قوماش 95
نووسینی: #ئوسامە جەمیل#

سەرم نوی کرد و نەمزانی چ وەرامی بابم بدەمەوە، گۆتی: کوڕم ئەمن و داکت لۆتوومانە ئەتوو لۆ کێتە، وەڵڵا وەبیللا درمان لەناو دەستمان بووە هەتا ئەتوو هاتیەوە، کوڕم مەرێ بابم لەناو ئەوراق و کتێبەکانی من دەگەڕێ، خەبەرمان لۆهات تەفتیش هەیە لە گەڕەکێ بە غاردان لەگەر داکت ئەو ژۆرەی توو گەڕاین نەکوو چشتەکی تێدابی، ئەو نامەم لەناو کتێبەکی دیتەوە، کوڕم ئەمن تەئکیدم ئەو نامە بەزۆری بە هەورینی نووسرایە و بە هەناری فەقیرییان لۆ ڕەوان کردی، هەتا ئەو ڕەیس جاشە زەڕبەکت لێبدا، هەورین بەقەستی باسی جغارەی کردیە، هەتا ئەتوو نەچی، تەئکیدیش بە هەنار نەیزانیە مەسەلە چیە و بە در سافی لۆتووی هینایە! گۆتم: وەڵڵاهی بابە لەگەر شێرۆی چوومە سەر قەبران و کووی ئەتوو دەرێی ئەوها دەرچوو، پڕی سەر قەبران جاش بوو، داکم شەپەکی لە سینگی خۆیدا و گۆتی: ئەتوو بڕۆنێ ئەو کوڕە کوو بە پێی خۆی دەچیتە بن دەست و پێی عیزڕائیلی، ئەمن مردی ئەتوو زندی، ئەگەر لەسەر ئەو هەورینەی نەیانکووشتی ئەمن چنیمە، بابم گۆتی: ئیشاڵڵا هیچ نابی، بەران کوڕم بکە لە ڕاهی خوایی و واز لە هەورینی بینە، نە ئەوی بە کوشتن بدە و نە جەرگی مەش بسووتێنە، کورە کوڕم ئەو سەرۆک جاشە زاڵم و بێ دینە، کوڕم چ زەلامی بکوژی چ پەرداخە ئاوەکی بخواتەوە، لۆیی واز لە هەورینی بینە و فکر لە ژیانی خۆت بکەوە! گۆتم: باشە بابە باشە، ئیشاڵڵا بە کەیفی توو و داکم دەبی!
ڕۆژی پاشتر چوومە بازاڕی هەندە کەل و پەلم لۆ عەسکەری کڕی، لەگەر جانتایەکی، پاشان گەڕامەوە مارێ، درم بەوەی خۆشبوو، تانیم خۆم لە پیلانی ئەو جاشەی بپارێزم و هەورینیش قورتار کەم، تەئکیدم بچووبام ئەمن و هەورینی لەوێ دەکوشت و دەیکردە قەزیەی نامووس و کەس نەیدەتانی برێ لەل! گەڕامەوە مارێ، داکم سفرەی ڕاهێخست و مەنجەرە کفتەکی هینا داینا و قاپەکانی پڕی کفتە کرد، گۆتم: دایە دیارە کفتەت لێنایە؟ گۆتی: ناوەڵلا کوڕم، ئەوە خەجەی پلکم مامزێ بە تایبەتی لۆتوی ناردیە، هەها کوو پڕی کوودیە زەردی کردیە، ئاخر ئەو دەزانی ئەتوو حەزت لە کوودیە زەردیە لۆیێ، ماشەڵڵا خەجە کابانە، ڕەبی کیژم ڕووت سپی بی! ئەعسابم لە قسەکانی داکم نەما و بەزۆری خۆم گرت، ئاخر ئەمن دەمزانی داکم ئەو کووتکانە لۆمن ڕادەوەشێنی! گۆتم: هەونکە دەزانم خەجە ئەو کفتانەی پڕی پیاز کردیە، قابیلە ئەو بزانی ئەمن پیازی لە شیوێ ناخۆم، داکم پێکەنی و گۆتی: دەزانی کوڕم دەزانی، کفتەی بە جودای لۆتوو کردیە، ئەو کفتە درێژانە هەمووی بێ پیازن و پڕی قیمەنە و بە تایبەتی لۆ توو کرایە، لە دری خۆم گۆتم: وەڵڵا خەجە بوویتە موخابەراتی ئەمریکی و سڕ و تڕی من دەزانی!
نانەکەمان خوارد و یەک دوو چایەمان لەسەر کرد، بابم گۆتی: کەل و پەلی عەسکەریت کڕی کوڕم؟ گۆتم: بەرێ بابە، خوا عومر بدا سبەی نا دوو سبەی دەچمە تەجنیدی و دەڕۆم لۆ عەسکەری، بابم گۆتی: کوڕم گێ بدەمن، هەر ئەمری نەقرت دەرچوو لۆ شەڕی، خۆ بدزەوە و وەرەوە مارێ، ئیشالڵا خوای گەورە دەتپارێزی! گۆتم: خوا کەریمە ئیشاڵلا خوای گەورە بە دری هەموومان دەکا!
شەوێ قادر قرپەستوور و پلکە زەکیە هاتبوونە مارێمە، دانیشتبووین و بابم ڕادیۆی پێکردبوو، ئێسگەی لەندەنی کردبۆوە، ماجید سەرحان ئیخباری دەخیندەوە، گۆتی: ئەوڕۆ ئێران هجوومەکی زۆر گەورەی کردیە و زۆربەی شارەکانی خۆی وەکی محەمەڕە و قەسری شیرین و عیلامی گرتیتەوە، سوپای عیراق خراپ تێکشکایە و بە هەزاران جوندی عیراقی بە دیل گیراینە! بابم زۆر خەمی خوارد، گۆتی: هەر کوڕە فەقیر تێدەچی و دەکوژرێ، نە کوڕی سەدامی دەکوژرێ و نە کوڕی خومەینی، ئەو قوڕە لۆ کوڕە فەقیری گیرایتەوە، خوایە بە گەورەیی خۆت بمانپارێزی!
ئەمە لەو قسانە دابووین کوڕە گەورەکەی دختۆر شێرۆی بە تووندی هاتە ژۆرێ و گۆتی: فریامان کەون، مەفرەزەک هات و بابمیان قۆر بەست کرد و بردیان!

قیت بووینەوە و غارماندا ماری شێرۆی، دیتمان ژنەکەی لە حەوشێ دانیشتیە و بە چەپەرۆکان لەسەری خۆی دەدا، چار پێنج مندارە هورتکەش لە دەوری دانیشتبوون و دەگریان، بابم گۆتی: کیژم تێمان بگەینە بزانین چبووە؟ گۆتی: دەبی چببی، ئاخیری سەری شێرۆتان خوارد، کۆمەرە چەکدارەک هاتن لوولیان داو بردیان، گۆتم: چەکدارەکان کورد بوون یان عارەب بوون؟ گۆتی: کورد بوون، هەر کوردنیە داکی کوردی دە...ێ! قادر گۆتی: باشە نەتانزانی لۆ بردیان؟ گۆتی: ناوەڵلا نەمانزانی، لە دیار فەلیمی ئیبراهیمی دانیشتبوو، بەژۆرێ کەتن و بردیان، وەی کۆرەبم شێرۆ فەلیمەکەت تەواو نەکرد! دەوەرە پێکەنینت نێ، ئەو ژنەش خەمی ئەوەی نیە شێرۆ چی بەسەر دێ، خەمی ئەوەیتی فلیمی ئیبراهیمی تەواو نەکردیە! بابم ئەمنی جودا کردەوە و گۆتی: خۆت قورتارکە! گۆتم: بڕوا ناکەم لەسەرە من یان لەسەر وەزعەکی سیاسی گیرابی، ئەگەر لەسەرە منبا دەهاتن ئەمنیان دەبرد، نەک ئەو! گۆتی: ئەدی دەبی لۆ گیرابی؟ گۆتم: نازانم ڕەنگە مەسەلەکە شتەکیدی بی! قادر گۆتی: باشە چبکەین، کوو شێرۆی ببینینەوە؟ گۆتم: وەڵلا برێم چ، بەس خوا دەزانی ئێستا لەکێیە! مادام ئەوانەی هاتینە گرتیتیان کوردن پێناچی دائیرەی ئەمن بی، بابم گۆتی: کیژم ئەتوو هەندەی لەخۆ مەدە، مندارەکان خڕکەوە ئیشاڵلا شێرۆ بەدەردەکەوتەوە، مێردی توو چیکردیە هەتا بگیرێ، با ئەو دوو ژنە لێرەبن و ئاگایان لەنگۆ بی، ئەمەش دەچین هیممەتەکی دەکەین بزانین نایبینینەوە!
ئەمن و بابم و قادر هاتینە دەرێ، بابم گۆتی: با بچینە ماری موختاری بزانین هیچی لەسەرە، تەئکید موختار چشتەکی دەزانی، چونکە موختارەکان هەموویان پەیوەندیان لەگەر دائیرەی ئەمن هەیە! گۆتمان: بابچین! ئیدی شۆڕ بووینەوە لۆ ماری موختاری، وەکی گەیشتینە پێش دەرکەی، موختار لەگەر دوو سێ جیرانان لە پێش دەرکەی دانیشتبوو دۆمینەی دەکرد، کراوەکی گورگوری بە خواری لەسەری نابوو، هەردوو لا شەرواری هەتا بن چۆکی هەر کردبوو، قەرەمەکیشی لەسەر گێی دانابوو، سەلاممان لێکردن و موختار چاوی بە بابم کەت هەستاوە، سەلامی وەرگرتەوە و فەرمووی لێکردین لۆ ژۆرێ، بابم گۆتی: مەمنون دانانیشین لۆ پرسیارەکی هاتینە! گۆتیە بابم: وەی بەچاوان، فەرموو برێ! بابم گۆتی: تازە کۆمەرە چەکدارەک هاتینە شێرۆی جیرانی مەیان قۆربەست کردیە و بردیتیان، موختار گۆتی: شێرۆی مزەمید؟ گۆتم: بەرێ! موختار گۆتی: نەتانزانیە لۆ؟ بابم گۆتی: ناوەڵلا، وا هاتینە کنەتوو بزانین شێرۆ هیچی لەسەرە، دەبی دائیرەی ئەمن بردبیان! موختار گۆتی: یەک دەقە بچم دەفتەرەکەی بینم! موختار چۆوە ژۆرێ و بڕەک پێچوو هاتەوە، دەفتەرەکی گەورەی لە دەست بوو، کردیەوە و لەدوو ناوی شێرۆی گەڕا، گۆتی: ئەوەتە لە لاپەڕە سێزدەیە، لۆیێ نیوچەوانیشی سێزدەیە! بەینەکی تەماشای لاپەڕەکەی کرد و گۆتی: وەڵلا کاکە شێرۆ لە ڕووی سیاسی هیچی لەسەرنیە و لەکنە من نووسرایە مواتینەکی ساڵحه! بابم پێنج دیناری هاویشتە گیرفانی موختاری و گۆتی: ئەگەر چشتەک هەیە پێمان برێ! موختار گۆتی: بڕوا بکە کووی پێت دەرێم ئەوهایە، شێرۆ هیچی لەسەر نیە، بابم گۆتی: سبەینێ لە دائیرەی ئەمن تاقیبەکمان لۆ بکە بزانە لەوێ نەگیرایە! گۆتی: وەعدبی لۆت تاقیب بکەم بەران تەئکید بە لەسەر سیاسەت نەگیرایە!
مایتی.[1]
⚠️ تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!