قوماش 52
نووسینی: #ئوسامە جەمیل#
گۆتم: بەرێوەڵلا، دەمەوێ ماریانم لۆ ببینیەوە، بەس تێمان بگەینە کوو دەیبینیەوە؟ گۆتی: کاکە، ئێستا بەبیرم هاتەوە، وەختەکی لە دەواجینی سەر ڕێی مەسیفی ئیشم دەکرد، عەمەلەکمان لەگەربوو، لە تەمەنی خۆم دەبوو، جارەکی گۆتی: ئەگەر ئیشەک چشتەکت بوو لە دائیرەی ئاوێ، خزمەکی لەوێیە ناوی قادرە فەندیە، ئەنگۆش نەتانگۆ قادرە فەندی لە دائیرەی ئاوێیە، دە وەڵلاهی هەبی و نەبی ئەو قادرە فەندیەیە کە ئەو کابرایە باسی کرد! گۆتم: ئەوجە ماریان پێدەزانی؟ گۆتی: ئەگەر لە جێی خۆیان مابن بەرێ، قەدیم ماریان لە سێتاقان بوو لە جادەی کانۆ چاوشینی، عەسرێ لۆی شۆڕدەبمەوە و ئیشاڵلا وەخەبەرەکی دەکەوم! گۆتم: زۆر باشە پێکەوە دەچین! گۆتی: نا ئەتوو مێ، ئەمن بە تەنێ دەچم، نەکوو شکی شتەکی بکاو پێمان نەرێ! بابم گۆتی: بەران چشتەک هەیە، ئێستا قادرە فەندی تەقاویت بووە و لە دائیرەی نەمایە، کابرا نارێ چیشت بە قادرە فەندیە؟ گۆتی: دەرێم پارەی ئاوێمان زۆر لۆ هاتیتەوەو دەبی چارەکمان لۆ بکا، ئەگەر گۆتیشی تەقاویت بووە، دەرێم قابیلە ئێکەکی نەناسی لە دائیرەی ئاوێ تەکلیفەکی لێبکا! بابم گۆتی: ئەو قسە ڕێی تێدەچی، دەوجە قادر دەست و برد بکە و زوو خەبەرەکمان لۆ بینە! قادر قرپەستوور گۆتی: دەنگۆ جارێ دیشلەمەکی دیم لۆ تێکەن، ئەوجە ئەمە هەق و عیسابی خۆمان دەکەین!
پاشی عەسرێ قادر ناوی خوای لێهینا و بەڕێکەت لۆ ماری ئەو برادەرەی، ئەمەش لە مارێ دانیشتبووین و چاوەڕێی خەبەرەکمان دەکرد، لە هیکڕا لە دەرکەی درا، داکم لەلای دەرکەی نێزیک بوو، لەگەر زەکیەی جیرانمان قاپ و قاچاغی دەشووشت، دەرکەی کردەوە، بەینەکی لە پێش دەرکەی ماوە، ئەوجە هاتەوە و گۆتی: کوڕم جاحێرەک هاتیە ئەتووی دەوێ، گۆتم: نەتناسی؟ گۆتی: ناوەڵلا، بابم گۆتی: ئاگات لەخۆبی، قسەو مسان نەکەی، نەکوو دائیرەی ئەمن هەر تاقیبت بکەن! گۆتم: زۆر باشە! چوومە دەرێ دیتم جاحێرەک بوو، کراس و شەروارەکی لەبەربوو، تەنکە ڕدێنەکی هەبوو، گۆتم: بەخێراتی! گۆتی: بژی سوپاس، وەزعت کوە؟ گۆتم: باشم فەرموو ئەمرکە! تەماشایەکی ئەولاو ئەولای کرد کەس دیارنیە، گۆتی: لەکن بازۆی هاتیمە، سەلامت لێدەکا، گۆتی: زۆرم پێخۆش بووە بەربووە! یەکسەر درم لێیدا و ترسام ئەو جاحێرە جاسووسی دائیرەی ئەمن بی و بیەوێ تووشی کێشەکم بکا، لۆیێ گۆتم: کاکە بازۆ کێیە، ئەمن بازۆی ناناسم و نازانم کێیە، چەند سارە ماریان لێرە نەمایەو ڕۆییە، هەر نازانم مایە یان نا! گۆتی: ئەو قسە چیە، بازۆی برادەرت دەرێم، ئەوی ئێستا پێشمەرگەیە، گۆتم: کەس بەو ناوەی ناناسم و بڕۆ بەخێرچی! چوومە ژۆرێ و دەرکەی حەوشێم پێوەدا، چاوم پڕی ئاو بوو لۆ خەبەرەکی بازۆی، بەران هەرچەند کردم نەمتانی تەئکیدکەم ئەو کابرایە لەوێ هاتیە یان نا، دائیرەی ئەمن ئەو فرت و فێرانەیان هەبوو، لۆ پێوەکردنی خەرکی! لۆیێ چوومەوە ژۆرێ، بابم گۆتی: چبوو؟ گۆتم: شتەکی وا نەبوو، برادەرەک بوو، گۆتی: برادەری چ کوڕم، قسان بکە، لۆ ڕەنگت تێکچووە! گۆتم: شتەکی وەهانیە، گۆتی: پێم برێ کوڕم بزانم ئەو جاحێرە کێبوو؟ گۆتم: وەڵلا بابە، گۆتی: لەکن بازۆی هاتیمە و سەلامت لێدەکا! بابم ڕەنگی تێکچوو، گۆتی: ئەتوو چتگۆ؟ گۆتم: وەڵلا گۆتم: ئەمن بازۆی ناناسم و ئێستا برادەرم نیە، چەند سارە ماریان باری کردیە و لێرە نەمایە! بابم گۆتی: خۆ قاقەز و ماقەزی نەدایێ؟ گۆتم: ناوەڵلا! گۆتی: خوا بتپارێزی، ترسی ئەوەم زۆرە جەماعەتی دائیرەی ئەمن بن و بیانەوێ تووشی کێشەت بکەن، کوڕم نێزیک ماری بازۆش نەبی، تەئکیدبە موراقەبەیان لەسەرە و دەیانەوێ بزانن کێ دەچتە ژۆرێ و کێ دێتە دەرێ! گۆتم: ئەدی کوو خەبەرەکی گەلاوێژ خان و مام ئەحمەدی بابی بزانم؟ گۆتی: کوڕم ئەمە دوور بە دووری ئاگام لێیانەو ئەلحەمدولیللا سەلامەتن! ئاخەکم هەرکێشاو گۆتم: ئەی بازۆی فەقیر، چت لێهات و کوو لەسەمن دەربەدەری چیاو چۆلان بووی!
بەرەبەری ڕۆژئاوابوونێ قادر قرپەستوور هاتەوە، نەچۆوە ماری خۆیان و یەکسەر لایدا ماریمە، سەلامی کردو لە ناو هەدیقەی لە تەنیشت بابم لەسەر کورسیەکی دانیشت، بەخێراتنمان کردو جامە ئاوەکی خواردەوە، بابم گۆتی: دەی قادر، بزانم شێری یان ڕیوی! قادر گۆتی: ئەوی ڕاستی بی نەشێرم و نە ڕیوی، بەرکوو پرینگم! گۆتم: ئەوە مەعنای چیە؟ گۆتی: کاکە، ماری ئەو برادەرەم دیتەوە، بەینەکی باش دانیشتین و قسەی قەدیممان زۆر گێڕاوە، دوایێ ئەخباری ماری قادرە فەندیم لێپرسی، گۆتی: چیشت پێیتی؟ گۆتم: ئیشەکم بە دائیرەی ئاوێ کەتیە بەشکوو لۆم بکا، گۆتی: وەڵلا تەقاویت بووە، گۆتم: قابیلە کەس نەناسی لە دائیرەی ئاوێ ئەو ئیشەم لۆبکا، دەتوو ناونیشانیم بدێ و با ئەمن بچمە ماری، بەشکوو هیمەتەکم لۆبکا، وەڵلا ئەو برادەرەم وەکی زێڕان ناونیشانی قادرە فەندی دامێ، گۆتی پێشان ماریان لەلای خەستەخانەی جمهوری بوو، بەران ئێستا لەوێ نەماینەو چووینە گەڕەکی ئازادی! گۆتم: ئازادی گەڕەکەکی گەورەیە، پێم برێ لە ئازادی لەچ کەرخەکینە؟ گۆتی: وەڵلا لە دەوروبەری مزگەفتی ئازادینە، بابم گۆتی: ئەی مارت ئاوابی قادر، وەڵلاهی ئیشەکی مەردانەت کرد، ئەمەش لەو سێ چار ڕۆژەی تاقیبەکی ماریان دەکەین و دەیانبینینەوە و وە سەروسۆراغەکی دەکەوین! قادر گۆتی: بەران چشتەکیدی هەیە! کە قادر ئەو قسەی کرد درم ڕنگەی لێوەهات، ترسەک هەموو لەشی داپۆشیم و گۆتم سەتاسەت دەرێ هەورین مێردی کردیە! گۆتم: دەبرێ مام قادر برێ، ئەو چشتە چیە؟ قادر گۆتی: وەڵلاهی ئەو خزمەی گۆتی: قادرە فەندی جەڵتە لێی دایەو دەستەک و پێیەکی مردیە، هەتا پێی ناکرێ ئاویش بە دەستی خۆی بخواتەوە، مندارەکانی وا هات و چووی عیلاج تەبیعی پێدەکەن و وا تێدەگەم لە خەمان جەڵتە لێی دابی، ئەمنیش لێی وەپێش کەتم و گۆتم خەمی چ؟ گۆتی: وەڵلاهی کوڕەکی لە دائیرەی ئەمن بن بزر کراو کابرایەکی ڕئیس جاش ملی لەبەر ملی نابوون، دیاربوو داڵغەی لە کیژەکی قادرە فەندی دابوو، هەموو ڕۆژێ هەریدەکووتا سەر ماریان و تەشقەرەی پێ دەکردن، ئیدی قادرە فەندیش بەرگەی ئەو هەموو خەمەی نەگرت و جەڵتە لێیدا! گۆتم: باشە نەیگۆ کیژەکەیان دا ڕەئیس جاشەکەی یان نا؟ قادر گۆتی: نەخێر نەیگۆ، دیاربوو ئەو خزمەیان هەر هەندەی لێ دەزانی!
داکم گازی کردم و گۆتی: کوڕم وەرە ئەو شەربەتەی لۆ قادر و بابت ببە! هەتا ئەمن هەستام و چووم شەربەتەکەی بینم، قادر چرپەکی لەگەر بابم کرد، ئەو چرپە دری منی هاویشتە قرت و فرت، شەربەتەکەم هیناو لە پێش بابم و قادرم دانا، هەستم کرد بابم ڕەنگی تێکچووە و وەکی جاران نیە، بابم دەستی لۆ شەربەتەکەی بردو لە دەستی بەربۆوەو ڕژا ناو هەدیقەی! گۆتم: خێرە بابە دەرێی تەواو نی؟ گۆتی: نا کوڕم نا هیچ نیە ئیشاڵلا، هەر بڕەک سەرم دەسوڕێ، بڕۆ حەبەکی ژانە سەرێم لۆبینە! چووم حەبەکم لۆ بابم هیناو هاویشتیە زاری و قوومە ئاوەکی بەسەر داکرد! ئەمن هەستم کرد شتەک بووبی و قادر لە منی شاردەوەو بە بابمی گۆ، بەران هەردووک ئینکاریان کردو پێیان لێنەنا!
قادر بڕەکی دی دانیشت و مەلای مەغریبێ بانگی دا، گۆتیە بابم نەچینە مزگەفتێ نوێژەکەی بکەین، بابم بە درەکی پڕ لە خەم گۆتی: بابچین قادر بابچین، ئیدی بابم و قادر بەرەو مزگەفتێ چوون و ئەمنیش خەمی خۆم تەسلیمی چارەنووسەکی نادیار کرد، ئەو نادیارەی قادر بە دزی بە بابمی گۆت و لە منی شاردەوە!
مایتی.[1]
⚠️ تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!
Kurdipedia is not responsible for the content of this item. We recorded it for archival purposes.
This item has been written in (کوردیی ناوەڕاست) language, click on icon
to open the item in the original language!
ئەم بابەتە بەزمانی (کوردیی ناوەڕاست) نووسراوە، کلیک لە ئایکۆنی
بکە بۆ کردنەوەی بابەتەکە بەو زمانەی کە پێی نووسراوە!
This item has been viewed 674 times
Write your comment about this item!