وەزیرەکان بگەنە ئێرە، شایانی باسە ئەوە سێیەم وەزیرە کە لەو کابینەی دەکوژرێ..!!

گۆتم وەچاکە لە فەیس بووکەکم ڕسمەکی براوکەمەوەو برێم مایمە، ڕسمەکی خۆم گرت و براوم کردەوە، لەبنیم نووسی، ساغ و سەلامەتم و لە نووسینگەی خۆم دانیشتووم، هەواڵی کووشتنی من سەرلەبەری درۆیە..! دیتم لایک و مایک دەستی پێکرد، هەبوو دەینووسی : پەکووف، پێم ناخۆشە ساغی، وەلحاسر دەستم بەتەلەفۆنان کرد لۆ کەناڵەکان و پێم دەگۆتن ساغم و هیچم لێنەهاتیە..! وەختەکی دایە جووجە بەخۆو بە چایەوە هات، چایەکەی لەپێش دانام و گۆتم : دایە جووجە وەرە سێلفیەکی بگرین ! گۆتی : ئەی چاوم کۆرەبی جەرگۆ، سلفی لە چ دەدەی..! گۆتم : بەخوای دایە جووجە هەتا ئەتوو تێدەگەینم بەخۆم فکرو خەیارم لۆ چشتی قۆڕ دەڕوا، کچێ دەوەرە ڕسمەکی بگرین هەی جووجەڵە..! وەڵلا لەگەر دایە جووجەی سێلفیەکمان گرت و ویستم براوی کەمەوە، تەماشا دەکەم فەیس بووک پڕی ئەو هەواڵەی بووە، فەیس بووکەکەی ڕەحمەتی هاک کرایە..! گۆتم : یاڕەببی خوایە زۆر شوکر، ئەتوو بڕۆنێ تووشی چبووم، وەڵلاهی وەچاکە بەخۆم بچمە تەواری و لێدوانەکی بدەم لۆ دەستگایەکانی ڕاگەیاندنی..!
هەرکووی هەبوو چایەکەم خواردەوەو هەستام بچمە دەرێ، دایە جووجە هات و گۆتی : ئەوە کێوە دەچی جەرگۆ ؟ گۆتم : دەزانی چیە، چیدی بەمن مەرێ جەرگۆ، برێ جەنابی وەزیر و خلاس و بڕایەوە، گۆتی : وەی بەچاوان جەرگۆ، ئەگەر چیدیم وەگۆ ئەو سەرەی من لە خمێ بنێ، باشە جەرگۆ..! گۆتم : ئەوە کەلکی قسە کردنێی نیەو هەر وازی لێبینم باشە، چوومە خوارێ و لۆ گەراجی ڕۆێشتم، دیتم کەسی لێنەبوو چۆل و هۆل، ئیللا ئۆپترایەکی لێبوو، گۆتم : دەبی ئەوە ئی کێبی، چوومە کن پۆلیسەکانی دەرکەی، دیاربوو سێ پۆلیس بوون ڕاوەستابوون، ئێکەکیان مەنجەرەکی گچکەی لەسەر هیتەرەکی دانابوو، چەقووەکی دەو مشاری پێبوو، تەماتەی هورد دەکردو لە مەنجەرەکەی دەکرد، وەکی چاویان بەمن کەت هاتن و بەڕێز وەستان، گۆتیان : فەرموو گەورەم ئەمرکە..! گۆتم : کیهانتان تڕومبێلی هەیە، ئێکیان گۆتی : ئەمن ئۆپترایەکم هەیە گەورەم، وا لەگەراجیم ڕاگرتیە..! گۆتم : دەبڕۆ بینە، بابڕۆین، ئیشەکم هەیە، گۆتی : وەی بەچاوان گەورەم، غاریدا لۆلای تڕومبێلەکەی بچی بینی..!
هەندەی نەبرد پۆلیسەکە بەخۆو بە تڕومبێلەوە هات، گۆتی : گەورەم، فەرموو سواربە، لە پێشەوە سواربووم، گێڕی گۆڕی و ڕۆیی، دوایێ ڕاوەستا، لەبیری کرد ئەمنی لەگەرە، ئاوڕەکی لە دوو پۆلیسەکەی داوەو گۆتی : وەڵڵا بەشی من هەرنەگرن لەو تەماتەو ڕونەی عەرزتان دە...م..! بەدەستە خۆم نەبووم پێکەنینم هات، ئاوڕی داوەو ئەمنی دیت، ڕەنگی وەکی خورمای لێهات و نەیزانی چبرێ، ئاخیری گۆتی : گەورەم، داوای لێبوردن دەکەم، وەڵلا لەبیرم کرد ئەتووم لەگەرە..! گۆتم : هەرگێش مەدێ، تەماتەو ڕوون چاوی پیاوی تاری دەکا..! گۆتی : کێوە بچم گەورەم ؟ گۆتم : بڕۆ تەواری ! گۆتی : خۆ داکی منداران نەسووتایە ؟ گۆتم : ناوەڵلا، گۆتی : ئەدی مندارەکەت نەفتی خواردتەوە ؟ گۆتم : نەخێر..! گۆتی : دیتمەوە، گۆتم : چت دیتەوە ؟ گۆتی : کوڕە گەورەکەت دەستی بەبەر دەرکەی کەتیە ! گۆتم : نەخێر ئەوەش نیە، بەس ئەتوو دەرێی گێ نادەیە ئەخبارو تەماشا تەلەفزیۆنی ناکەی ؟ گۆتی : ناوەڵلا گەورەم، دوژمنم درۆیە، لۆیێ ئەو پۆلیسانەش ناوێرن هیچ خەبەرەکم لۆ بگێڕنەوە چونکە ئەمن بە دەنگ و باس و چشتی وا هەموو قالبم ڕەق دەبی و مەعیددەم دەترشێ..! لۆ چبووە جەنابی وەزیر ؟ گۆتم : وەڵلا دنیاو بنیا دەرێن وەزیری کاروباری ژنانیان کووشتیە ؟ گۆتی : یەعنی ئەتوو ؟ گۆتم : بەرێ ! گۆتی : وەڵلا ڕێی تێدەچی ! گۆتم : چ ڕێی تێدەچی ؟ گۆتی : ڕێی تێدەچی ئەو درۆیانە وەکی ئاگری ناو پووشی براو ببتەوە، گۆتم : لۆ ؟ گۆتی : وەڵلا سیاسیەکان سێ جەمە نان و درۆمان دەرخوارد دەدەن..!

گۆتم : باسی سیاسەت مەکە بانەمان گرن ! گۆتی : ههههههه، ئەتوو وەزیری و ئەوها دەرێی، دەبی قوڕ بەسەرەکی من چبرێ ! گۆتم : سوحبەتی دەکەم سوحبەت ! گۆتی : جەنابی وەزیر ڕاپۆرتەکم لەسە نەنووسی و سەرم لەقوڕێ ڕاکەی ؟ گۆتم : لۆ وەدەرێی ؟ گۆتی : ماخران ڕاپۆرت نووس هەند زۆر بووینە، وەڵلا وەبیللا لە مووی بن باغەری پیاوی زیاترن ! گۆتم : جێت نەدیتەوە ئەوێ نەبی ! گۆتی : فشەیە فشە، بەخوای ئەوەی دنیای بە قورسی بگری فلیمی وەها دەسووتێ، بەسابوونی لۆکسیش ناشوورێتەوە..! باشبوو خوا ڕەحمی کردو گەیشتینە تەواری، هاتمە خوارێ و گۆتم : زۆر مەمنون، ئەتوو بڕۆوە وەزارەت و چاوەڕێم مەکە، گۆتی : ناوەڵلا ناڕۆم هەتا لەگە خۆمت نەبەمەوە، گۆتم : ئەو ئەزیەتەی ناوێ، مام عەوڵاو جەعۆی سایەقم بە تڕومبێلەوە لێرەنەو لەگەوان دێمەوە..! گۆتی : زۆر باشە، خوات لەگەربی جەنابی وەزیر..!
ڕۆیشتم لۆ ناو تەواری دیتم دنیا خڕبوویتەوە، یەکسەر لۆلای کامیرەی تەلەفزیۆنەکان چووم، گۆتم : بەشکو یەکسەر لێدوانی بدەم و خەرکەکە بزانی درۆیە، گەیشتمە وێ دیتم مام عەوڵا وا لێدوانی دەدا لۆ تەلەفزیۆنەکان، ئاگای لەمن نەبوو، دەیگۆ : بابە وەڵلا وەزیر ساغەو بەرای لێنیە، تازە بەخۆم لەکنەوی هاتم لە وەزارەت و ئەمن پاسەوانی ویمە، ڕاست چوومە پێش کامیرەکان و گۆتم : ئەمن وەزیری کاروباری ژنانم و ساغم و هیچم لێنەهاتیە، تکایە ئەو هەواڵە درۆیەی ڕاگرن و چیدی براوی مەکەنەوە ! پەیامنێرەک گۆتی : ئەدی مادام ساغی ئەو لاچاوەت لۆ شین و مۆر بووە، دیارە بە تەئکید کێشەک هەیە..! گۆم : کاکە هەرچی هەبی کێشە نیە گرنگ ئەوەیە ئەمن ساغم و داوا لە کارمەندەکانی وەزارەتەکەم دەکەم فەوری بگەڕێنەوە وەزارەتی..!
تەماشام کرد لە پشتەمن بووە هەلهەلە لێدان، ئاوڕم داە دیتم کارمەندەکانی وەزارەتیە، ست گوڵاڵە لە پێشیتیان و دەست هەردەشەقێنی و دەرێ هەلهەلەی لێدەن ! جەعۆ سەری لەبن گێی نام و گۆتی : وەڵلا وەبیللا سێبەشیان درۆی دەکەن، هەموویان گەش ببوونەوە، هەتا ئەتوو هاتی ئەوجە گێڕیان گۆڕی ! گۆتی : گێمەدێ دنیا هەر ئەوهایە.. گوڵاڵەخان در خۆشی خۆی دەربڕی و گۆتم : پێیان برێ بابچینەوە وەزارەتی، گۆتی : بەچاوان..! ئیدی ڕوخسەتم لە دەستگایەکانی ڕاگەیاندنی وەرگرت و گۆتمە، جەعۆو مام عەوڵای بابڕۆین..! گەیشتینە کن تڕومبێلی و سواری تڕومبێلی بووین و بەڕێکەتین لۆ وەزارەتی..!
جەعۆ گۆتی : ئوستاج، وابزانم دۆڵمەکەی دایە؟جووجەشمان فت ! گۆتم : واپێدەچی ! مام عەوڵا گۆتی : ئیمن مسۆگەرەو ئەنگۆش کەیفی خۆتانە، جەعۆ گۆتی : پیرەسە لۆ ئیتۆ مسۆگەرە !؟ گۆتم : پێدەچیمست زولەیخا بەشی هاویشتبیتە پەنایێ..! مام عەوڵا گۆتی : دەستخۆش جەرگۆ ! گۆتم : ئەوەچیە، هەر ئەتوو مابووی برێی جەرگۆ ! گۆتی : دایە جووجە مەدرەسەیە، ئەمە هەر ڕۆژەی چشتەکی لێ فێر دەبین..!

گەیشتینەوە وەزارەت، پۆلیسەکە لە پێش دەرکەی بوو، سەلامەکی دەرەجە ئێکی لۆ کردم، گۆتمە جەعۆی ڕاگرە..! ڕایگرت و گۆتمە پۆلیسەکەی : تەماتەو ڕوونیان لۆ هەرگرتبووی ؟ گۆتی : ئا ئا، سەیدی لۆ نایێی پارووەکی بخۆی ؟ گۆتم : زۆر مەمنون، ئەتوو لۆ نایێی دەعوەتی من بی ؟ پێکەنی و گۆتی : بێ ئەدەبی نیە قسەکی بکەم ! گۆتم : ئەوەی لەدرتە برێ ! گۆتی : وەڵلاهی هەنکی یەک کەرم خواردیە و چجێ نەمایە تێیکەم، با ئەو دەوعەتەی جەنابت لۆ ڕۆژەکیدی بی ! گۆتم : وەی بەچاوان، ئەمن لەخزمەت دامە ! جەعۆ پێی لێنا لۆلای گەراجی و ئەمن هەر فکرم لە باشی و سادەیی کوڕە هەژارو کاسبەکانی خۆمان دەکردەوە، بەڕاستی ئەگەر ئەو میللەتە شوانەکی باش و دڵسۆزو دەستپاکی هەبی، لە مووی لانادا..!
چووینەوە ناو وەزارەت و دیار بوو ست گوڵاڵە هەموو کارمەندەکانی خڕکردبۆوە لۆ پێشوازی من، هەر چوومە ژۆرێ بووە هەلهەلە لێدان و چەپرە کووتین، دەستم برند دەکردو سەلامم لێدەکردن وسوپاسم دەکردن، دەمزانی هەندەکیان زۆر بە ڕاستگۆیانەو درسافی ڕاوەستاینەو هەندەکیشیان درۆی دەکەن و دوو ڕووییە پیشانی منی دەدەن، ئیدی ژیان ئەوهایە و ناکرێ هەموو کەس لێت ڕازی بی، هەتا ئەگەر لەسەر هەقیش بی، درنیابووم ئەگەر ئەو کووشتنەی من ڕاستبایە، زۆر کەس شینی لۆ دەگێڕام و زۆریش شاییان دەگێڕاو سەر چۆپیەکەیان بەخۆ دەگرت..!
گوڵاڵە خان هاتە پێشەوە و بەگەرمی بەخێراتنی کردم و سوپاسی خوای مەزنی کرد کە سەلامەت بووم، ئەمنیش وتەکی کورتم پێشکەش کردو سوپاسی هەمووانم کرد، ئیدی چوومەوە ژۆرەکەی خۆم، کارمەندەکانی نووسینگەی خۆم بەخێراتنەوەیان کردم و خۆشحاری خۆیان دەربڕی بەسەلامەتیم، سوپاسم کردن، هەندەی نەبرد شەربەتەکیان لۆ هینام گۆتیان : ئەوە دیاری سەلامەتیتە..! فڕەکم لێداو گۆتم : ئەرێ مام عەوڵا چیلێهات ؟ گۆتیان تازە لێرەبوو، گۆتم : بڕۆن بیبیننەوە..!
مام عەوڵا هات، دیتم دەوی دەستڕیەوە، گۆتم : دەرێی لێت دایە لەدۆڵمەی ؟ گۆتی : ئحم ئحم، ئەرێوەڵلا ست زولەیخا خۆشبی، گۆتم : باشە ست زولەیخا لێرە چ دەکا، ئەدی ئیمتیحانی نیە ؟ گۆتی : بەرێوەڵلا، بەران لەبەر دەوعەتەکەی هاتبوو، گۆتم : بەمنت نەگۆ دایە جووجە لۆ مەدرەسەیە ؟ گۆتی : بەینی خۆمان بی ئوستاج، دایە جووجە ست زولەیخای لۆ تەرتیب کردم، گۆتم : نەبابە ؟ گۆتی : ئەرێوەڵلا، ئەگەر دەرێی پێی دەرێم، وەڵلا لە ماوەی بیست و چار سعاتی ژنەکت لۆ تەرتیب دەکاو دیلیڤەریشی هەیەو هەر ئەزیەتی ناوێ بەخۆت بچی..! گۆتم : مام عەوڵا ئەمن تاقەتی ئەو شتانەم نیەو وازم لێبینە ! گۆتی : ئەمن لۆ توومەو ئەتوو لۆ کێتە ! وەڵلا وەبیللا ئەو دەست و قەرەم و کورسیەی تووم هەبایە، هەموو جمعەو خەمیسان ئێکەکم لە عاردی دەدا..! گۆتم : بڕۆ دۆڵمەکەی تەواوکە بڕۆ، هەتا ئەخلاقت تێک نەدایمە، باشبوو مام عەوڵا چووە دەرێ..!
دەوام بەرەو تەواو بوون دەچوو، بەڕێوەبەری نووسینگەی سەرۆک وەزیرانی تەلەفۆنی لۆ کردم و گۆتی : سبەینێ سعات دە دانیشتنی ئەنجومەنی وەزیرانە، تکایە ڕاپۆرتی وەزارەتی لەگەر خۆت بینە، گۆتم : باشە ئیشاڵلا، بەچاوان..! فایل و مایلم پێچاوەو هاتمە دەرێ، سواری تڕومبێلی بووین و گەڕاینەوە لای مارێ، وەکی گەیشتمە لای مارێ، دیتم کۆرانیمە جممەی دێ، گۆتم : یا ئەڵلا خێر، دەبی چببی ؟ جەعۆ گۆتی : لۆ نازانی چبووە گدۆ، خەرکی گەڕەکێ هاتینە ئەخبارت بپرسن چونکە سەلامەت دەرچووی، گۆتم : ئا ئێ ئێ، وەڵلا هەر لەبیرم نەبوو، لەتڕومبێلی هاتمە خوارێ و بووە دۆرو زوڕنا کووتان، جەماعەت هەمووی چەپرەی لێدەدا، پیرداو بێ ددان پەرۆکەکی سۆری بەدەست گرتبوو و بای دەدا، لەوسەری خەرکەکەی بە لەرزانە دەچووە ئەوسەری، شەمسەدین گەندەبای خۆی کووشت هەنکی هەرپەڕی، تەماشا دەکەم میرۆ هەشت نۆ چەکداری لەگەرە، بەخۆی حەفتاو پێنجیەکی پێبوو، ممکینە هەزار گووللەی بیکەیسیشی لەخۆی لوول دابوو، هاتە پێشەوەو لوولەی لە عاسمانێ کرد، پەنجەی پێوەناو هەر حەفتاو پێنجی بەتار کرد، ئەمن هەر زەندەقم چوو، چونکە حەفتاو پێنجیەکەی بەیەک دەستی گرتبوو، دەمگۆ هەونکە لەدەستی دەکەویتە خوارێ و ئەمن دەکاتە بێژینگ..! هوردە هوردە چووینە ژۆرێ، دیتم سێ چار کاوڕی خڕو پڕ بە ئاسنی وەکرابوون و دوو سێیەک گۆشتیان لێدەکردەوەو لە تکەیان دەدا، لە حەوشێمە کورسی بەڕێز داندرابوون، لەسە کورسیەکی دانیشتم و جەماعەتیش هەمووی لەدەورەم بوون، نەنە خانێ بە سنیان شەربەتی دەگێڕاو داکی ئەحمەدی و سێ چار ژنیدی سفرەیان ڕادێخست.. هەندەی نەبرد نان داندراو فەرموویان کردو دەستمان بەنان خواردنێ کرد، جەعۆ گۆتیە مام عەوڵای : پیرە سە، کوو خۆت بەو دۆڵمە عیزەی تێر کرد، دەوجە بڕۆ لە گووپی خۆت بدە، ئەو نانە زەریفەت لە قیسە خۆدا..! مام عەوڵا گۆتی : خەمی منت نەبی جەعۆ، گۆشت بیژیە (زۆڵە)، جێی خۆی دەکاتەوە لەناو هورگی پیاوی..!

مەجید دۆنکی پاروەکی گەورەی کردو گۆتی : ئەرێ جەنابی وەزیر لۆ تەعیناتەکەی گەڕەکێ چت کردەوە ؟ خۆ ئەمە بە ژن و پیاوەوە عەرزوعارمان داتوو، ئەتوو جوابەکی مەت نەداوە ؟ گۆتم : وەڵلاهی کاک مەجید ئەمن زوو بەمام عەوڵام گۆ دامەزراندن ڕاوەستایەو با کەس چاوەڕێ نەکا، مام عەوڵا گۆتی : ئوستاج ڕاست دەکا، ئەمن بەخۆشم پێم گۆتن، بەران مەجید چونکە دۆنکیە، زوو زوو چشتی لەبیر دەکا..!
نەنە خانێ لەوسەری ڕاهات و دوو شیشە گۆشتی سەددامی هیناو لەپێش مام عەوڵای دانا ! جەعۆی ماری کم خۆی پێ نەگیراو گۆتی : ئەی نەنە خانێی فەقیر، بێ ساعێبی بێ تەگبیر، نازانی وەزع کووە و چ کارەساتەک بەڕێوەیە ! ئەمن و مام عەوڵا دەستمان ڕەق بوو، پارووش لە دەومان هیشک بوو، تەماشا ئێکدیمان کردو نەمانزانی چبرێین ! نەنە خانێ لە جەعۆی هاتە پێش و گۆتیە جەعۆی : هەی قالۆچە ! پێم برێ بزانم چ کارەسات بەڕێوەیەو چبووە ؟ باشبوو یەکسەر بەجواب هاتم و گۆتم : نەنە خانێ دیارە نەتزانیە مام عەوڵا معاشی وەرگرتیە ؟ گۆتی : ناوەڵلا لەکێ بزانم ! گۆتم : ئێ جەعۆ مەخسەدی ئەوەیە، یەعنی مام عەوڵا معاشی وەرگرتیەو دیاریەکی لۆ توو نەکڕیە..! مام عەوڵا یەکسەر ڕەنگی هاتەوە بەرێ و گۆتی : ئەو جەعۆیە خۆڕیە ئیللا دەبی وەزعەکەی تێکدا، ئەمن دامنابوو بکەمە سوفرایس لۆ خانێی، بەران ئەو سەیە تێکیدا..! هەنیشکەکم لە جەعۆی داو گۆتم : بێدەنگ بەو جوابی مەدەوە..باشبوو خوا ڕەحمی کرد وەزعەکە بە هێوری تێپەڕی..!
نان خوراو چایە خوراوەو وەختەکی خۆشمان بردە سەری بە سوحبەت و قسەی خۆش، گازی پیرداود بێ ددانم کردو سەرم لەبن گێی ناو گۆتم : کێ ئەو مەسرەفەی کردیە ؟ گۆتی : ئەوە چیە ئوستاج جوونمان پێدەدەی ؟ گۆتم : چشتی وا قبور ناکەم و ئیللاو بیللا دەبی پارەکەی وەرگرنەوە ! بەهەزار دەردی سەری ڕازیم کردو پارەکەی وەرگرتەوە، ئیدی هەتا درەنگ دانیشتین و دوایێ جەماعەت پەرتەیان کردو هەرکەسەو گەڕاوە ماری خۆی..!
ئەوشەوە بەهێوری تێپەڕی، بەیانی هەستام نانم خواردو بەڕێکەتم لۆ وەزارەتی، چوومە ژۆرەکەی خۆم و ست گوڵاڵە هات، گۆتم : ئەرێ باشە کا بەڕێوەبەری ڕاگەیاندنی وەزارەتی ؟ گۆتی : وەڵلا دەوام ناکا، بەس سەرە مانگان پیاوەکەی دێ معاشەکەی لۆ وەردەگری، گۆتم : لۆ بەخۆی نایێ، گۆتی : وەڵلا ممکینە بێزی نێ بێ، گۆتم : لۆ خۆی بەچ دەزانی، ئێستا تەلەفۆنی لۆ دەکەی و دەرێی هەر ئەوڕۆ بێتەوە دەوامێ، ئەگەر نا لەو پۆستەی لای دەدەم و لیژنەی لێکۆڵینەوەشی لەسەر دروست دەکەم، کەوا دەوامی ناکاو معاشی وەردەگری..! گۆتی : بەچاوان پێی دەرێم.. !
چوومە ئەنجومەنی وەزیران، گۆتمە مام عەوڵاو جەعۆی : ئەنگۆ بڕۆنەوە وەزارەتی، ئەگەر ئیشم بەنگۆ بوو، تەلەفۆنتان لۆ دەکەم، گۆتیان : زۆر باشە، خوا حافیزیان کردو بەڕێکەتن، بەخۆشم چوومە ژۆرێ و لۆلای ژۆری سەرۆکی ئەنجومەنی وەزیران ڕۆیشتم، گەیشتمەوێ و دیتم چار پێنج وەزیر هاتینە، سەلامم لێکردن و دۆقەم لەگەر کردن، دانیشتم و بەخێراتنیان کردم، جاحێرەک قاوەک و ئاوەکی لۆ هینام..! وەزیری ڕۆشنبیری سەری لەبن گێی نام و گۆتی : کوی ؟ گۆتم : باشم، ئەتوو کوی ؟ گۆتی : باش نیمە ! گۆتم : لۆ ؟ گۆتی : دەزانی ئەو گەوادە واز ناینی ! گۆتم : کیهان گەواد، ماشەڵلا ئەمە گەوادمان گەلە زۆرە..! گۆتی : کورە شڕبلی دەرێم شڕبل ! گۆتم : لۆ چیدەوێ دیسان ؟ گۆتی : وەڵلا نامەی لۆ هەمووان ناردیەو هەڕو گیفمان لێدەکاو دەرێ : ئێکی دە دەفتەرم لۆ نەنێرن، فلیمەکەی براو دەکەمەوە ! گۆتم : کورە دە وس ! گۆتی : ئەرێ بەگۆڕی حەسەن زیرەکی..!

گۆتم : ئەوجە بەتەمانە چبکەن ؟ گۆتی : بەخۆشم نازانم، ئەو سەگبابە کوو بووە قیڕو بنیشت و بەمە وەنووسا..! گۆتم : خەتای خۆتان بوو، ئێستا گوونتان کەتیتە ناو دەستی وی و بەکەیفی خۆی ڕایدەکووشی..! گۆتی : ڕاستە..! لەو قسانە دابووین سەرۆک وەزیران هات و لەبەری هەشتاینەوە، دۆقەی لەگەر هەموومان کرد، پاشان فەرمووی لێکردین لۆ هۆری دانیشتنی، ئەو پێشکەت و ئەمەش کەتینە دووی، هەرکەس لەجێی خۆی دانیشت..
سەرۆک وەزیران دەستی بەقسان کردو لە پێشەکیەکەی باگەرمی بەخێراتنی هەردوو وەزیرە ازەکەی کردو گۆتی : هیوادارم ئەرکی سەرشانی خۆیان بەباشی ڕاپەڕێنن، ئەوانیش زەردەخەکیان کردو گۆتیان : جەنابی سەرۆک وەزیران درنیابە ئەوەی لە توانامان دابی دەیکەین، پاشان سەرۆک وەزیران ڕاپۆرتی چالاکیەکانی ئەو ماوەی سەرۆکایەتی خۆی خیندەوەو بەدرێژی باسی کاروباری حکومەتی کرد، گۆتی : ڕاستە قەیران زۆرە، گرفت زۆرە، گەندەڵی زۆرە، بەران ئیرادەمان بەهێزەو میللەت ئامادە قوربانی بە هەموو چشتەکی بدا، ئەوەش مایەی درخۆشیمانە، ئەمە بەردەوام دەبین و ڕۆژ لەدوای ڕۆژ باشتر دەبین، بەڕۆژەک و دوو ڕۆژی باش نابین، ئەمە هێشتا ساواینەو پێویستمان بەکاتی زیاترە، دوژمنمان زۆرەو چار دەورەمان بەگورگ دەورە درایە..! جەماعەت هەمووی تێکڕا چەپرەکی بە قووەتیان لێداو دەستخۆشیان لە سەرۆک وەزیرانیکردو پەیمانیان دا شەوو ڕۆژ لەسەر ئێک دانێن لۆ خزمەتی میللەتی..!
قسە زۆر کراو هەر وەزیرەی ڕاپۆرتی خۆی خیندەوە، هەمووی دەیانگۆ وەزع زۆر باشە و میللەت هیچ کێشەی نیەو ژیانەکە خۆش دەڕوا، زۆربەشیان داوای بودجەی زیاتریان دەکرد لۆ وەزارەتەکەیان، لەگەر زیاد کردنی نەسریەی نووسینگەی وەزیری و کڕینی چەند تڕومبێلەکی تازە لۆ وەزیرەکان چونکە زۆر زەرورە، وەزیری شارەوانی گۆتی : پێشنیاز دەکەم هەر وەزیرەی پارچە عاردەکی هەزار مەتری بدرێتێ و حکومەت پارەی بیناکردنیش سەرف بکە، زەرورە هەر وەزیرەک خانیەکی گەوری هەبی و ماریشی جودابی و تێکەر خەرکی نەبی، وەزیری تەندروستی گۆتی : داوا دەکەم کار ئاسانی بکرێ لۆ کردنەوەی خەستەخانەی ئەهلی و باجیشیان لێ وەرنەگیرێ، وەزیری پەروەردە گۆتی : تکایە قوتابخانەی ئەهلی زیادکەن، چەند زۆربی باشترە، حکومەت با ئەرکی خیندنێ لەکۆرە خۆی کاتەوەو خەرک خۆی مەسرەف لە منداری خۆی بکا، وەزیری کارەبای گۆتی : پێم باشە کەرتی کارەبای بەتەواوی ببیتە ئەهلی و حکومەت واز لەو سەر هێشەی بینی ! وەزیر خوێندنی باڵا کە یەکەم دانیشتنی بوو، گۆتی : وەڵلا هەقی ئەوەی هەیە زانکۆی ئەهلی زۆر زیاد بکرێن و خەرک با منداری خۆی بنێریتە وێندەرێ، سەرۆک وەزیران گۆتی : ئەو پێشنیازانە چشتی باشن، بەران دەبی کەس خۆمان ئەو پڕۆژانە بکەن و لەپەنا سێبەری خۆمان بی و واریداتەکەش لۆ خۆمان بی..! وەزیری دارایی ڕای وابوو باج زیاد بکرێ و باج لەسەر هەموو چشتەکی دابندرێ، هەتا دەیگۆ هەق وایە ئەوەی سەتەلایت و تەلەفزیۆنیش بەکار دەینی باجی لێ وەرگرین، دەیگۆ پێم باشە باجەکان ببنە دوو قات و سێ قات، وەزیری ئاوقاف گۆتی : وەڵلا هەق وایە ئەوەی دێتە مزگەفتێش باجی لێ وەرگرین، ئەو خەرکە کوو دەبی بێنە مزگەفتێ و بەلاش نوێژێ بکەن، بێجگە لەوەش ئەو مەلایانەی ڕەخنە لەحکومەتی دەگرن و هاوڵاتیان هان دەدەن دژی حکومەت لە خوتبەی دوور بخرێنەوەو لێپرسینەوەیان لەگەر بکرێ، هەر مەلایەکیش دوعای لۆ حکمەتی نەکا معاشی ببڕین، وەزیری ناوخۆ گۆتی : ئەو فەیس بووکە چاک بێتامی کردیەو بەچاک و بەخراپ قسەمان پێدەرێ، زەرورە خەمەکی لێبخۆین و کۆنترۆلی بکەین، وەزیری ڕۆشنبیری گۆتی : ئەوە ئاسان نیە، بەران دەکرێ سەتان پەیجی سەربەخۆمان دروست کەین و ئەنواع و ئەشکال هەواڵی براو کەنەوە و خەرک درۆ و ڕاستی لێ تێکبچی..!
مایتی...[1]